Salany Nich Mushiku Mudimu Ujim Wa Kwangul Kwa Muspiritu

‘Salany nich mushiku midimu ya Nsalejetu.’​—1 KOR. 15:58.

1. Ov, Yesu wayita in kwilej end kusal ik?

PADINGAY ni kusut mwingand ya Samaria kwinsudiel kwa muvu wa 30 C.C., Yesu wimana chakwel apimaku ku dijiy piswimp ni ul wa Sikar. Kwinikwa wayileja in kwilej end anch: “Zambulany mes, utalany pa yingand, yawiy yatokang kal, yashikenankal pa kwangul.” (Yoh. 4:35) Yesu kisambinap kwangul kwa kumujimbu, pakwez wisambina piur pa kukumangej kwa muspiritu kwa antu atentamina akeza kumulondul. Pakwez, wading chakin kamu, ni kuyibachik in kwilej end chakwel asala mudimu. Kwading mudimu ukash pakwez chisu cha kuusal chading chikemp!

2, 3. (a) Ov, chom ik chimekeshina anch tudi pa chisu cha kwangul? (b) Ov, mutu wa mulong winou ukushinshikin yom ik?

² Mazu ma Yesu piur pa kwangul makwet kurumburik kwa pakampwil kudi etu. Tushich pa chisu chikweta chir cha mangand “mbut ja swankal mu yir, jawanyinan kal pa kujangwil.” Muvu ni muvu, mamiliyon ma antu amatazukin kwez kwilej uyakin upanina mwom, ni tunan twa in kwilej asu tutambwil dibatish. Chisend chetu chidi cha kwipan mu kwangul kujim nakash kupandakanamu kwa yisu yawonsu, mu umutakel wa Mwant wa kwangul, Yehova Nzamb. Ov, ukutwishany ‘kusal nich mushiku’ mudimu winou wa kwangul?​—1 Kor. 15:58.

³ Mu mivu yisatu ni chikunku ya mudimu wakulejan wasalay, Yesu wayifundisha in kwilej end mutapu wa kusal mudimu wau wa kwangul. Mutu wa mulong winou ukez kwisambin piur pa malejan masatu pakach pa malejan mavud ma usey mayifundishau in kwilej kudi Yesu. Dilejan ni dilejan dikasikeshidin ngikadil ya usey nakash kudi etu pitwikasikeshina kusal yawonsu yitukutwisha kusal mu chirung chetu mu kukumangej in kwilej. Shinshikinany amboku ngikadil yiney yimwing ni yikwau.

Kwikepish Kudi Kwa Usey

4. Ov, mutapu ik walejanay Yesu usey wa kwikepish?

⁴ Tongin bil pa chinech: In kwilej adiokil mu kupwitijan piur pa kwijik nany upandakena kujimb pakach pau. Kuburen kumuchingejin mukwau ni kumwovil kuyip kwamekana patok mwi mpal jau. Chawiy lel, Yesu wamutazuka mwanikanch umwing chakwel imana mukach mwau. Pamutalay walonda anch: “Muntu udia mujim kupandakan mu Want wa mwiur udi muntu ukata kwikepish amwinend wikal mudi mwanikanch winou.” (Tang Mateu 18:1-4.) Pandond pa kutong mudi mangand, makata kwisikesh muntu kusutil ku uyaj, mapit ni ndond yikwetay, in kwilej afanyidin kwijik anch kujimb kwau kwimedin pa ‘kwikepish ayinau’ kurutu kwa antu akwau. Yehova ukez kayiyukish ni kuyisadil ching kusu anch amekesh kwikepish kwakin.

5, 6. Ov, mulong wak ufanyidin kwikepish chakwel wipana nakash mu mudimu wa kwangul? Let chilakej.

