Tuyilejany Antu Itudishila Kwendil Mwi Njil ya Nzamb

1. Kwikadish in kwilej kwitin yom ik?

¹ In Kristu a mu mivu chitot ya kusambish ayelang anch alondwila “mwi njil.” (Midimu 9:⁠2) Win Kristu wakin ukwatijadin nich njil ya mwom wawonsu wa muntu. (Jinsw. 3:​5, 6) Chisu tutakedila malejan ma Bibil, tuswiridin kusal yom yivud kupandikan kulejan kusu ronganyin rakin ra malejan ma Bibil. Tufanyidin kand, kuyikwash in kwilej Bibil kwendil mwi njil ya Yehova.​—⁠Kus. 25:​8, 9.

2. Yom ik yikutwisha kumubachik mwin kwilej Bibil kulam yijidik ya Nzamb?

² Kumukat Yehova ni Yesu: Chikasiken chakin kamu kud antu akad kuwanyin kusal yitongijok yau, ngikadil, kulond, ni yaku yau yilondulijana nich rusot ra Nzamb! (Rom 7:​21-23; Ef. 4:​22-24) Pakwez, kumukat Nzamb ni Mwanend kuyibachikin itudishila kwitiy chisend chinech chikash. (Yohan 14:15; 1 Yohan 5:⁠3) Mutapu ik tukutwisha kuyikwash antu twilejina nau Bibil kukudish rukat riner?

3. Mutapu ik tukutwisha kuyikwash in kwilej kukudish kumukat Yehova ni Yesu?

³ Mukwasha mwin kwilej wey kwijik mutapu udiay Yehova. Mukadivar umwing warumburila anch, “Antu kakutwishap kumukat muntu wakadau kwijik, chawiy lel ku disambishil dia dilejan, nikat kuyilej dijin dia Nzamb mu Bibil, ni nikat kukimb mitapu ya kukasikeshin ngikadil ya Yehova.” Kukasikeshin chilakej cha Yesu udi mutapu uwamp nakash wa kusal mwamu. (Yohan 1:14; 14:⁠9) Chikwau kand, sadil mushet wa yipul ya dichirikin udia kwinsudiel kwa shapitre ni shapitre wa buku Chifundishinay Bibil mulong wa kumukwash mwin kwilej kutongijokin ngikadil yishimokishina ya Nzamb ni Mwanend.

4. (a) Mulong wak mudimu wa kulejan ukasiken kud in kwilej avud? (b) Mutapu ik tukutwisha kuyikwash in kwilej kusambish mudimu wa win Kristu?

⁴ Tulejanany Kusutil Chilakej: Chitudia alej ni antakel, tuyilejin antu akwau kusutil ku yisalijok yetu chirumburikina kwendil mwi njil ya Nzamb. (1 Kor. 11:⁠1) Chilakej, in kwilej Bibil avud kijidinap kuyilej angendj piur pa yitiyij yau. Chawiy lel, chikutwish kwit kushimpish ni ukaliweny wa kuyikwash kukudish rukat, ritiy, ni kujijaman kuswiridikina mulong wa kwipan mu mudimu wa kulejan ni wa kwikadish in kwilej. (2 Kor. 4:13; 1 Tes. 2:⁠2) Rusot retu ra kuyitakel in kwilej etu rikutubachik kuyitwal ni kuyikwash chisu chisambidinau mudimu wa win Kristu.

5. Mutapu ik chilakej chiwamp chikat kuyikwash in kwilej kushinshikin yitinau mu kulondul yijidik ya Nzamb?

⁵ Chilakej chey chikutwish kuyifundish in kwilej milad yikwau ya usey ya mwom wa win Kristu. Chisu uyila ni kuyital ayej ap kuyilangwish antu akwau ku yikumangan ya chikumangen nich musangar, akat kuman kumekan kwa rukat. (Yohan 15:12) Chisu wipanina mu kukomb mu Chot cha Want ap kusal yom ya ukwash mulong wa antu akwau, ukat kuyilej mutapu wa kusal. (Yohan 13:​12-15) Pamenau anch ulamin mulad wa mwom upipela, akat kov kurumburik kwa ‘kusambil bil kusurib want.’​—⁠Mat. 6:⁠33.

6. Chibudikin ik chidiokila ku kuyikwash antu itudishina kumusadil Yehova?

⁶ Mudimu wa kuyilej antu akwau Dizu dia Nzamb ni kwikadish in kwilej witin usu nakash. Pakwez udi musangar ujim nakash pa kuman antu itudishila “akat kwendil mu yakin”!​—⁠3 Yohan 4.