Mutapu wa Kupan Dipaper dia Diladikij dia Chivurikish mu Mangand Mawonsu!
1. Kampany ik wa pakampwil ukeza kusadik mangand mawonsu kurutu kwa chivurikish?
1 “Ukez kusalangany mwamu mulong wa kwinvurik am.” (Luka 22:19, MM) Mu kuziyil mbil yiney yidiokidila kudiay Yesu, in kwifukwil a Yehova akez kukumangan ni antu asangaredina pa Rish 30, 2010, chakwel avurik rufu ra Yesu. Kampany wa kupan dipaper dia diladikij dia chivurikish mu mangand mawonsu ukez kusambish pa Rish 13 ni ukez kupwa pa Rish 30.
2. Mutapu ik ukupanany mapaper ma diladikij?
2 Mutapu wa Kudisadil: Ukutwish wamwinkish mwin chikumbu dipaper dia diladikij ku chikas chakwel amana yom yidiamu, ni kupwa lond anch: “Urel wa pa Rish 30, ma miliyon ma antu a mangand mawonsu akez kukumangan chakwel asala chivurikish cha rufu ra Yesu. Chawiy, nez kal panap kukwinkish ey ni dijuku diey dipaper dia diladikij dined chakwel wezany tukumanganany. Ni arund ney kand akutwish kwikalaku. Lejan amboku chisu ni ndond yikeza kusadikin chivurikish chinech.” Kukwatijan nich mashakamin mend, ukutwish watang Mufund wa mu Luka 22:19 mu Bibil chakwel ulejan mbil yiney yidiamu. Tufanyidin kulond mu wiswimp mulong tukwet chisu chikemp cha kuwanyish teritwar wetu.
3. Muntu ik ukutwishanya kutazuk?
3 Anch chikumangen chen chikwet teritwar mujim, amakurump akutwish itiyij chakwel in kulejan asha ku yikumbu kwakad antu mapaper minam ma diladikij pabudikinau dichuku dia kusambish. Pa chisu chitwishikina, ukutwish wapanany magazet pamwing ni mapaper ma diladikij. Ikal nich kashinsh anch ukuyichirikin antu watazukina: in kwilej a Bibil, ambay ney a mudimu, arund ney a ku shikol, anamakwey a ku mujimbu, amutej ney, pamwing nau antu akwau.
4. Kusanger rukat ra Yehova piur pa difut kukez kutubachik kusal ik?
4 Irijekany ku Kwipan Nakash: Chisu cha chivurikish chidi chisu chipandakena kuwap chakwel tujimbish mujikit wetu. Ov, ukutwish watenchik program wey chakwel wikal chibol nkwash? Ov, ukwet an ap in kwilej Bibil ayila nawamp kurutu muspiritu? Anch mwamu, yileja amakurump atala anch kudi antu asu ayifuvu chakwel inunga mu kampany winou wa pakampwil mudi in kulejan akad kubabatishiu. Kusanger rukat ra Yehova piur pa difut kukezap kutubachik chakwel twikalaku dichuku dia chivurikish kusu pakwez tutazuka kand antu avud inunga netu chakwel tukumangana nau.—Yoh. 3:16.