“Ov, En Ukwikalany Antu A Mutapu Ik?”

“Mulong yom yiney yawonsu yikez kasheshik mutapu winou, ov, en ukwikalany antu a mutapu ik? Chifanyidin en kwikalany nich mwom utumbila, wikalany kand ni kudandamen kudi Nzamb!”​—2 PITA 3:11.

1. Ov, mulong wak mukand wa kaad wa Pita wadinga dikasikesh dia pa chisu chifanyidina kudi in Kristu a pa chirung chend?

PAFUNDAY kambuy Pita mukand wend wa kaad upepidilau, chikumangen cha in Kristu chadinga chajijamana kal rupompat rikash, pakwez chinech kichaziyishap mushiku wach ni kuuchirish kwinyim. Chawiy lel Sakudimban wasadila mulad ukwau, umwing watwisha yisu yivud kurutu. Mudi muchilejenau kudi Pita, Satan wasota kuyijondish antu a Nzamb kusutil kudi alej a makasu adinga ni “yaku ya usund” ni “ris rau ra kupit.” (2 Pita 2:1-3, 14; Jud 4) Chawiy lel, mukand wa kaad wa Pita wadinga chakin kamu dikasikesh chakwel kushal ashinshamena kudi Nzamb.

2. Risu rutong ra 2 Pita shapitre 3, ni yipul ik tufanyidina kwiyipul ayinetu?

² Pita wafunda anch: “Am nitongil chidi chiwamp, pinichidia mu chikumbu chinech cha mujimbu, anch nikunilangwishany mu michim yen, ni kunitekimu chivurikish; mulong nij kal anch kudiokal kwam kwa mu chikumbu chinech kwez kal piswimp . . . nikulamatin kukulejany, chakwel mu chisu chawonsu ukutwish kuvurikany yom yiney yawonsu.” (2 Pita 1:13-15) Mwawiy, Pita wading wij anch rufu rend ridi piswimp, pakwez wasota anch yivurish yend yishala rawonsu. Ni chakin kamu yashala rawonsu, mulong tukutwish kuyitang nlel mu Bibil. Shapitre wa 3 wa mukand wa kaad wa Pita utumekeshidin kusanger kwa pakampwil, mulong wimedin pa “machuku ma kwisudiel” kwa ditenchik dia yom dia katat ni pa disheshik dia maur ni mangand ma chifanikesh. (2 Pita 3:3, 7, 10) Chiyul ik cha Pita chitufanyidina kuta muchim? Mutapu ik ukutwisha chiyul chend kutukwash kwitiyik kudi Yehova?

3, 4. (a) Yom ik yalonday Pita, ni kubabesh ik kwapanay? (b) Misu manans masatu tukeza kushinshikin?

³ Kupwa kwa kujimbul kusheshik kwa mangand ma Satan, Pita walonda anch: “Ov, en ukwikalany antu a mutapu ik? Chifanyidin en kwikalany nich mwom utumbila, wikalany kand ni kudandamen kudi Nzamb!” (2 Pita 3:11, 12) Chimeken kamu patok anch, ndiy kadingap ni kwipol yipul pakwez wading upanin uman. Pita wading wij anch ching kusu antu asadila rusot ra Yehova ni amekeshina ngikadil yimusangareshina Nzamb awiy akupanda ku “dichuku dia kufudakeshin” diezina (Isay 61:2, MN) Chawiy lel, kambuy uwejidinaku anch: “Arund nam, en wijikinany kal yom yiney, chawiy babalany, kangal akupumbulany nich kanrumbangesh ka[alej a makasu] antu ayimp, chakwel ushadishany ndond yen yiwiminyanya daang.”​—2 Pita 3:17.