⁵ Nlel unou, antu avud mu mangand, apanin mwom wau mu kukimbijol uyaj, mapit, ni ndond ya piur. Mudi chibudikin, akwet chisu chikemp ap aburedin chisu chakwel kwilej piur pa Nzamb ni kumusadil. (Mat. 13:22) Pakwez, antu a Yehova akwet musangar wa ‘kwikepish ayinau’ ku mes kwa antu akwau mulong wa kutambul chiyukish ni kwitiyik kudi mwin mudimu wa kwangul.​—Mat. 6:24; 2 Kor. 11:7; Fil. 3:8.

⁶ Shinshikin chilakej cha Francisco, wadinga usadil mudi mukurump mu Amérique du Sud. Padingay uchidi nsand, ndiy walika kwilej ku université chakwel ikala chibol. Ndiy uvurikin anch: “Pinatondana chakwel natana, natwisha kutan mudimu wela kwinletin am ni mukajam nfalang jivud. Pakwez, twakwata chiyul cha kuswapej mashakamin metu ni kudandamen pamwing mu mudimu wa chisu chawonsu. Kupwa, pitwavala an, yikokujol yasambisha kuvulijan. Pakwez Yehova watukwasha chakwel tudandamena nich chiyul chetu.” Francisco upwishin kulond anch: “Nisangaredin kwikal nich chisend cha ukurump mu mivu 30 ni kusut, kuwejinaku ni yisend yikwau yivud ya pakampwil. Kwikil dichuku ap dimwing twova ushon mulong wa kuswapej mashakamin metu.”

7. Ov, wapakishin mutapu ik kusadil chiyul chidia mu mukand wa Rom 12:16?

⁷ Anch walik “kwibaz” kwa mangand minam ni wilikidil amwiney chakwel ‘wipana ku yom yakad katumb,’ ni ey ukutwish kuchingejin kusanger yiyukish yikwau yivud ni yisend mu mudimu wa kwangul.​—Rom 12:16; Mat. 4:19, 20; Luka 18:28-30.

Mushiku Uletin Yiyukish

8, 9. (a) Lejan mu wiswimp chishimu cha talent chaletay Yesu. (b) Ov, chishimu chinech chikutwish kumukasikesh nany pakampwil?

⁸ Ngikadil yikwau tuswiridina chakwel tusala sens mu mudimu wa kwangul udi mushiku. Yesu waleta chilakej mu chishimu cha talent.a Chishimu chinech chisambidin muntu, kurutu akasa weny wayangena atushalapol asatu yom yend. Wakusambish watambula matalent matan, wakad watambul maad; ni wakasatu talent umwing. Kupwa mwant winou waya, atushalapol aad akusambish asala mudimu nich mushiku ni kapamp kamwing ‘isaka nich’ matalent mau. Pakwez, kashalapol wakasatu wading “ukwet usweral.” Ndiy wajindjika pansh talent wend. Pachirikay, mwant wayiyukisha atushalapol aad a kusambish kusutil ku kuyitek “piur pa yom yivud.” Kupwa ndiy wamutambula kashalapol wa kasatu talent wamwinkishay ni kumwopat kwol kwend.​—Mat. 25:14-30.

⁹ Usotin chakin kamu mu muchim wey kuyimburij atushalapol adinga ni mushiku mu chishimu cha Yesu ni kwipan nakash anch chitwishikin mu mudimu wa kuyikadish in kwilej. Pakwez chikwikal nchik anch mikadil yikangeshin mu mutapu ukash yitukutwisha kusal? Chikutwish kwikal pamwing ap yikokujol ya kuburen kwa nfalang yikubachikina kusal chisu chilemp nakash mulong wa kuwanyish maswir ma dijuku diey. Ukutwish pamwing ap kuburen ukash wa mujimbu ap usu wa ku usand. Anch chidi mwamu, chishimu cha talent chikwet rusangu ra dikasikesh kudi ey.

10. Mu chishimu cha talent, ov mutapu ik wamekeshay mwant winou ranaken, ni mulong wak umen anch chinech chikukasikeshin?

