Tukwet Musangar wa Kwipan Ayinetu mu Mudimu wa Yehova!

¹ Kambuy Paul wasangera “kwipan” nakash mulong wa kuwanyish mujikit wend wa Ukristu. (2 Kor. 12:15, Manswik Masu) Chilik chimwing nlel unou, in Kristu avud asadin nich mushiku mudi ayibol. Amwing akwet yisend yikash mu majuku itekidin chisu mu program wau mukash mulong wa kusal mujikit rubing ni rubing. Akwau akweta milong ya ukash wa mujimbu akat kusadil usu wau ukemp mulong wa kutwal kurutu yisakin ya Want. Chikasikeshin mudi ik pa kuyiman antu a Yehova, chipaninau ayinau mu mudimu wa Yehova, chikalap nchik reng rau ap mikadil yau!

² Kumukat Mutej: Kusal usu wetu wawonsu mulong wa kumusadil Yehova, kumekeshining kumukat Nzamb ni mutej netu, kutwinkishining kom kishitwila. Mulong Paul washesha mupim wend mulong wa kulejan rusangu ruwamp, chawiy chalonday nich musangar anch: “Chinilondila kudi en nlel unou anch, am nitokish kal ku mash ma antu awonsu.” (Midimu 20:24, 26; 1 Tes. 2:8) Kwipan mu mujikit kwambatan nich mikadil yetu kukutukwash kwiyep chisend cha mash.—Ezek. 3:18-21.

³ Kusal mudimu ukash mulong wa kuyikwash antu akwau kukutuletin musangar. (Midimu 20:35) Mukadivar umwing walonda anch: “Pa chisu chikata kuzwek muten, ni pinikata kuchirikang ku chikumbu kupwa kwa kusutish dichuku dia kabuj mu mudimu wa Yehova, chakin anch nikat kuziyang nakash. Pakwez nikweting musangar ujim, ni nikat kumujikitish Yehova mulong wa kwingikish musangar wakad muntu ap umwing kuupwish.”

⁴ Kumukat Nzamb: Diyingish dijim nakash ditukata kwipanin ayinetu mu mudimu wa Yehova didi anch chikat kumusangaresh Tatukwetu wa mwiur. Kumukat Nzamb kutubachikin kulam yijidik yend, chimwing chay chidi kulejan ni kwikadish in kwilej. (1 Yohan 5:3) Ap anch antu alikin kwau ap kitiyijinap, tukat kudandamen nich musangar kumusadil Yehova mudimu ukash.

⁵ Katat chidiap chisu cha kulik kulejan. Tudi mu chirung cha kwangul. (Mat. 9:37) Ndim usadiling asaa avud a mudimu pa chirung cha kwangul mulong ukwet chisu chikemp cha kwangul mbut kurutu jisambisha kuyip. Chisu cha mudimu wa kwangul mu spiritu ni chawiy chidi chikemp. Chitwija chirung chitudia, tudandamenany amboku etu awonsu kwipan nakash ayinetu mu mudimu wa kulejan.—Luka 13:24; 1 Kor. 7:29-31.