Kampany wa Pakampwil Mulong wa Kwijikish Chivurikish!

1. In kulejan a Want akez kukwatikan mu mangand mawonsu nich mudimu ik kusambishil pa Rish 21, 2009, ni mulong wak?

¹ Pa Diakanying, Ndol 9, 2009, in kumwifukwil Yehova Nzamb mu mangand mawonsu akez kukumangan mu kutongijokin pa chisal cha rukat chipandakena kujimb mulong wa antu. (Rome 5:6-8) Tuchingejin anch kukez kwikal mamiliyon ma antu asangaredina akeza kwinung netu pitukeza kuvurik rufu ra Yesu. Tukez kwangan pa mangand mawonsu diladikij dia pakampwil dia Chivurikish kusambishil pa Rish 21.

2. Manans ik ufanyidina kulam mu manangu pa chisu upanina diladikij?

² Manans ma Kulam mu Manangu: Sadilany nawamp yipich, yipul, ni mufund ujimbwilau pa diladikij. Chilakej, ukutwish wisambinany chipich chidia pa chibur ni kulond anch: “Nikutazukin weza kuvurik pamwing netu rufu ra Yesu, chikeza kusadik Diakanying, Ndol 9, 2009.” Kupwa isambinany pa mutu wa mulong wa diladikij ni yipul yidiap. Shinshikinany anch wamukasikeshany kal mwin chikumbu chakwel eza ni dijuku diend ni antu akwau akutwisha kutond.

3. Mutapu ik ukutwisha kulondul kusanger piur pa diladikij wapaninanya kwisambishil kwa kampany?

³ Anch chikumangen chen chikwet teritwar mujim, amakurump akutwish akulejany kusha diladikij ku yikumbu ya antu akad kwikalaku. Pa Diampos ni Diarubing, panany magazet pamwing ni diladikij. Itekina rutong ra kuyitazuk antu ukata kuchirikin, in kwilej Bibil, anamakwey, ambay ney a ku shikol, ambay ney a ku mudimu, amutej ney, ni antu akwau wijikijadina nau. Muvu wadiap ou, nambaz umwing wayitazuka anamakwend 30 ni wayivurishanga chisu ni chisu usey wa chinship chinech. Wasangara nakash pa kuyiman anamakwend 25 akumangan, ni pa kusut kwa chisu 4 asambisha kwilej Bibil!

4. Kwirijek ik kutufanyidina kusal katat, ni mulong wak?

⁴ Irijekany Katat: In kulejan avud akutwish avudish mudimu wau pa chirung cha Rish ni Ndol. Anch ukwet an ap in kwilej ney Bibil ayila nawamp kurutu, chirung chinech chikutwish chikal chisu chiwamp kudi awiy cha kwikal in kulejan akad kubabatishiu. Katat chawiy chisu cha kusambish kwirijek chakwel kusal nakash mudimu mu kampany wa kulejan chivurikish cha yisal yaad yijim ya rukat.—Yoh. 3:16; 15:13.