Yakul Ku Yipul Yen

◼ Anch antu asotina kwatijan akimb anch ayisadil diskur dia uruw wau mu Chot cha Want, ov, yom ik yifanyidinau kwisamb ni amakurump?

Mauruw matenchikinau kukwatijan nich yijil yidia mu Bibil makat kumulimish Yehova. Chom chinech chidi chakin pakampwil piur pa madiskur ma uruw makatau kusadil mu Chot cha Want, mulong antu awonsu amening maprogram minam masadikidina ku Chot cha Want mudi chikunku cha dirijek dietu. Chawiy lel chakwel anch “yom yawonsu ayisala mu kuwanyin ni mu kufanyin,” chiwapidil anch amakurump a chikumangen akwatikana pa chisu chitinau Chot cha Want mulong wa kusadilamu diskur dia uruw.—1 Kor. 14:40.

Antu asotina kwatijan ni asotila kusadil diskur dia uruw wau mu Chot cha Want afanyidin kufund mukand wa kuchit ku komite wa mudimu wa chikumangen chikata kusadil chot chinech. Chiyifanyidin kutum mukand kurutu kwa chisu ni kwijikish machuku ma ngond ni chisu chikusotau kusadil chot. Afanyidin kwijik anch amakurump kafanyidinap kushemunin program wa chikumangan mulong wa diskur dia uruw. Chikwau, ngatan ni ngachik afanyidin kwikal nich mashakamin mawamp, kushakam kukwatijan nich yijidik yidia mu Bibil pamwing ni yijil yitentamina ya Yehova.

Chakwel kwijik anch uruw umuletidin Nzamb kalimish, antu asotina kwatijan afanyidin kwambamb ni komite wa mudimu piur pa yitenchik ya uruw kurutu kwa kukwat mipak. Ap anch amakurump kafanyidinap kuyishindil yitongijok yau padi antu asotina kwatijan, pakwez anch kudi chom kampand chakad kufanyin, chad lel afanyidin kutenchik. Ching kusu mizik yidia mu Melodie du Royaume ap mu buku wetu wa miminy yawiy yifanyidinau kusadil. Chifanyidin kuyinkish mbil ya kurijek ni kutekol yisalamb mu Chot cha Want ap kurijek kand yitwam. Anch kukwikal kukwat yipich pa kukwat yipich ni mazu nich video, yom yiney kiyifanyidinap kurumbangesh kalimish pa chisu chinech. Amakurump akutwish ayinkish mbil ya kwiyijidishin ku Chot cha Want ching anch kukutwishap kwarumbangesh yitenchik yikwau ya chikumangen. Kichifanyidinap kutek dipaper dia diladikij ku tablo wa yijikish. Pakwez, amakurump akutwish alejan mu wiswimp pa chisu cha Chikumangan cha Mudimu piur pa diskur dia uruw dikusadikina mu Chot cha Want.

Ap anch kichidiap mbil anch ching anch antu abatishau kal awiy afanyidina kuya ku musambu wa uruw, chikwikalap chiwamp kuyitazuk ku musambu wa uruw antu akwetinga mashakamin mayimp ma mwom ap akata kulik kulimish yijidik yidia mu Bibil ap yikutwisha kulangwish yipul ya kwidjidjek mu manangu ma antu atazukangau. Diskur dia uruw akudisal kudi mukurump ukutondau, anch chitwishikin. Amakurump adi alej awanyidina a Dizu dia Nzamb, chawiy adi awanyidina kamu nakash kukasikeshin yijidik yidia mu Mifund yisadidila piur pa chinship chinech chijim.—1 Tim. 3:2.

Mulong uruw ukwikal nich usu padiay mukurump ukusala diskur dia uruw, niyend chifanyidin kusambel kumulej yitenchik ya uruw. Ukwisamb ni antu asotina kwatijan chakwel ayipula piur pa mwikadil wau pa chisu cha kutondijan kwau; antu atijadina afanyidin kulond kashinsh ni uyakin. Anch ngatan ap ngachik watana ap amwata, muntu winou ufanyidin kulet mukand wa kujip nich uruw ukwatijadina nich mbil ya Bibil. (Mat. 19:9) Chinech chirumburikin kumulej mukurump mukand wa kupwish nich uruw.

Anch antu asotina kwatijan alond patok ni kwisamb mu kwovijan nau amakurump, uruw ukwikal chinship cha musangar kudi antu awonsu.—Jinsw. 15:22; Heb. 13:17.