Etu Awonsu Tukutwish Kwinung mu Kwikadish in Kwilej Asu
1 Kwikadish mwin kwilej musu chidingap chibudikin cha usu wa muntu umwing kusu bwat. Yehova ukutwish kuyisadil “in mudimu” nend awonsu chakwel amukwasha mwin kwilej Bibil apama mu spiritu. (1 Kor. 3:6-9) Tukat kuyikwash antu asu chidiap kusu ching kusutil ku kwakul kwetu kwa kashinsh ku yikumangen ya Ukristu pakwez kand kusutil ku ngikadil yetu yiwamp, yimekeshina anch spiritu wa Nzamb ukat kusal mu mwom wetu. (Yohan 13:35; Gal. 5:22, 23; Ef. 4:22, 23) Yom ik yikwau yifanyidina kusal chakwel kuyikwash antu asu?
2 Mudimu wa Chikumangen: Etu awonsu tukutwish kumekesh anch tuyisangaredin antu asambishina kukumangan pamwing netu mu kusambish kuyilangwish nich chirungul ni kwisamb nau kurutu ni kupwa kwa chikumangan. Padingay ni kutongin kushik kwend kapamp ka kusambish mu chikumangen, ikundj umwing walonda anch: “Dichuku dimwing nasankana antu avud nakash akad am kwijik, akweta rukat rakin ni kand kal nimanap antu mudi inay mu egliz napamina. Chinech changitiyisha chakin anch naman kal uyakin.” Ndiy amubatisha kupwa kwa angond sambwad kudiosh dichuku dia ku kumangan kwend kwa kusambish.
3 Tumujikitishin nich kashinsh payilay kurutu mu spiritu. Ov, mwin kwilej Bibil urishin nich rupompat? Ov, ukat kukumangan ku yikumangan pakad kujing? Ov, ukwet mushiku wa kwakul? Ov, wafundishin kal dijin ku Shikol ya Mudimu wa Uteokras ap kusambish mudimu wa kulejan? Mujikitishany mulong wa kuya kwend kurutu. Kusal mwamu kukez kumukasikesh.—Jinsw. 25:11.
4 Mudimu wa Mwin Kutakel Dilejan dia Bibil: In kulejan amwing atwisha kuyikwash in kwilej nau Bibil chakwel ijikijana ni yid ya chikumangen mu kuyit in kulejan akweta chilakej chiwamp aya nau pamwing ku dilejan dined. Mutazuka mwin kwilej Bibil ku chikumangan cha chikumangen pakad kulab. Pakatay kusambish kukumangan ku yikumangan, muleja mutapu ukutwishay kwijikijan ni antu akwau. Ov, usadil usu wa kulik chaku chiyimp mudi, kuna ruwand? Ov, kudi muntu umwing kol kwend umupompatina mulong wa dilejan diend? Ndiy ukutwish kutambul ukwash kusutil ku kwambamb ni mwin kulejan warisha ni kupandakan yikokujol mudi yiney.—1 Pi. 5:9.
5 Antu asu aswiridin ukwash wa mu spiritu wa chikumangen. Chikumangen chawonsu chifanyidin kuyikwash kuya kurutu mu kuyimekeshin kusanger kwa pakampwil ni kwa kashinsh.