⁴ Piur pa kwikal pakach pa antu ‘ija kurutu kwa chisu,’ Pita wading wij anch mu machuku ma kwisudiel, in Kristu afanyidin cha pakampwil kubabal chakwel kulam kushinshaman kwau. Kupwa, kambuy Yohan warumburila patok mulong wak. Ndiy wamana mu chishimu Satan amopatin mwiur ni “ujimen nakash” pantaliken ni antu “akata kuziyil yijil ya Nzamb, awiy kand akata kulejan uman wau anch, adi ayen a Kristu.” (Kuj. 12:9, 12, 17, MN) Azizidilau many ashinshamena kudi Nzamb pamwing ni ambay nau “amikoku akwau” ashinshamena akushiken ku kuwin. (Yoh. 10:16) Pakwez chidi nchik ku mutambu wetu muntu ni muntu? Ov, tukushal ashinshamena? Tukutwish anch twikasikesh: (1) kukudish ngikadil yimusangareshina Nzamb, (2) kushal pakad chitaj ni chilim mu ngikadil ni mu spiritu, ni (3) kwikal nich chitongijok chiwamp piur pa yoziu. El tushinshikinany milong yiney.

Kudish Ngikadil Yimusangarishina Nzamb

5, 6. Ov, ngikadil ik yitufanyidina kusal usu wa kukudish, ni mulong wak chitin ‘kwikasikesh’?

⁵ Kwinsambishil mu mukand wend wa kaad, Pita wafunda anch: “Mulong wa chom chinech, ikasikeshany chakwel uwejanyaku ku ritiy ren yaku yidia zwang, ni ku yaku yidia zwang wejanyaku ronganyin, ni ku ronganyin wejanyaku mutapu wa kwilam ayinen, ni ku mutapu wa kwilam ayiney wejanyaku kudandamen, ni ku kudandamen wejanyaku rukat ra anamakwen in Kristu, ni ku rukat riner wejanyaku kand rukat ra antu awonsu. En umwonganyidinanya Nsalejetu Yesu Kristu anch ukwetany yom yiney yivud yikukukwashany kusal mudimu wa Nzamb wakad usweral.”​—2 Pita 1:5-8.

⁶ Chakin, chitin ‘kwikasikesh’ chakwel kwipan mu mijikit yitukwashina kukudish ngikadil yimusangareshina Nzamb. Chilakej, chitin kusal usu chakwel kukumangan ku yikumangen yawonsu ya in Kristu, kutang Bibil dichuku ni dichuku, ni kulam program muwamp wa muntu ipend wa kwilej. Ni chikutwish kwit mudimu ukash ni kutenchik kuwamp chakwel kwikal nich dilejan dia dijuku diakad kujing, diwamp ni dia ukwash. Pakwez twadandamen kuchirikinamu, chikuswapel kwikal ni chaku chiwamp​—pakampwil pitupakina ku yiyukish.

7, 8. (a) Ov, antu amwing alonda nchik piur pa Difukwil dia Dijuku dia urel? (b) Mutapu ik ukata kutambul ukwash udiokila ku difukwil dia dijuku dien?

⁷ Piur pa difukwil dia dijuku, nambaz umwing wafunda anch: “Ditukwashin kwilej mitu ya milong yivud.” Nambaz mukwau walonda anch: “Chakin kamu, nova nayimp palondau anch kwikil kand dilejan dia Buku. Chadinga chikumangan chinakatisha nakash. Pakwez katat, nich difukwil dia dijuku dia urel, najingunin kal anch Yehova wij yom yituswiridina ni chisu tuyiswiridina.” Mutu umwing wa dijuku walonda anch: “Difukwil dia mu dijuku ditukwashin nakash. Kwikal nich chikumangan chambatena ni maswir kanang metu mudi ambay a uruw chidi chom chisangareshina nakash! Twiyovil etu awonsu aad anch tumekeshin dibuj dia spiritu utumbila, ni kand kal tutanap musangar upandakenamu mudi winou mu mudimu wetu wa kulejan.” Mutu ukwau wa dijuku ulondin anch: “An akat kukimbijol mu mikand ayinau ni kwilej yom yivud nakash​—ni asangaredin chinech. Ditenchik dined ditwinkishin kashinsh nakash anch Yehova wij maswir metu ni wakwil ku malembil metu.” Ov mwamu muwovila niyey piur pa ditenchik dined dia muspiritu didiokila kudiay Nzamb?

