Ov, Udi Wirijekina Mulong wa Mar?
1. Mulong wak chidi cha manangu kwirijek mulong wa mar?
1 Muvu ni muvu, tutikit twa antu mu mangand, kuwejaku ni akadivar netu ni anambaz avud, akwachikin nich kuzal kwa divu, rinkind mukash upidilau anch tsunamis, chirung cha ruval mukash, rinkind mukash nakash ni mabeb. Mulong mar makat kushikenang pakad kuchingejin ni makutwish kutukwat etu awonsu, chidi komb cha manangu kwirijek.—Jinsw. 21:5
2. Mulong wak chifanyidina kuyinkish amakurump maadres ni manimero ma telefon ma pa chisu chinicha?
2 Ya Kusal Kurutu Mar Mashikena: Yisu yimwing antakel akutwish kubabesh mulong wa mar makutwisha kushiken mu machuku ma kurutu. Chidi cha usey kuta matu ku yibabesh yiney. (Jinsw. 22:3) Mu mikadil ya mutapu winou amakurump akez kupakish kwambamb ni antu awonsu adia mu chikumangen chakwel kuyikwash kwirijek mu mutapu ufanyidina. Kupwa kwa mar, amakurump akez kusal usu wa kwambamb ni antu awonsu adia mu chikumangen mulong wa kujingunin ukwash ukutwishau kwikal nich kuswir. Kukwikal kusutish chisu chamwamu anch amakurump kateshinap jinsangu pa chisu chinicha. Chawiy lel chiwapidil anch in kulejan amwinkisha kalam wa ujindj ni kalam wa dilejan diau dia buku maadres mau ni manimero mau ma telefon ma pa chisu chinicha.
3. Mutapu ik tukutwisha kusadil pamwing ni amakurump anch tudi ndond ya mar?
3 Anch chikumangen chidi mwi ndond yisambidinau kwikal ya mar, amakurump akutwish kuyit in kulejan kupan dijin ni nimero wau wa telefon wa mwanamakwau ap murund udia kulemp ni ndond yidia mar ni ukutwishau kwambamb nend mu chisu chifanyidina kuswakej ukwash. Chinech chikez kuyikwash amakurump kwijik ndond yidia antu apandishinau ku mar. Amakurump akutwish kand kusot kuvudish yikusalau mulong wa chikumangen anch kudi kuswapej ni yom yikwau mudi dipang dia yom ya kuyikwash nich yikutwishau muntu ni muntu kulam, yirijek ya kuyikwash kupand, ni kwirijek mulong wa kuyikwash antu akweta maswir ma pakampwil. Kusadil pamwing nich yirijek yiney ya rukat kudi kwa usey.—Heb. 13:17.
4. Yom ik tufanyidina kusal anch mar mashiken ndond tushicha?
4 Kupwa kwa Mar: Yom ik ufanyidina kusal anch mar mashiken ndond udia? Tal nawamp anch dijuku diey diwanyishin maswir ma mujimbu ma pa chisu chinicha. Anch ukutwish, yikwasha antu akwau akwachikina nich mar. Sal usu wa kwambamb ni kalam wen wa dilejan dia buku ap mukurump mukwau chisu chinicha anch chitwishikin. Chifanyidin kusal mwamu ap anch udi ndond yidia diking ni ap anch uswiridinap ukwash. Anch uswiridin ukwash, ijik anch akadivar ney akat kusal usu wawonsu mulong wa kukukwash. (1 Kor. 13:4, 7) Vurik anch Yehova umen mwikadil wey; muchingejina chakwel akukwasha. (Kus. 37:39; 62:8) Babal mu kukimb mitapu ya kuyikwash antu akwau mu spiritu ni mu yovil. (2 Kor. 1:3, 4) Chirikin mijikit yey ya uteokras ya dichuku ni dichuku mudi kamu chitwishikina.—Mat. 6:33.
5. Mutapu ik tukwachikina etu in Kristu nich ubaj wa mar?
5 Ap anch ubaj wa mar uletin yakamish yivud, tukutwish kuchingel machuku ma kurutu nich ruchingej. Katat kamu ak mar mawonsu makez kwikal ma pasak. (Kubur. 21:4) Pakwez katat, tukutwish kukwat mipak ya manangu chakwel kwirijek mulong wa chisu cha yikokujol ni mar kulam mushiku wetu mu kulejan rusangu ruwamp kudi antu akwau.