Kasikeshinany Kusanger Ngikadil Yipandakena Kuwap ya Yehova
1 Mu mudimu wetu, tukatap kuyifundish kusu kwetu antu akwau uyakin wa Bibil wa pa dishin. Tukat kuyikwash antu kusanger ngikadil yipandakena kuwap ya Yehova. Chisu chilejinau antu a kashinsh uyakin piur pa Nzamb, uyakin ukweting usu nakash, ukat kuyibachik kuswimp mu mwom wau chakwel enda “ku kufanyin kwawonsu ku kumusangarish Mwant.’—Kol. 1:9, 10; 3:9, 10.
2 Ukwash Usu wa Dilejan: Kudiosh kamu kwisambishil, buku Chifundishinay Bibil upwitidin manangu pa ngikadil ya Yehova. Shapitre wa kusambish wakwil kamu ku yipul yilondwila ey: Ov, chakin kamu Nzamb ukat kukubangin ey?, Ov, Nzamb ufaniken nich ik?, ni Chitwishikin kumushejin Nzamb? Shapitre winou urumburil anch Yehova udi utumbila (par. 10), urumburil kand kutentam ni ranaken rend (par. 11), rukat rend (par. 13), usu wend (par. 16), ni ranaken, riy, witenchikin mu kulikishin, kushimpish, ni kushinshaman (par. 19). Paragraf wa 20 utulejin mu wiswimp yitufanyidina kusal: “Anch wilej yivud piur pa Yehova, ndiy ukwijikan nakash kud ey ni ukez kwikal nich mayingishin mavud ma kumukat ni kwiyov piswimp nend.”
3 Mutapu ik tukutwisha kusadil buku Chifundishinay Bibil chakwel kuyikwash in kwilej Bibil kumushejin Yehova piswimp? Kupwa kwa kushinshikin shapitre urumburila ngikadil yimwing ya Nzamb, tukutwish kumwipul mwin kwilej anch, “Yom yiney yikufundishin ik piur pa wuntu wa Yehova?” ap “Mutapu ik yimekeshina anch Nzamb ukat kukubangin pakampwil?” Kusadil pachipatu yipul mud yiney chisu cha dilejan, kutukwashin kuyifundish antu twilejina nau kutongijokin pa yom yilejinau ni kuyikwash kusanger nakash ngikadil yipandikena kuwap ya Yehova.
4 Sadil Mushet wa Dichirikin: Kwisudiel kwa shapitre, mwita mwin kwilej arumburila mu mazu mend amwinend manans madia mu mushet wa buku “Chifundishinay Bibil.” Pwitin manangu mend pa maverse majimbwilau. Chakwel kwijik yidia mu muchim wa mwin kwilej, ukutwish kumwipul anch, “Mutapu ik utongina pa chom chifundishinay Bibil pa dinans dined?” Kusutil ku kusal mwamu, tukatap kukasikeshin kusu kwetu manans madia mu shapitre pakwez tukat kujingunin nawamp yitiyijinay chakin mwin kwilej. Chinech chikutwish kumukwash mwin kwilej kukasikesh urund wend ni Yehova.