Tuyifundishany Antu Akata Kukakalijan pa Kutang
1. Chikokujol ik tutanininga mu mudimu wa kulejan?
1 Pituyilinga mu mudimu wetu wakulejan, tutanining pa yisu yimwing yikokujol pa kuyifundish uyakin antu akata kukakalijan pa kutang. Yom ik tufanyidina kusal?
2. Mutapu ik ni mulong wak tufanyidina kuyilimish antu akata kukakalijan pa kutang?
2 Yilimishany: Uding mwikadil wa muchim wa muntu udia wa usey kudiay Yehova, chidiap mulong wa kwilej shikol. (1 Sam. 16:7, NW; Jinsw. 21:2) Chawiy lel, tukatap kuyipipesh antu akata kukakalijan pa kutang. Antu inay akwitiyij ukwash wetu anch aman ang tuyilimishin ni kuyishimpishin michim. (1 Pita 3:15) Charumburik anch tukumushindinap muntu atanga verse ap paragraf. Anch muntu uyil pakemp-pakemp kurutu mu kwilej uyakin wa usey udia mu Bibil, ukusal usu wa kutangang nawamp chakwel asangera kutang Dizu dia Nzamb ni kuditongijokin “muten ni uchuku.”—Kus. 1:2, 3.
3. Mitapu ik tukutwisha kusadin chakwel tuyifundisha antu akata kukakalijan pa kutang?
3 Mitapu Kushalijan ya Kutakel Nich Malejan ma Bibil: Yipich yiding mutapu uwamp wa kufundish nich ni yikwashining kulam yom. Ukutwish wamwipul muntu wilejina nend arumburila yimenay pa chipich chidia mu mukand wilejinanya. Kupwa, sadil yipul kanang chakwel umukwasha kutesh yom yifundishina chipich. Tangany maverse mamwing malejena manans mamwing malejenau kusutil ku chipich. Ukutwish kand kusadilany yipich mulong wa kuchirikinamu dilejan. Kangal wilejany yom yivud kapamp kamwing. Kasikeshin pa mutu wa mulong ni pa manans majim madia mu dilejan, ni ipuk kwisambin yom yakad kwikal mu yiwilejinany. Tangany maverse mu Bibil, ni sadil yipul chakwel wijika anch mwin kwilej uteshin kurumburik kwa yom watanganya kal. Kusal mwamu kukutwish kwamukwash aya kurutu mu kutang nawamp ni chakwel asambisha kwikimbin amwinend uyakin udia mu Bibil.
4. Mutapu ik tukutwisha kumukwash muntu utwilejina nend chakwel atwisha kutang nawamp?
4 Ukwash Mulong wa Kutang Nawamp: Antu akata kukakalijan pa kutang ap in aburena kwilej kutang nawamp akutwish atesh ni kulam rusangu nawamp. Ukutwish kuyikasikesh antu inay asadina maband kaset mukwatinau yom yifundilau mu mikand yetu. Anch atesh nawamp mutapu utanginau ni kulondwish mu mikand yau, ni kuchirikin kutang nich dizu dia mwishin, kukutwish kwamukwash muntu ashikena ku kutang nawamp. Ukutwish kand kusadil broshir Iyijidisha Kutang ni Kufund. Mu jindond jimwing, amakurump akat kutenchik tulas twa kwilej kutang mu chikumangen. Yiyul yiney yikutukwash mu kuyikwash antu akata kukakalijan pa kutang chakwel atesha “mukand wa Nzamb,” ukuyikwasha kwikal nich manangu chakwel eza apanda.—2 Tim. 3:15.