Yileja Antu Akwau Kumukat Yehova
1. Yom ik yikata kuyipwitin antu amwing kudiay Yehova?
1 Ov, uvurikin kapamp ka kusambish kawatesha piur pa Yehova? Ov, chom ik chakupwitina kudiay ndiy? Antu avud akin akukulej anch pilejau ngikadil yend yijim nakash, pakampwil riy ni rukat rend, chawiy chom chayipwitina piswimp ni Sakatang.—1 Yoh. 4:8.
2, 3. Ov, mutapu ik tukutwisha kusadil buku Chifundishinay Bibil mulong wa kuyikwash in kwilej Bibil chakwel amukata nakash Yehova?
2 “Ndiy Udi Nzamb Wetu”: Buku Chifundishinay Bibil wisambidin nakash-nakash pa rukat ra Yehova ni maswir ma muntu ni muntu ma kwikal nich urund ni ndiy. Ov, mutapu ik tukumusadina buku winou mulong wa kuyilej antu akwau chakwel amukata nakash Nzamb? Pa chisu chitwisambidina pa mulong usu, tukutwish twipul yipul yikutwisha yamutongish mwin kwilej, chilakej mudi: “Ov, uyakin winou ulejen ik piur pa Yehova?” ap “Mwi njil ik dinans dined diletin uman anch Yehova udi Tatuku upandakenamu kuwap usotinay muntu ni muntu?” Kulejan mu mutapu winou kukutwish kwamukwash mwin kwilej ata urund wa chikupu ni Yehova.
3 Pituyikwashina in kwilej Bibil asangera dilau ditapidilau dia kwijik ronganyin ra Nzamb umwing kusu wakin ni udi mwom, akez kwitiyij, mudi mwalonday Isay anch: “Ndiy udi Nzamb wetu!” (Isay 25:9) Chisu turumburila Dizu dia Nzamb, tuswiridin kukasikeshin mutapu ukezau kuyiyukish antu pakeza kuwanyin yakushilamu ya Yehova kusutil ku want wend ushinshamena ukutakelay Kristu Yesu.—Isay 9:6, 7.
4, 5. Chirumburikin ik kumukat Yehova?
4 Uman wa Kumukat Yehova: Twij anch kumukat Yehova nich muchim wawonsu, nich mupim wawonsu, ni manangu mawonsu kwitin yom yivud kupandakanamu kwau kwikal nich yovil yikash mulong wa Nzamb. Tukushiken ku kwitiyij ni kulondul mutapu wend wa kutong. (Kus. 97:10) Kumukat Nzamb kumekening kusutil ku kuziyil kamu mbil jend ni kudandamen ku kusal “yom yiwamp ni yom yawonsu yitumbila,” ap anch kudi yoziu ni rupompat.—2 Pita 3:11; 2 Yoh. 6.
5 Chisangareshin kusal rusot ra Nzamb nich rukat. (Kus. 40:8) Mwin kwilej Bibil ufanyidin kwijik anch mbil ya Nzamb ayitenchika mulong wa mwom wa chikupu wa atushalapol End. (Kuv. 10:12, 13) Muntu ushicha kulondulijan nich umutakel wa Yehova, ulejen anch usangaredin nakash midimu Yend yawonsu yishimokishina. Mukwasha mwin kwilej atesha anch kwendil mu jinjil jitentamina ja Yehova kukez kumuchidij mu mar makash.
6. Yiyukish ik yikutwishay muntu kutambul mulong wa kumukat kwend Yehova?
6 Yiyukish ya Antu Amukatina Nzamb: Yehova uyibangidin nakash antu ikepishina amukatina, ni uyijingunidin “yom ya Nzamb yikurikina.” (1 Kor. 2:9, 10) Anch ikal nich ronganyin riner ra jintong ja Yehova, akwikal nich ruchingej ra zwang mulong wa machuku ma kurutu. (Yer. 29:11) Antu amukatina Yehova akat kutan riy rend. (Kub. 20:6) Akatin ruchingej ra mwom wa chikupu mulong Nzamb uyikatin nakash.—Yoh. 3:16.
7. Ov, wiyoviling nchik pa kuyilej antu akwau chakwel amukata Yehova?
7 Mu chilik tukumwijika nakash Tatukwetu wa mwiur, chawiy kand tufanyidina kuyilej antu akwau. (Mat. 13:52) Kudi kwitapil dilau dijim mudi ik dia kuyilej antu akwau, ni pakampwil anetu, chakwel amukata Yehova! (Kuv. 6:5-7) Etu awonsu, pamwing ni antu twilejina nau Bibil, tudandamenany kumushiman nakash pitumena ‘kuvul kwa kuwap kwa Yehova.’—Kus. 145:7.