¹⁰ Umen anch mwant wisambidinau mu chishimu chinech wading wij anch atushalapol end akwet manangu mashalijadina. Ndiy wamekesha chinech pa chisu chayinkishay talent “kudi muntu ni muntu mudi mwilikedila manangu mend.” (Mat. 25:15) Mudi mwachingejinay, kashalapol wa kusambish wamuvudisha mukwau kupandakanamu kashalapol wa kaad. Pakwez, mwant wasangera mushiku ukash wa atushalapol inay aad ni kuyitazuk anch atushalapol ‘awamp ni in kushinshaman’ kupwa wayinkisha yiyukish ya chilik chimwing. (Mat. 25:21, 23) Chawiy chilik chimwing, Mwant wa Kwangul, Yehova Nzamb, wij anch mikadil yey yikwet usu pa yom ukutwisha kusal mu mudimu wend. Ndiy kakezap kuvuramen usu usadina nich muchim umwing ni ukez kakuyukish kwambatan nich.​—Mar. 14:3-9; tang Luka 21:1-4.

11. Let chilakej chimekeshina anch chikalap nchik mikadil ya mar mushiku ukutwish kulet yiyukish yivud.

¹¹ Chilakej cha Selmira, nambaz umwing mwin Kristu udia mu Brezil, chimekeshin anch kwikal nich mushiku mu mudimu wa Nzamb kwimedinap ching pa kwikal ni mikadil yiwamp mu mwom. Pasutin kal mivu makum maad, nfumwend a Selmira amujipa kudi ampongarik, wamusha ni an asatu afanyidinay kulil. Mudimu wend wading witin chisu chilemp ni kwendol mu motak wa kufutin ujinguninau mu ul. Chikalap nchik yikokujol yiney, ndiy watenchika midimu yend chakwel asala mudimu wa uchibol wa rawonsu. Anend amband aad pakach pa anend asatu asambisha niyawiy mudimu wa uchibol. Ndiy urumburil anch: “Pasuta mivu yivud, nileja Bibil ni antu 20 ni kusut ni ikala yid ya ‘dijuku’ diam. Ni nlel unou, nisangarendin rukat ni urund wau. Didi dipit diakad kutwish kudiland ni nfalang.” Mwant wa kwangul wayukisha chakin kamu mushiku ukash wa Selmira!

12. Ov, mutapu ik tukutwisha kwikal nich mushiku mu mudimu wa kulejan?

¹² Anch mikadil ya mwom yitekin mipak ku chisu chey ukweta cha kwipan mu mudimu wa kulejan, ukutwish kupakish kuvudish chisu mu mudimu wa kwangul kusutil ku kusal anch mudimu wey wa kulejan usonga mabuj. Piusadidina nawamp yiyul ya usey yiletinau mu Chikumangan cha Mudimu cha pa rubing ni rubing, ukez kukudish ukaliweny wey wa kulejan ni ukwikal ni yisu yivud ya kupan uman. (2 Tim. 2:15) Chikwau kand, anch chitwishikin, ukutwish kusal program chakwel uteka kuns yom yakad usey chakwel wikala ni chisu cha kuya pakad kujing ku yikumangan yitenchikinau mu chikumangen mulong wa mudimu wa chingand.​—Kol. 4:5.

13. Ov, chom ik chidia cha usey mulong wa kukudish ni kulam mushiku?

¹³ Vurikany anch mushiku wetu udiokiling ku muchim wa kujikitish. (Kus. 40:8) Kashalapol wa kasatu wisambinay Yesu mu chishimu chend, wova wom wa mwant wend, wamana anch ndiy udi muntu ukasikena ni wakad manangu. Chawiy lel, muntu winou wajindjika talent wend mu dibuku pandond pa kumusadil mulong wa kuvudish yom ya mwant wend. Chakwel anch twipuka mwikadil winou wa usweral, tufanyidin kukudish ni kulam urund ni mwant wa kwangul ni kutongijokin pa mikadil yend yamushena ​—rukat, kushimpish muchim, ni riy rend. Mwamu, muchim wey ukez kakubachik chakwel usala yawonsu yiukutwisha kusal mu mudimu wend.​—Luka 6:45; Fil. 1:9-11.

