Yikwasha Antu Akwau Kwikal Arund Nend Nzamb
1 Nlel, antu a michid yawonsu ayifundishin jinjil ja Yehova. (Isa. 2:2, 3) Pakwez, chakwel anch antu inay afundishinau ‘asonga mabuj nich kudandamen,” afanyidin kamu kumukat Yehova. (Luka 8:15; Mako 12:30) Wakad rukat mud riner, kakezap kwikal ni usu wa kurish nich yibachikin yiyimp ap kuhamuk mulong wa kusal yom yiwamp. Mutapu umwing wa kuyikwash antu akwau kukudish urund uwamp nend Yehova udi wa kujimbish rukat rau mulong wa ngikadil ya Nzamb. Yikasikesha kutongin nakash rusangu ridia mu buku Approchez-vous de Jéhovah.
2 Chilakej Chey: Yisalijok yey yikutwish kwikal nich usu pa michim ya antu wilejina nau Bibil. Anch aman usey ukwatina nich urund wey nend Yehova ni kuman usu ukweta urund winou mu mwom wey, akutwish kwikal abachikinau niyawiy kukudish urund wa piswimp mud winou. (Luka 6:40) Chakin, chisu chivud chilakej chetu chikweting usu nakash pad antu akwau kupandakanamu yitukata kulond.
3 Mutapu ujim kukutwishau anvaj kuyifundishin anau kumukat Yehova chidi chilakej chau. (Kuv. 6:4-9) Ambay a uruw amwing asota kulidin anau mu uyakin ayita anvaj atwishina kulil an yiyul. Ikundj ulondil anch: “Awonsu twambamba nau anleja anch chilakej cha anvaj chidi cha usey.” Chawiy lel, mu mwom wau wawonsu, anvaj akutwish kuyinkish anau chilakej chiwamp pa kurumburik kwikal ‘murund wa Yehova.’—Yak. 2:23.
4 Malembil ma Muchim Umwing: Ukutwish kand kuyikwash antu akwau kukudish urund nend Yehova kusutil ku kuyifundish kulembil kudiokila ku muchim. Ukutwish kuyilej malembil ma sampul ma Yesu, ni malembil makwau ma muchim utok madia mu Bibil. (Mat. 6:9, 10) Ukutwish kuyifundish aney ni antu ukata kwilej nau Bibil mutapu wa kulembil kusutil ku malembil mey amwiney. Pakuteshinau ukat kulembil nich muchim umwing, akat kutesh yitongijok yey pantaliken ni Yehova. Yikasikesha ‘kudandamen mu kulembil’ pakwetau yoziu. (Rome 12:12) Pamenau ukwash wa Yehova pa chisu cha maswir, akez kumuchingejin ni kumukat mud murund nau wakin.—Kus. 34:8; Filp. 4:6, 7.