Yom ya mudimu yikata kufundish, kubachik, ni kukasikesh
1 Yikwet usu ujim mulong wa kuyifundish antu piur pa Baibel ni piur pa Atuman’a Yehova. Yayibachikin avud kushal ajikishina mu uyakin. Yakasikeshin ritiy ni katumb ka antu a Nzamb ipanina. Ov yidi yom ik? Madi maband video mabudishina dirijek dia Yehova. Ov wamatadin kal mawonsu dikum? Ov wamatadin katat? Ov ukat kumasadil mu mudimu wa kulejan? Ku chikumangan cha distrik, ijikishin kubudikin kwa band video wa 11, ukweta mutu wa mulong, Toute la communauté de nos frères (Inglish). Ov wamwitin kal? Ov mutapu ik ukutwisha kutambul ukwash ujim udiokila ku yom ya mudimu yiney yiwamp?
2 Mutu wa mulong “Twilejany Pakad Kujing Dizu dia Nzamb mu Dijuku” udia mu Tour de Garde wa Kafunfut 1, 1999, wapana chiyul cha “kwitekin chikunku cha chisu chen mulong wa kutal chikunku cha umwing wa maband video ma Sosait mafundishina . . . ni kupwa chisambinany.” Kwambatan nich chiyul chinech chiwamp, ngond ni ngond ku Chikumangan cha Mudimu akusambish kwisambin band video kushalijan umwing ni umwing. Tukasikeshin muntu ni muntu mu chikumangan kutal band video ku chikumbu kurutu kwa chisu chikumwisambinau ku Chikumangan cha Mudimu.
3 Ngond unou tusambishin nich band video wa kusambish kubudish, Les Témoins de Jéhovah—Un nom, une organisation. Talany ni kutesh mulong wa kwakul ku yipul yiney:
◼ Ov mulong wak wijikenau nawamp Atuman’a Yehova?
◼ Ov midimu yawonsu yisadinau ku Betel yambaten ni mufund ik?
◼ Ov chifanakesh ik cha mu Baibel wamena akat kusal, chakwatinau yipich, ni kupent mulong wa kuyisadil mu mikand?
◼ Ov yom ik yikushimokishina piur pa mutapu urijekinau mikand yetu?
◼ Kudiosh mu 1920 kushik mu 1990, ov mikand yinch yachapinau kal kud Sosait?
◼ Ov nany pakach pa antu a Nzamb ufanyidina kamu kuwanyish yitinau mulong wa mudimu wa Betel?—Jnsw. 20:29.
◼ Mutapu ik upanina dijuku dia Betel chilikej chiwamp nakash kud Atuman’a Yehova awonsu?
◼ Ov yom ik yikushimokishina piur pa mudimu usadilau ku Betel chakwel kushikij rusangu ruwamp kud antu avud mud kamu chitwishikina?
◼ Ov kwisu kudiokila nfalang jikwashina mudimu wa mangand mawonsu?
◼ Ov mudimu ik tukutwisha kukwash nich mushiku, ni nich spiritu wa mutapu ik?—Yohan 4:35; Midimu 1:8.
◼ Ov mutapu ik utongina piur pa dirijek ni dijin dietu?
◼ Ov mutapu ik ukutwisha kusadil band video winou mu mudimu wa kulejan?
Mu Kachirikin tukuchirikin band video La Bible: un récit historique exact, des prophéties dignes de foi!