Ov, Wisu Mutapu Upandakena Kuwap wa Kwokan?

Dokter Mikael Rose, anesthésiste ni mwin kutakel mudimu wa umwingang walonda anch: “Muyej mwawonsu wokinau pakad kumutek mash, chirumburikin anch udi mwin kutambul mutapu upandakena kuwap wa kubaril utwishikina.” Ov, mitapu ik ya kusal ni kusadil kwa yikunku yimwing ya mash pa ndond ya mash yikutwisha kwikal mu “kwokan kwakad kusadil mash”? Ufanyidin kwijik chakwel ukwata mipak yiwamp piur pa kwokan ni kubaril wakad kusadil mash. Tal video Pas de sang : la médecine relève le défi. Kupwa pim ronganyin rey nich yipul yilondwila ey.—Chiyul: Mulong video ukwet yikunku yiswimp ya kubaril antu yimekeshinau, anvaj afanyidin kubabal pakutalau video winou pamwing ni anau akemp.

(1) Ov, diyingish ik dijim dikatau kulikin Atuman a Yehova kuyitek mash? (2) Chisu chishikedina milong yitadina kwokan, chom ik chikatau kusot Atuman a Yehova? (3) Mbil ik ya dishin yikwetau ayej? (4) Ov, mulong wak kukwat mupak wa kulik kutek kwa mash chidi chisend ni chom cha manangu? (5) Anch kudi kubudish kukash kwa mash, mitapu ik yaad ya kusal swa yikwetau adokter? (6) Ov, yijidik ik yinying yitadina kusadil kwa yikunku yimwing ya mash ya kutek mu mujimbu? (7) Mutapu ik ukutwishay dokter (a) kukepish kubudik kwa mash, (b) kulam mash masuz matazukinau anch globules rouges, (c) kukasikesh kuvulijan kwa mash, ni (d) Kukangesh kubudik kwa mash? (8) Rumburil mitapu yijikena ya (a) Kubombakan kwa mash ni mem kupidilau anch hémodilution ni (b) kuking kwa maselil ap anch kulam mash. (9) Ov, chom ik ufanyidina kwijik piur pa mitapu yin yawonsu ya kutek kwa mash? (10) Ov, kubaril kujim ni kukasikena kukutwish kusadik pakad kutek kwa mash? (11) Ov, kwisu kuya kurutu kwa ukwash kumekena mu umwingang?

Kwitiyij mitapu yimwing ya kwokan yilejenau mu video udi mupak wa muntu ni muntu ipend ni kom kend kafundishinau nich Bibil. Ov, wakwatin kal mupak piur pa kusadil kwa yikunku yimwing ya mash ya kutek mu mujimbu usotina kwitiyij amwiney ni kuyitek aney? Yid ya dijuku yakad kwikal Atuman a Yehova yifanyidin kand kwijik nawamp mipak yey ni mulong wak uyikwatina. Tal “Yipul ya in Kutang” yidia mu Chinong cha Kalam cha Kalol 15, 2004, ni cha Mwinkind 15, 2000, (ya Français).