Itekina Rutong ra Kutakel Dilejan Dia Bibil
1 “Zambulany mes, utalany pa yingand, yawiy yatokang kal, yashikenang kal pa kwangul.” (Yohan 4:35) Mazu minam malondau kudi Yesu madi chakin kamu ma kusadil ku mwikadil urishinau nich atushalapol in Kristu nlel unou.
2 Antu a michim yiwamp asotina kwilej jinjil ja Yehova adandamedin kumekan. Yiney yimeken ku uvud wa in kwilej asu akatau kubabatish muvu ni muvu. Anch usangeridin chakin kamu kutakel dilejan dia Bibil, ov, ufanyidin kusal ik?
3 Itekina Rutong: Chakusambish, itekina rutong ra kusambish ni kutakel dilejan dia Bibil diakad kujing. Lam rutong rey mu manangu piukata kwipan mu mudimu wa chingand. Mulong mudimu wetu wa win Kristu udi wa kulejan, etu awonsu tufanyidin kupandikesh yisu tusadina mu mudimu wa kutakel dilejan dia Bibil.—Mat 24:14; 28:19, 20.
4 Manans Makwau Mafanyidina Kulam mu Manangu: In kulejan Want afanyidin kulembil nich muchim utok. Yisu yimwing tutanining antu akata kulembil mulong wa kutan ukwash wa muspiritu. Chidi chiyukish mud ik kwikal asadidilau kudi Yehova mulong wa kuyitan ni kuyilej antu mudi inay!—Hag. 2:7; Midimu 10:1, 2.
5 Nambaz umwing wading ukat kulembil chakwel ikala nich dilejan dia Bibil kupwa wasambisha kupan ma trakt Aimeriez-vous en savoir plus sur la Bible ? kwi ndond yend ya mudimu. Chasendau tract umwing kudi mband umwing, ndiy wamutanga mwawonsu, ni wasambisha kwizwish kupon, chad nambaz wamuleja anch ukutwish wasambish nend dilejan dia Bibil.
6 Ambay in kulejan atwishina kusambish ni kutakel malejan ma Bibil akutwish kukukwash chakwel uwanyisha rutong rey ra kutakel dilejan dia Bibil. Mulembila Nzamb piur pa usu usadila chakwel kukimb muntu wa kwilej ney Bibil ni isakina ukwash wawonsu udiaku chakwel uwanyisha rutong rey. Pamwing ap ukuman musangar wa kutakel dilejan dia Bibil.