‘Lejan Dizu Dia Nzamb Wakad Wom’
1 Ov, ukat kwidjidjek yisu yimwing pa kulejan ritiy rey piukata kutan chisu cha kulejan ku shikol ap ku mudimu? Ov, chikukasikedin kulejan uman wa kukashimwish kudi anamakwey ni amutej ney ap antu wakad kwijik? Ov, chom ik chikeza kutukwash etu awonsu kusadil yisu yiwanyidina chakwel “kulejan dizu dia Nzamb wakad wom”?—Filip. 1:14.
2 Kangal Wachirik Kwinyim: Ov, ukutwish kwidjidjek kumuchidij murund ney wa piswimp nakash ap mwanamakwey ufishinau nich ya makasu? Yehova, Murund netu wa piswimp, a mumekesha mu mutapu umwing uyimp nakash mu tunan twa mivu twasutina. Tukwet chisend cha pakampwil cha kupan uman mulong wa Nzamb wetu mujim! (Is. 43:10-12) Rukat ripandikena mulong wa Yehova rikutwish kutukwash kupandakan yitongijok ya kwibangin ayinetu ap kwakam ni rikutwish kutubachik ku kulond, pakad kuchirik kwinyim pitukata kupan uman wa uyakin nich mushiku.—Midimu 4:26, 29, 31.
3 Vurik anch uruu wetu udi rusangu ruwamp. Ukez kuyiletin antu a uteshina yiyukish ya chikupu. Kushinshikin usey wa mudimu wa kulejan pa ndond pa kwishinshikin ayinetu ap kuyishinshikin in kutupompat kukez kutukwash tulejana nich mushiku.
4 Yilakej ya Antu Akwau: Mwom ushinshamena wa antu akwau alejana dizu dia Nzamb wakad wom ukutwish kutukasikesh. Chilakej, Enok walejana nich mushiku dirumburish dia Yehova kudi akayitil. (Yuda 14, 15) Dijuku dia Noa diayileja nich kushinshaman antu adinga akad kusanger. (Mat. 24:37-39) In Kristu a mu mivu chitot ya kusambish adinga ‘akad kwilej ku shikol, adinga mudi antu awonsu’ adandamena kulejan ap anch kwading rupompat rikash. (Midimu 4:13, 18-20) Mu Chinong cha Kalam ni mu Réveillez-vous ! mudi jinsangu ja machuku ma katat ja antu apandakana wom wa muntu ni kwikal in kulejan akweta mushiku kusutil ku kutek ritiy mudiay Yehova.
5 Tukutwish kutan dikasikesh mu kushinshikin mwom wa atushalapol ashinshamena a pasak arisha nich mikadil yikash. (1 Ant 19:2, 3; Mako 14:66-71) Awiy ‘ajijamana mwi Nzamb’ ni kulond wakad wom. Komb niyetu tukutwish kusal mwamu!—1 Tes. 2:2.