Mutapu Usangareshina Ufundinau Matrakt Masu!
1. Ov, mitu ya milong ik yatondau yisangareshina mulong wa mu mudimu wa kulejan?
1 Matrakt matan masu mabudika ku Chitentam cha Distrikt cha muvu wa 2013 chadinga ni mutu wa mulong ulondina anch: “Dizu dia Nzamb Diawiy Uyakin!” Chikwau kand, Rusangu ra Want No. 38 rikweta mutu wa mulong ulondila anch “Ov, Chakin Kamu Afu Akutwish Kwikal Kand ni Mwom?” aruweja ku matrakt minam mabudika. Matrakt masu mawonsu musamban amafunda mu mutapu usangareshina. Ov, mayingish ik mamwing piur pa mutapu usu wafundau matrakt? Chisu tumapanina ku chikumbu ni chikumbu, ov, mutapu ik tukutwisha kusadin nawamp mitu ya milong yafundau?
2. Ov, kufund kwinoku kusu kukwet rutong ik?
2 Ov, Mulong Wak Kufund Kwinoku Kusu?: Mudimu wa kulejan wa ku chikumbu ni chikumbu usongininga mabuj witining yisu yivud kuwanyish milad yinying ey: (1) Kwipul chipul mulong wa kwijik mutapu wa kusambish minsamb. (2) Kulet chitongijok chidiokila mu Bibil. (3) Kumwinkish mwin chikumbu mikand ya kutang. (4) Kusha chipul kanang cha kwakul pa chisu chikwau ni kwirijek chakwel umuchirikina muntu. Matrakt masu mafundau matukwashin mu mutapu uswapela kulondul milad yawonsu yinying ey.
3. Ov, mutapu ik tukutwisha kupan umwing wa ku matrakt masu mu mudimu wa kulejan?
3 Mutapu wa Kumasadin: (1) Kupwa kwa kumulangwish mwin chikumbu, muleja chipul chimwing chisangareshina chikweta yakul yivud chidia pa chibur cha nsambishil cha trakt ni mwipula chitongijok chend. (2) Buril trakt, ni shinshikinany pafundinau anch “Chilondinay Bibil.” Tang verse kapamp kamwing mu Bibil anch chitwishikin. Anch mwin chikumbu ukwet chisu, isambinany pafundinau anch “Chikutwisha Kurumburik Mazu Minam Kudi Ey.” (3) Mwinkisha trakt ni mukasikesha chakwel amutanga pa chisu chend chisotinay. (4) Kurutu kwa kumusha, muleja chipul chidia pa chibur cha nsudiel pafundinau anch: “Cha Kutongijokin” ni irijeka chakwel umuchirikina wisambinany chakul cha Bibil pa chisu chikwau.
4. Ov, mutapu ik tukutwisha kusadil matrakt masu pitumuchirikidina muntu?
4 Kumuchirikin muntu mu mutapu uswepal. Sadil kusu maverse madia pa chibur cha nsudiel cha trakt mulong wa kwakul ku chipul chiwipula ku nsudiel kwa minsamb yen ya dichuku diang. Kurutu kwa kumusha, muleja mwin chikumbu chipich cha broshir Rusangu Ruwamp ni mutu wa mulong wa dilejan disambidina jinsangu jivud piur pa chipul chin chang, ni mwinkisha broshir winou. Anch witiy kutambul broshir winou, irijeka chakwel wisambinany broshir winou chisu ukeza kumuchirikin. Wawiy kamu mutapu wa kusambish dilejan dia Bibil! Chikwau kand, pa ndond pa kupan broshir, ukutwish kupan trakt mukwau ni kwirijek kumuchirikin mwin chikumbu chakwel wisambinany trakt winou pamwing nend.
5. Ov, matrakt makwet usey ik mu mudimu wetu wa kulejan?
5 Tusadidining matrakt mu mudimu wetu wa kulejan pasutin kal mivu 130. Chikalap nchik kujimb ni kushalijan kwau, yidi yom ya mudimu yikweta ukwash nakash mulong wa kupan nich uman. Chawiy lel, el amboku tusadinany nawamp ditenchik dined disu mulong wa kudandamen kupalangesh ronganyin ra Bibil pa mangand mawonsu.—Jinsw. 15:7.