Tusalany Nakash Mudimu wa Kwangul
1 A profet a Yehova a pakur ni Yesu Kristu amwinend alondina piur pa mudimu wa kukumangej. (Isa. 56:8, New World Translation; Ezek. 34:11, NW; Yohan 10:16) Mudimu mud winou akat kuusal katat palejenau rusangu ruwamp ra Want mu mangand mawonsu. (Mat. 24:14) Kushalijan pakach pa antu amusadidila Nzamb ni antu alikina kumusadil kukat kumekan nawamp kamu. (Mal. 3:18, NW) Ov chinech chirumburikin ik kud etu?
2 Chisend Cha Muntu ni Muntu: Tukutwish kwilejin ku chilikej cha Paul, muntu wadinga ni midimu yivud ya kuwanyish mu kutakel kwa mudimu wa win Kristu. Wiyova kwikal ni dibaz dia chisend cha kulejan chakwel antu awonsu ikala ni mutapu wa kutesh rusangu ruwamp ni kukolik. Chinech chamubachika kusal mudimu pakad kuziy mulong wa kuyikwash. (Rom 1:14-17) Pa kuman mwikadil ukash ushikedina antu nlel, ov tukwetap chisend chijim cha kulejan kud antu adia mu teritwar wetu?—1 Kor. 9:16.
3 Chawiy Chisu Cha Kusal Swa: Mudimu wa kulejan tukutwish kuwisikesh nich mudimu wa kukimb ni kukol antu ashadikina. Tufanyidin kwijik ndond yidia antu ni kuyikwash kuman kwa kwikangin kurutu chikala cha kucheleu nakash. Chisu chidi chikemp. Miom yidi mu chak! Chidiap cha kushimok anch Yesu wayileja in kwilej end anch “mulembilany mwin chir chakwel ukutum in mudimu wa kwangul avud.”—Mat. 9:38.
4 Chijinguninau kuswakej kwinoku nlel, in kusal mudimu wa Want avud awejidinaku mudimu wau mu mujikit winou upandishina mwom. Nsand umwing (wa dikum dia mivu) ukweta dijin dia Hirohisa wading ushich mu dijuku dia nvaj umwing nau anamakwend amakundj ni amband anying. Wading ni kukwash dijuku diau nich kulank pamanch nakash pa ndemb wa kusambish ni kuyan ni kwangan majurnal. Ap mwamu, Hirohisa wasota kusal yivud mu mudimu wa kulejan, chawiy wasambisha mudimu wa chibol wa rawonsu. Ov kudi mitapu yiukutwisha kusal nakash mudimu winou wakad kand kwez kuchirik?
5 “Chisu chakep kal.” (1 Kor. 7:29) Chawiy lel, tusalany yawonsu tukutwisha mu mudimu winou wa usey usadilau mu mangand mawonsu nlel—kulejanang rusangu ruwamp ra Want ni kwikadish in kwilej. Yesu wafanikesha mudimu winou nich mudimu wa kwangul. (Mat. 9:35-38) Anch twasal nakash mudimu wa kwangul, mabuj ma mudimu wetu makutwish kumukwash muntu kwikal ku mutambu wa runtu ruvud ra in kumwifukwil rujimbwilau mu Kujingunik 7:9, 10.