Kuvurik Difut Nich Kujikitish
1, 2. Mulong wak tufanyidin kuvurik difut nich kujikitish?
1 Pakatau kuziyil kwi mbil ya Yesu, in Kristu mu mangand mawonsu akukumangan Diampos kupwa kwa muten kwandam, pa Rish 22, 2008, chakwel avurika rufu ra Yesu Kristu. (Luka 22:19; 1 Kor. 11:23-26) Tusotin tusala mwamu mulong tujikitishin nakash mulong wa yawonsu yasadika pasutin kal mivu 1975. Mu kulam kushinshaman kuwanyidina kusutil ku rufu risansena pa mutond wa mar, Yesu watumbisha dijin dia Tatukwend, wapan chakul chiwanyidina ku masal ma Satan.—Yob 1:11; Jinsw. 27:11.
2 Mash ma Yesu michika makasikesha kwitiyik kwa manswik masu, kwayitwishisha antu akad kuwanyin kwikal an a Nzamb nich ruchingej ra kuyikel pamwing ni Kristu mudi ant mu Want wa mwiur. (Yer. 31:31-34; Mar. 14:24) Chikwau kand, rukat ripandikena ra Nzamb mulong wa antu ramekana patok papanay Mwanend mukatish mudi chakupesh, mudi mwarumburilay Yesu amwinend kudi Nikodem.—Yoh. 3:16.
3. Mutapu ik ukutwishau kutaninamu antu akumangena ku Chivurikish?
3 Yiladikija Antu Akwau: Nimero wa Chiwong wa Mudimu Wetu wa Want wita kusal dipang dia antu twijikijadina nau ni kupan mapaper ma diladikij kudi muntu ni muntu. Ov, wasambishin kal kuyitazuk antu adia pa dipang diey? Ov, watenchikin kal yom chakwel wipana nakash mu kampany ukusambisha pa Rish 1 mulong wa kuyitazuk antu ku Chivurikish? Antu akumangena akutesh jinsangu jidia mu Bibil jikutwisha kutung ritiy piur pa difut, rikeza kuyitwal ku mwom wa chikupu.—Rome 10:17.
4. Mulong wak tufanyidin kushik kurutu kwa saa ku Chivurikish?
4 Antu awonsu atwishina afanyidin kushik kurutu kwa saa chakwel ayaka nich chirungul antu itiyijina diladikij dia pakampwil. Kukumangan kwa antu avud ku Chivurikish ku kutukasikeshin chakwel tuyishinshikina pakampwil antu asu ni akwau akata kukumanganang chisu ni chisu.
5. Mutapu ik ukutwisha kurijek muchim wey pa chisu chinech?
5 Rijek Muchim Wey: Examinons les Écritures chaque jour — 2008 ni Calendrier wa muvu wa 2008 ukwet program wa kutang kwa Bibil kwa pakampwil pa chirung cha Chivurikish ukusambish pa Rish 17. Anch washinshikin pa usey wa yinship yashikena mu machuku mansudiel ma mwom wa Yesu pa divu yikukukwash urijeka muchim wey mulong wa Chivurikish. (Ezra 7:10) Kutongijokin kusutil mu malembil pa jinsangu jinej ja Bibil ku kupandikesh kusanger kwey mulong wa rukat ra Yehova ni Mwanend wapana difut.—Kus. 143:5.
6. Mutapu ik tukutunga kujikitish chakwel difut dikala ni usu padi etu?
6 Pichishejidina piswimp Chivurikish, twirijekany ayinetu ni kuyikwash antu akwau kwirijek nawamp mulong wa chisu chinech cha usey. Mu kuvurik difut nich kujikitish tukez kukasikesh urund wetu ni Yehova ni Mwanend. (2 Kor. 5:14, 15) Dikez kand kutubachik tuyimburij mu kumekesh rukat ra kwipan kudi antu akwau.—1 Yoh. 4:11.