“Ikalany Atumbila”

14. Ov, chom ik chikutwisha kusal antu akimbina kwikal in kwangul?

¹⁴ Pajimbulay mifund ya chin Hebereu, kambuy Pita wisambidin rusot ra Nzamb kudi ambay nend adia pa divu nich mazu manam: “Mudi mudiay wakutazukanya utumbil, niyen ikalany atumbila mu yaku yen yawonsu. Mulong afundil mu Mukand wa Nzamb anch: ‘Ikalany antu atumbila, mulong am nidi utumbila.’” (1 Pita 1:15, 16, MM; Lev. 19:2; Kuv. 18:13) Mazu minam mamekeshin anch in kwangul afanyidin kwikal atumbila ku mujimbu ni muspiritu. Tukutwish twasal mwamu mu kusalang mausu chakwel twikala ishitwila mudi muyilejenau. Ov, mutapu ik tukutwisha kusal mwamu? Tukutwish twachisal kusutil ku ukwash ukutwisha kutwinkish dizu dia uyakin wa Nzamb.

15. Ov, uyakin wa usu wa dizu dia Nzamb ukutwish kutubachik ku kusal ik?

¹⁵ Dizu dia uyakin dia Nzamb didi mudi mem matokishininga. Chilakej, kambuy Paul wafunda anch chikumangen cha in Kristu azizidilau many chifanyidin kwikal chishitwila ku mes ma Nzamb mudi ngachik wishitwila wa Kristu wachitokisha ‘nich kwov kwa mem ma dizu . . . , ikala zwang wakad ulim mudi muntu wakad chitaj.’ (Efes 5:25-27) Mu mivu ya pasak, Yesu wisambina pa usu ushitwilinga dizu dia Nzamb dialejanangay. Yesu wayileja in kwilej end anch: “En wikadilany kal zwang mulong wa malejan minakulejanya.” (Yoh. 15:3) Pakwez, uyakin wa dizu dia Nzamb ukwet usu wa kututokish ku mujimbu ni muspiritu. Chakwel Nzamb itiyija difukwil dietu, tufanyidin kwitiyij uyakin wa dizu diend utushitul.

16. Ov, mutapu ik tukutwisha kwilam ayinetu zwaang muspiritu ni mu manangu?

¹⁶ Kurutu twikala in mudimu wa kwangul, chakusambish tufanyidin kulik yisal yawonsu yijondila mu manangu ni muspiritu mu mwom wetu. Chakwel tudandamena kuwanyish yisend yiney, tufanyidin kusha chilakej chiwamp mu kukasikesh yijil ya muspiritu ni ya manangu yamushena ya Yehova. (Tang 1 Pita 1:14-16.) Mudi mutwikasikeshina kutokish mujimbu wetu, chawiy lel chifanyidin kand kuziyil ku chibachikin chitokishina cha dizu dia Nzamb dia uyakin. Chifanyidin kutang Bibil ni kukumangan ku yikumangen ya in Kristu. Chirumburikin kand kusal usu wa kashinsh mulong wa kusadil yivurish ya Nzamb mu mwom wetu. Kusal mwamu, kukez katukwash tutwisha kurish nich yibachikin yetu ya kusal chitil ni kujijamen yibachikin yijondila ya mangand minam. (Kus. 119:9; Jak. 1:21-25) Chakin, yitukasikeshin pitwijika kal anch ku ukwash wa Dizu dia Nzamb dia uyakin, tukutwish kwikal ‘ishitwila’ ku yitil ap anch yikalap nchik!​—1 Kor. 6:9-11.