⁸ Kangal walikidil tuyom tukemp tukangesha difukwil dia dijuku. Ambay a uruw amwing alonda anch, “Diakanying diawonsu uchuku mu jimbing jinying jasuta, chom chimwing chashikena mu dijuku dietu chela kutushikij ku kwimik yisu kanang kwilej kwetu, pakwez ap mwamu kitwalikidilap chakwel chitukangesha.” Choviken, yisu yimwing anch ukutwishany wijikishany yisu ya kwilej. Pakwez, ikalany nich chiyul cha kulik kwimik Difukwil dia dijuku dien, ap kusu rubing rimwing!

9. Ov, mutapu ik wakwashau Jeremiy kudiay Yehova, ni chom ik tukutwisha kwilejin ku chilakej chend?

⁹ Muprofet Jeremiy udi chilakej chiwamp mulong wetwetu. Wading uswiridin yakudia ya muspiritu yidiokila kudi Yehova ni wayisenda nich usey ujim nakash. Yakudia yiney yamukwasha kujijaman mukuyilej antu akad kusanger. Ndiy walonda anch: ‘Mazu ma Yehova makat kwinswanish mu muchim mudi kasu.’ (Jer. 20:8, 9) Chakudia chinech chamukwasha kujijaman yisu yikash yashikena ku kusheshik kwa Yerusalem. Tukwet nlel dizu diawonsu difundilau dia Nzamb. Anch twadilej nich mushiku ni twasadil yitongijok ya Nzamb, mudi Jeremiy, tukutwish kujijaman nich musangar mu mudimu, kushal ashinshamena mu yoziu, ni kushal ishitwila mu mwikadil ni muspiritu.​—Jak. 5:10.

Tushalany “Zwang Wakad Kufa Nich”

10, 11. Mulong wak tufanyidin kusal usu chakwel kushal “zwang wakad kufa nich,” ni chinech chitwitin kusal yik?

¹⁰ Chitudia in Kristu, twij anch tushich mu machuku ma kwisudiel. Chawiy lel, tukashimukinap anch mangand makatishin nakash yom yikisinay Yehova, mudi maku ma kupit, masandj mayimp, ni chisum. Mipit ya Satan yikutwish kwijikan mu wiswimp mu mulad unou: ‘Anch atushalapol a Nzamb kakutwishap kuyovish wom, pamwing ap kakutwishap kwikal ajondishinau.’ (Kuj. 2:13, 14) Chawiy lel, tufanyidin kuta muchim ku chibabesh cha rukat cha Pita: “Salany usu wa kwikal zwang wakad kufa nich kurutu kwa Nzamb, ikalany nich chisambu.”​—2 Pita 3:14.

¹¹ Dizu “Salany usu” difaniken nich chibabesh cha Pita cha kwinsambishil anch tufanyidin ‘kwikasikesh.’ Chakin, Yehova​—ndiy wamupepila Pita nich spiritu chakwel amekesha yovil yiney—​ni wij anch tuswiridin kusal usu ayinetu chakwel kushal “wakad kufa nich,” chakwel kangal twijondish nich malau ma mangand ma Satan. Ku kusal usu ayinetu kwiwejidinaku kulam muchim wetu chakwel kangal wawa mu maku mayimp. (Tang Jinswir 4:23; Jakob 1:14, 15.) Kwitin kand kushal ajijamena pantaliken ni antu ashimokina piur pa mulad wa mwom wetu in Kristu ni “akat kukusalany [kutusal].”​—1 Pita 4:4.

12. Kuchingejin ik tutanina mu Luka 11:13?

¹² Mulong wa kuburen kuwanyin kwetu, chitin kurish chakwel kusal yom yiwamp. (Rom 7:21-25) Tukutwish kuchingejin kuwin ching anch twamukungamen Yehova, ukata kupan spiritu utumbila kudi antu akata kukwit nich kashinsh. (Luka 11:13) Spiritu winou, ukat kukudish mu muchim wetu ngikadil yikatilay Nzamb ni yitukwashinap kurish ching kusu nich yoziu ya mwom pakwez yikokujol yidandamedina kuvulijan payila ni kushej piswimp dichuku dia Yehova.

