Want wa Nzamb Ukuwanyish ik?

YOM YASADINAU KAL KUDI WANT WA NZAMB

Mu mutu wa mulong wasambelang, twisambinang chijingidij chisambinay Yesu. Chijingidij chinech chimekeshin patok anch Want wa Nzamb wasambishin kal kuyikel ni Yesu Kristu ndiy Mwant.

Bibil ulejen anch chisu chamudishau Yesu Want, wamwopata Satan nau ayilembil end mwiur. Akutwish ching kusu kulet kanvundangesh pa divu, ni dined didi pakach pa mayingishin masadina anch yom yiyipa nakash kusambish kamu muvu wa 1914.—Kujingunik 12:7, 9.

Chikalap nchik mikadil yiyimp yidia pa mangand, mulong udi Mwant wa Want wa Nzamb, Yesu usadin yom yivud mulong wa kuyikwash antu a pa mangand mawonsu. Tujikitishin nakash mulong kusutil mudimu wa kufundish Bibil usadikina pa mangand mawonsu wasambelay kulejan Yesu, antu avud akat kwilej ni kusadin mbil ja Bibil mu mwom wau wa pichuku pichuku. (Isay 2:2-4) Mamiliyon ma antu akat kwilej mutapu wa kwikal ni chitongijok chisikena piur pa mudimu, akwet musangar mu majuku mau, ni akat kusanger yom yau ya ku mujimbu pakad kwikal aswik a yom yiney. Nlel unou, antu inay akat kwilej yom yiney mulong wa kutaninamu kwau ayinau ni akat kwikal antu awamp akatinay Nzamb kwikal mu Want wend.

YOM IK YIKUWANYISHAU KUDI WANT WA NZAMB MACHUKU MA KURUTU?

Ap anch Yesu wasambishin kal kuyikel mwiur, maguvernema ma antu machidandamedin kuyikel pa divu. Pakwez Nzamb wamulejin kal Yesu anch: “Ey ukuyikel akankuny ney.” (Kuseng 110:2) Piswimp ap Yesu ukushesh kamu chikupu antu awonsu abwambwidina ni kupwish milong yirishinau nich antu akatina kumuziyin Nzamb.

Piswimp ap, Want wa Nzamb ukukwat mupak wa

• Kushesh relijon wa makasu. Marelijon mawonsu mafundishina makasu piur pa Nzamb ni mayimeshina antu mar makusheshik. Bibil ufanikeshin relijon wa makasu ni mband mwin kusochik. Antu avud akushimwok nakash pa kusheshikay.—Kujingunik 17:15, 16.

• Kushesh winyikel wa antu. Want wa Nzamb ukushesh mant mawonsu ma chiuntu.—Kujingunik 19:15, 17, 18.

• Kushesh antu ayimp. Chidi nchik piur pa antu akwatina mupak wa kudandamen kusal yom yiyimp ni alikina kwau kumuziyin Nzamb? Bibil ulondin anch: “Antu ayimp akez kayidiosh mu mangand.”—Jinswir 2:22.

• Kumushesh Satan nau ayilembil. Satan nau ayilembil kakutwishap kand “kuyidimb in michid.”—Kujingunik 20:3, 10.

Yom yiney yawonsu yikurumburik ik kudi antu itiyina Want wa Nzamb?

YOM YIKUYISADINAU ANTU KUDI WANT WA NZAMB

Payikedinay mudi Mwant mwiur, Yesu ukusal yom yivud nakash yakadiay kutwish kusal mwant win mwawonsu wa chiuntu. Akumukwash kudi antu 144000 atondinau pakach pa antu. (Kujingunik 5:9, 10; 14:1, 3) Ukuwanyish rusot ra Nzamb panap pa divu. Want wa Nzamb ukuyisadin antu ashicha pa divu yom ik?

• Ukupwish mayej ni rufu. ‘Kwikil muntu ap umwing ukeza kulond anch: ‘Niyedil,’’ ni “kukez kikalap kand rufu.”—Isay 33:24; Kujingunik 21:4.

• Ukulet chisambu chakin ni diking diakin. ‘Chisambu cha aney chikez kuvulijan,’ ni “akez kashakam mu chisambu mu yir yau ya mitond ya nviny ni mitond ya nfung. Kwikil muntu ap umwing ukeza kayakamish.”—Isay 54:13; Mike 4:4.

• Ukulet mudimu usangareshina. “Antwam akez kazangijal mulong wa midimu ya makas mau. Midimu yau yawonsu yikusalau yikez kawanyin.”—Isay 65:22, 23.

• Ukwinangish divu. “Mpay yikez kasangar, ni yisalamb yikez katupuk mwi ngand yiumidila.”—Isay 35:1.

• Ukuyifundish antu yom yifanyidinau kusal mulong wa kushakam chikupu. “Antu akwikal nich mwom wa chikupu anch akwijik ey Nzamb wakin, ni kumwijik Yesu Kristu watuma ey.” —Yohan 17:3.

Nzamb ukatin anch ey usanger yiyukish yiney. (Isay 48:18) Mutu wa mulong wambakedinap ukwisambin yom ukutwisha kusal kusambish kamu katat mulong wa kwikal ni ruchingej riner ripandikena kuwap ra machuku ma kurutu.