La Révélation : le grand dénouement est proche!
1 “Wayuk muntu ukat kutang, ni awiy akata kumatesh mazu ma kubwak, ni kulam yom yifundilau; mulong muten washik kal piswimp.” (Kubur. 1:3) Mazu minam makasikeshidin usey wa buku wa Kuburik, nakash kamu mulong tushich mu chisu chatonday mulong wa kuwanyin kwa uprofet uvud. Chikwikal chifanyidina anch, tusambisha kamu dilejan dia buku La Révélation : le grand dénouement est proche ! Ku Dilejan dia Buku dia Chikumangen dia rubing ra Chiwong 8, 2007.
2 Kudiosh kapamp ka nsudiel twileja buku Révélation : dénouement ku Dilejan dia Buku dia Chikumangen, yom ya mangand minam yakarumukin kal mu mitapu kushalijan. (1 Kor. 7:31) Chikwau kand, antu avud inungina pamwing ni in kulejan rusangu ruwamp ra Want kand kal atambula ukwash udiokila ku kwilej verse ni verse wa mukand wa Kuburik. Dilejan dia buku Révélation : dénouement difanyidin kutukwash etu awonsu kuchish ku mes mulong wa yom yikeza kusadik mu machuku ma kurutu.—Kubur. 16:15.
3 Ikwatina amwiney mupak wa kwikal nich rutong ra kuya rubing ni rubing ku dilejan dia buku. Buku winou kakezap kusu kutukwash kuchish ku mes, pakwez uruu wa Yesu ku yikumangen sambwad ukez kand kutukwash kwipuk yom yikutwisha kuyipish mwikadil wetu wa mu spiritu ni kutukangesh mu mudimu wa chingand.—Kubur. 1:11, 19.
4 Irijeka Nawamp: Kurutu kwa dilejan ni dilejan dia buku, tang mu mukand wa Kuburik maverse makezau kurumburil ku dilejan. Shinshikin mutapu Bibil urumburilay verse ni verse. Sal usu wa kutesh nawamp chakwel manans majim mashika ku muchim. (Neh. 8:8, 12) Itekina chisu cha kutong ni kwiyipul amwiney anch: ‘Ov, yom yiney yikat kwinfundish ik piur pa Yehova ni kuwanin kwa rutong rend? Mutapu ik nikutwisha kusal yom kukwatijan nich rutong rend ni kuyikwash antu akwau?’
5 Kwasutin kal mivu makum chidivu ni yaad kudiosh kwasambisha “dichuku dia Mwant” mu muvu wa 1914. (Kubur. 1:10) Yinship yamushena pa divu yatakelau kulond mu mukand wa Kuburik yikwikalaku mu machuku ma kurutu. Dilejan dia buku Révélation : dénouement dikez kukasikesh muchim ni yitongijok yetu ni dikukasikesh ritiy retu mwin “njit ja dichuku dijim dia Nzamb wa Dikand Diawonsu” ni mu mangand masu madia piswimp ap.—Kubur. 16:14; 21:4, 5.