Sal Chakwel Yoziu Yikukasikesha

13. Pitushikedila yoziu mu mwom wetu, ov, chom ik chikutukwasha kujijaman?

¹³ Pituchishina mu ditenchik dined dikur dia yom, yoziu ya milad kushalijan yikutushiken. Pakwez pandond ya kuziy, mulong wak tukutwishap kuman yoziu yiney mudi mutapu wa kumekesh rukat rey mulong wa Nzamb ni kukasikesh rukat rey mudiay ndiy ni mu Dizu diend? Mwin kwilej Jakob wafunda anch: “Chindany yawonsu musangar piukumanany kupak kwa yoziu; ijikany anch kupak kwa ritiy ren ku kukutwalany mu kukasikan. Itiyijany kashinsh kawanyidina kusal mudimu, chakwel wikalany awanyidina ni akash, akad kuburen chom.” (Jak. 1:2-4) Chikwau kand, kangal wavuramenany anch Yehova “wij mutapu wa kuyikamunin mu mar antwend atumbila.”​—2 Pita 2:9.

14. Ov, chilakej cha Josef chikukasikeshin ey mutapu ik?

¹⁴ Tushinshikinany bil chilakej cha Josef mwan wa Jakob, walandishau kwikal muswik kudi ayayend. (Dis. 37:23-28; 42:21) Ov, Josef washadisha ritiy rend mulong wa chisal chiyimp nakash chamusalau? Ov, wamujimena Nzamb mulong walikidila uyimp winou umushikena? Dizu dia Nzamb diakwil patok anch bwat! Chikwau kand, yiney yadingap nsudiel ya yoziu ya Josef. Kupwa, amudimbena anch wasotin ku usu mband wayen ni amudjibula mu rukan. Pinap kand, washala ujijamena mu kwipan kwend kudi Nzamb. (Dis. 39:9-21) Wasala chakwel yoziu yimukasikeha nakash, ni yiney yamuletina yiyukish yivud.

15. Chom ik tukutwisha kwilejin kusutil ku chilakej cha Nawom?

¹⁵ Chakin, yoziu yikutwish yatunenganesh ap kutuziyish. Pamwing ap Josef wiyova mutapu winou yisu yimwing. Atushalapol ashinshamena akwau chakin kamu iyova mwamu. Shinshikin piur pa Nawom, wafisha nfumwend ni anend amakundj aad. Ndiy walonda anch: “Kangal wantazukany kand pa dijin dia Nawom,” anch “Ntazukany anch Mara [charumburik “Ntany”], mulong Nzamb wa dikand diawonsu wantanyishin kal.” (Rut 1:20, 21, MN) Kwakul kwa Nawom kwading kovikena. Mudi Josef, kashadishap ritiy rend ni urund wend nend Nzamb. Yehova, niyend wamuyukisha mband winou wa usey. (Rut 4:13-17, 22) Mu paradis wezina, ukez kutenchik uyimp wawonsu usadilay Satan ni mangand mend mayimp. “Yom yawonsu ya pakur akez kayivuramen.”​—Isay 65:17.

16. Ov, tufanyidin kwikal nich chitongijok ik piur pa malembil?

¹⁶ Yikalap nchik yoziu yikutwisha kutushiken, rukat ra Nzamb ridiaku mulong wa kutukwash. (Tang Rom 8:35-39.) Ap mwamu Satan kakezap kulik kutupak mulong wa kutuziyish, ukukangany anch twashal akweta “muchim wa ronganyin” ni “kulamatin ku kulembil.” (1 Pita 4:7) Yesu walonda anch: “Chishany ku mes, lembilany yisu yawonsu chakwel wez uresikany ku yom yiney yawonsu piyikumekana, chad wez wimanany kurutu kwa Mwan a Muntu.” (Luka 21:36, MN) Yesu usadidil dizu “lembilany,” chirumburikina kulembil kwa mushiku. Pitukasikeshinay kulembil, Yesu ukasikeshidin anch chinech chawiy chisu cha kusend nich usey ukash mwikadil wetu kurutu kwend ni kwa Tatukwend. Ching kusu antu akwikal mu mwikadil wa kwitiy awiy akeza kuchingejin kupand pa dichuku dia Yehova.

