Video Musu Mulong wa Kusambish Malejan ma Bibil
Video wa mu wiswimp ukweta mutu wa mulong ulondina anch: Ov, Mulong Wak Kwilej Bibil? amutekin kal pa kapend ka jw.org mulong wa in kutesh avud. Video winou amusala mulong wa kuyikasikesh antu asangaredina kwitiy kwilej netu Bibil pakad kufut nfalang. Akutwish kutan video winou kusutil ku kudjat buton pa ndond yifundinau anch: “Kwit Dilejan dia Bibil” yidia pa paj wa nsambishil ya kapend ap kusutil ku kufund kode QR wa rudim ra Uruund udia pa chibur cha nsudiel cha matrakt metu min mawonsu masu. Milad yimwing yilondwilaku ey yawiy yikutwisha kutukwash kusadil nawamp video winou.
Chisu ukumuchirikana mwin chikumbu, ukumulej anch: “Ov, nikutwish kukulej video mu kachisu kakemp ulejena mutapu ukutwisha kutan yakul ku yipul yey mu Bibil wey?” Anch witiy, muleja video udia mu telefon wey wa ku makash ap udia mu ordinater wey.
Anch tupanin umwing wa ku matrakt masu chisu twiyandjikina mu mudimu wa kupan uman wa kukashimwish ap wa patok, muleja muntu kode QR wa rudim ra Uruund ni mukasikesh chakwel afuna kode winou mu telefon wend wa ku makash. Mulong Kode QR udi mu jindim jivud umushikijijing muntu kapamp kamwing pa video winou utekinau pa kapend ketu ka Web, ukutwish kutal video winou mu telefon wey wa ku makas.
Yileja ambay ney a mudimu, ambay ney a shikol, anamakwey a ku mujimbu ni antu akwau wijikijadinanya nau piur pa video ni kuyilej mutapu wa kuyitumin. Ap ukutwish kuyitumin video winou kusutil ku e-mail ni kuyitazuk chakwel amutala ayinau.
Kusutil ku kusadil nawamp ditenchik disu dined, tukutwish kamu kusambish malejan ma Bibil ni kuyikwash muspiritu antu adia “mu mwikadil ufanyidina wa kutambul mwom wa chikupu.”—Mid. 13:48, NW.