Mutapu ik Ukutwisha Kutaninamu Nakash mu Kutang Bibil?

Ov, wiyakamishinap kal kurutu kwa kusambish kusal mudimu ujim nakash? Mulong wa kuuswapej, pamwing ap ukutwish kuwangan mu tuyikunku tukemp tukemp, tuswapela kusal. Chitin kand kusal mwamu piur pa kutang Bibil. Pamwing ap ukutwish kwiyipul anch, ‘nikusambishin pisu?’ Mu dilejan dined, tukushinshikin yom yimwing yiswapela kusal yikutwisha kukukwash kusanger kutang ni kwilej Bibil.

1. Mulong wak tufanyidin kutang Bibil dichuku diawonsu?

Muntu ukata kutang Bibil dichuku diawonsu, charumburik anch “yijil ya [Yehova],” ukwikal ni musangar ni mwom uwamp. (Tang Kuseng 1:1-3.) Kwinsambishin, sal usu wa kutang kwau mu aminit akemp dichuku diawonsu. Piukusambisha kwijidin Dizu dia Nzamb, ukusambish chad kusanger kutang Bibil.

2. Yom ik yikutwisha kukukwash kutaninamu nakash mu kutang Bibil?

Pakwel anch yom utangina mu Bibil yikukwash nakash, ufanyidin kwimanaku pakemp mulong wa kutongijokin pa yom utangina. Tufanyidin kutang Dizu dia Nzamb ni ‘kuditongijokin.’ (Joshua 1:8) Kupwa kwa kutang, iyipula yipul yiney: ‘Yom yiney yinfundishin ik piur pa Yehova Nzamb? Mutapu ik nikutwisha kuyisadin mu mwom wam? Mutapu ik nikutwisha kusadin maverse minam mulong wa kuyikwash nich antu akwau?’

3. Mutapu ik ukutwisha kuman chisu cha kutang Bibil?

Ov, chikukasikedining kuman chisu cha kutang Bibil? Avud pakach petu chiyikasikedining. Sal usu wa ‘kusadin nawamp chisu chey.’ (Efes 5:16) Ukutwish kusal mwamu mu kwitekin chisu kanang mulong wa kutangang Bibil dichuku diawonsu. Antu amwing akatining kutang Bibil pamanch nakash. Akwau akat kumutangang muten, pamwing ap pa chisu cha kupim. Pakwez akwau akat kutangang Bibil urel kurutu kwa kulal. Ey umen anch chisu ik chikwikala chiwamp kud ey mulong wa kutang Bibil?

ILEJA CHIKURIKINA

4. Ileja kusanger kutang Bibil

Chikutwish kukasikan pa kusambish kutang Bibil. Pakwez tukutwish kukudish “impu yikash” ya kusal mwamu, mud mukatay muntu kwilej kusanger yakudia yakadiay kwijidin. Tang 1 Pita 2:2, ni isambinany chipul ech:

• Anch wasambish kutang Bibil dichuku diawonsu, ov, utongin anch ukutwish kusambish kumusanger ni kwov kand ja kumutang nakash?

Talany VIDEO mulong wa kuman mutapu wasambishau antu amwing kusanger kutang Bibil. Kupwa isambinany yipul yilondwilaku ey.

Ansand Ilejina Kukat Dizu dia Nzamb (5:33)

• Mu video winou, yikokujol ik yapandakanau ansand inay?

• Yom ik yayikwasha kudandamen kutang Bibil dichuku diawonsu?

• Yom ik yasalau mulong wa kwikal ni musangar nakash wa kutang Bibil?

Yiyul kanang ukutwisha kusadin:

• Tond dikarumun dia kuchingejin ni diovakena nawamp. Pakish bil kusadin La Bible. Traduction du monde nouveau anch udiaku mu dizu diey ap mu mazu makwau uteshining nawamp.

• Sambish ni yikunku yikusangareshina nakash. Mulong wa kukukwash, tal tablo “Sambish Kutang Bibil.”

• Tek chijingidij ku yom utangina. Sadin tablo ulondina anch “Tek Chijingidij ku Yom Utangina mu Bibil” udia mu buku winou.

• Sadin application JW Library^®. Application winou ukutwish kukukwash kutang ap kutesh Bibil kwi ndond kwawonsu udia mu kusadin tablet ap telefon wey.

• Sadin broshir Ukwash Mulong wa Kwilej Dizu dia Nzamb. Mu broshir winou mud ma kart ni yipich yikutwisha kukukwash kusanger kutang Bibil.

5. Rijek yom ukwileja

Tang Kuseng 119:34, kupwa isambinany chipul ech:

• Mulong wak chid cha usey kulembil kurutu kwa kutang Bibil ap kurutu kwa kurijek yom ukwileja?

Yom ik ukutwisha kusal mulong wa kutaninamu nakash mu dilejan din diawonsu tukwileja? Chisu urijekina yom ya kwilej, sadin yiyul yiney:

1. Tang maparagraf madia pa paj wakusambish wa dilejan.

2. Kimb ni tang maverse malejenau, ni shinshikin mutapu makwatijadina ni yom wilejina.

3. Shiril mazu ma usey makwila ku chipul chin chawonsu; kusal mwamu kukukukwash kwisambin dilejan ni mulej wey.

Ov, wij?

Atuman a Yehova asadidin kal ma Bibil kushalijan. Pakwez tusangaredin nakash dikarumun dia La Bible. Traduction du monde nouveau, mulong ud wa kuchingejin, uswapel kutesh, ni usadidin dijin dia Nzamb.​—Tal mutu wa mulong udia pa jw.org ulondina anch: “Ov, Atuman a Yehova Akweting Bibil wau Ayinau?”

YOM TWILEJA KAL

Mulong wa kutaninamu nakash mu kutang Bibil, itekina chisu cha kumutang, lembil mulong wa kutesh yom utangina, ni rijek yom ukwileja.

Ov, uvurikin?

• Yom ik ufanyidina kusal chakwel yom wilejina mu Bibil yikukwash nakash?

• Chisu ik ukutwisha kwitekin mulong wa kutangang ni kwilej Bibil?

• Mulong wak chid cha usey nakash kwikal ni chaku cha kurijekang yom ukwileja?

JINGUNIN KAND

Shinshikin yitongijok yimwing yikutwisha kukukwash kutaninamu nakash mu kutang Bibil.

“Mutapu wa Kutaninamu Nakash mu Kutang kwa Bibil” (Chinong cha Kalam No. 1 2017)

Jingunin mitapu yisatu ya kutang Bibil.

“Mutapu ik Ukutwishay Bibil Kwinkwash?—Chikunku cha 1: Mwijika Nawamp Bibil Wey” (Mutu wa mulong udia pa jw.org)

Jingunin mutapu ukutwisha kusanger kutang Bibil.

“Mutapu ik Ukutwishay Bibil Kwinkwash?—Chikunku cha 2: Yom Yikusala Anch Usanger Kutang Bibil” (Mutu wa mulong udia pa jw.org)

Ilejina kud antu atangina kal Bibil mu mivu yivud.

Mutapu wa Kusal Nawamp Dilejan dia Pakampwil