Dandamenany Kusal mu Mudimu wa Yehova

17. Anch kulejan kwen mu teritwar kukasiken, ov, mutapu ik ukutwisha kutambul ukwash udiokila ku chilakej chiwamp cha aprofet a pasak?

¹⁷ Kwipan mu mijikit yikwatijadina ni difukwil dietu kutukasikeshin. Chinech chituvurishin mazu ma Pita anch: “Ov, en ukwikalany antu a mutapu ik? Chifanyidin en kwikalany nich mwom utumbila, wikalany kand ni kudandamen kudi Nzamb!” (2 Pita 3:11) Kulejan rusangu ruwamp chawiy chom cha usey pakach pa yisal yiney. (Mat. 24:14) Chakin, mu materitwar mamwing chiswapelap kusal mudimu wa kulejan, pamwing ap mulong wa kuburen kusanger ap rupompat ap mulong kusu antu akwatiken nakash ni yakamish ya mwom ya dichuku ni dichuku. Atushalapol a Yehova a pasak arisha nich yikokujol ya chilik chimwing. Pakwez, kalikap ap pakemp, adandamena kuchirikinamu ‘kakwau ni kakwau’ nich rusangu rayinkishay Nzamb. (Tang 2 Jinsangu 36:15, 16; Jer. 7:24-26) Chom ik chayikwasha chakwel ajijamana? Ading amen mudimu wau mudi muumenau kudi Yehova amwinend, kaumenap mudi muumenau mangand. Chikwau kand, ading amen anch kusend dijin dia Nzamb didi katumb kajim.​—Jer. 15:16.

18. Ov, mutapu ik ukeza mudimu wa kulejan Want kutumbish dijin dia Nzamb?

¹⁸ Tukwet niyetu chisend cha kulejan dijin dia Yehova ni rutong rend. Tongijokin bil pa chinech, mudi chibudikin cha kapamp kamwing cha mudimu wetu wa kulejan, akankuny a Nzamb kakutwishap kulond anch kijap chom pa kupan kuchind kudiay ndiy pa dichuku diend dijim. Chakin, mudi faraon wa pasak, akez kwijik anch Yehova ndiy uyijipina. (Kub. 8:1, 20; 14:25) Pa chisu chawiy chimwing, Yehova ukuyitumbish atushalapol end ashinshamena kusutil ku kumekesh patok anch ading chakin antimesh end.​—Tang Ezekiel 2:5; 33:33.

19. Mutapu ik tukutwisha kumekesh anch tusotin kusadil nawamp kushimpish muchim kwa Yehova?

¹⁹ Kwinsudiel kwa mukand wend wakaad, Pita wayifundila ambay nend akaritiy anch: “Chindany kushimpish muchim kwa Mwant wetu kwawiy dipandish.” (2 Pita 3:15) Mwawiy, tudandamenany kusadil nawamp kushimpish muchim kwa Yehova. Mutapu ik? Kusutil ku kukudish ngikadil yimusangareshina, kusutil ku kushal “zwang wakad kufa nich,” kusutil ku kwikal nich chitongijok chiwamp piur pa yoziu, ni kusutil ku kukwatikan mu mudimu wa Want. Anch twasal mwamu, tukutambul yiyukish ya chikupu yikwatiken nich “maur masu ni mangand masu.”​—2 Pita 3:13.

Ov, Ukutwish Kuvurik?

• Mutapu ik tukutwisha kukudish ngikadil yimusangareshina Nzamb?

• Mutapu ik tukutwisha kushal “zwang wakad kufa nich”?

• Chom ik tukutwisha kwilejin kudiay Josef ni Nawom?

• Mulong wak kwipan mu mudimu wa kulejan chidi chisend chijim?

[Chipich chidia pa paj wa 21]

Chom ik chikeza kukukwashany en angatan chakwel ukudishany ngikadil yimusangareshina Nzamb ni majuku men?

[Yipich yidia pa paj wa 23]

Yom ik tukutwisha kwilejin ku mutapu warishay Josef nich yoziu?