17. Ov, chiyul ik chiletinau mu Bibil chitufanyidina kutesh mulong wa kwitokish?

¹⁷ Ov, witiyijining chakwel dizu dia Nzamb dia uyakin ditokisha mwom wey? Chilakej, ov, usandining nchik anch akubabesh mulong wa ubaj wa kwipuwangesh kuyimp kwa mangand minam? (Kus. 101:3) Ov, wipukining kuta urund wakad usey ni ambay a shikol ni ambay a kumudimu akad kwikal nich ritiy mudi riukweta? (1 Kor. 15:33) Ov, usadin usu ni muchim wey umwing mulong wa kupandakan uyimp wey ukutwisha kukusal wikala wijodila ku mes kwa Yehova? (Kol. 3:5) Ov, utwishining kwitek kulemp ni kupwitijan kwa chipolitik kwa mangand minam ni kwipuk spiritu wa kwibaz kwa wan-a-ngand udinga mu masengan mavud?​—Jak. 4:4.

18. Kwikal atokishinau muspiritu ni mu manangu kukez kutukwash mutapu ik kwikal antu a mudimu wa kwangul asongina mabuj?

¹⁸ Kuziyil kwey kushinshamena mu milong yiney kukez kakuletin yiyukish yiwamp. Pilikeja in kwilej end azizidilau many nich mitiy ya nviny, Yesu walonda anch: “Mutiy wawonsu wakad kusong mabuj ndiy ukuudiosh, ni mutiy wawonsu ukata kusong mabuj, ndiy ukata kuurijekin chakwel usonga mabuj mavud.” (Yoh. 15:2) Anch waziyil ku mem matokishina ma uyakin wa Bibil, ukez kasong mabuj mavud nakash.

Yiyukish ya Katat ni ya Machuku ma Kurutu

19. Ov, mutapu ik mwayiyukishau in kwilej a Yesu mulong wa usu wasalau mudi in mudimu wa kwangul?

¹⁹ In kwilej ashinshamena itiyija malejan ma Yesu, kupwa atambula spiritu utumbila pa dichuku dia Pentekot mu muvu wa 33 C.C. ikala atuman “djat kusudiedila mangand.” (Mid. 1:8) Antu amwing ikala yidi ya chisak chitakedila, akwau asala umishoner, amakurump in kwendangan, ni asala mudimu ukash mu kulejan rusangu ruwamp “kudi awonsu atangilau mwinshin mwa diur.” (Kol. 1:23) Yidi yiyukish mud ik yatambulau, ni musangar mud ik wayinkishau antu akwau!

20. (a) Ov, yiyukish ik watambula mulong wa kwipan nakash mu kwangul kwa muspiritu? (b) Ov, chom ik chiusotina kusal kamu?

²⁰ Mwaning, kusutil ku kumekesh kwitudish, mushiku, ni kukasikesh yijil ya usey ya Dizu dia Nzamb, tukez kadandamen kusanger mudimu ujim wa kwangul kwa muspiritu usadikina katat. Pamenau antu avud mar ni yakamish ya mangand minam ya kukimbijol yom ya kumujimbu ni mashakamin masangareshina, etu tumen musangar wakin, ni kusanger yom tukweta. (Kus. 126:6) Chidia cha usey ku yom yawonsu, chidi anch, “mudimu [utusadina] wa Nsalejetu Yesu kiudiap wa mwamu, bwat.” (1 Kor. 15:58) Mwant wa kwangul, Yehova Nzamb, ukez katuyukish chikupu mulong wa ‘mudimu wetu ap rukat tumekeshina mu dijin diend.’​—Heb. 6:10-12.

[Dizu didia kwishin kwa paj]

Ov, Ukutwish Kuvurik?

Piwikasikeshina kwipan nakash mu mudimu wa kwangul . . .

• mulong wak chidi cha usey kumekesh kwitudish?

• ov, mutapu ik ukutwisha kukudish ni kulam mushiku?

• ov, mulong wak chidi cha usey kushal ishitwila mu manangu ni muspiritu?

[Chipich chidia pa paj wa 25]

Kwitudish kutukwashin kwikal ni mashakamin maswapela mimedina pa yisakin ya Want