Tukat Kumekesh Anch Tumukatin Nzamb Kusutil ku Mudimu Wetu
1. Rukat mulong wa Nzamb ramubachika Yesu asala ik?
1 Rukat rawiy ramubachika Yesu asala mudimu wend. Kachom ni kachom kasalay Yesu mu mudimu wend kadi uman ukash ulejena rukat rend mulong wa Yehova. Yesu walonda anch: “Chifanyidin . . . mangand mijika anch am nimukatil Tatuku, ni mudi changinkishay Tatuku chijidik, chawiy chinasala kand mwamu.” (Yoh. 14:31) Chitudia in kwilej a Yesu, tukwend kand chisend cha kumekesh anch tumukatin nakash Nzamb mu mudimu wetu.—Mat. 22:37; Efes 5:1, 2.
2. Rukat mulong wa Yehova rikwet usu ik pa mudimu wetu?
2 ‘Dijin Diey Ditumba’: Anch twisakin nich kutakaman yisu yawonsu ya kuyilej antu akwau piur pa Yehova ni piur pa ditenchik dia Want wend, tumekeshin rukat retu mulong wa Nzamb ni, chakin kamu, tukat kusal mulong wa kutumbish dijin diend. (Kus. 83:18; Ezek. 36:23; Mat. 6:9) Mudi muwadinga mudimu wa Yesu, mudimu wend udi kudandamen kwa kumekesh maswir metu makin chakwel dijin dia Yehova ditumba ni rusot rend risadika.—Mat. 26:39.
3. Kumukat kwetu Yehova kutukwashining mu mutapu ik chakwel tupandakana yikangesh?
3 Rukat Ritubachikining Tupandakana Yikangesh: Rukat mulong wa Yehova ripandakenamu yikangesh yawonsu. (1 Kor. 13:4, 7) Yesu warisha nich mikadil kushalijan mu mwom wend yela kumukangesh kusal nawamp mudimu wend. Pakwez, yikangesh piyamushikena, rukat rend rikurikina ni kusot kwend kusal rusot ra Yehova kwamutwishisha ayipandakana. (Marko 3:21; 1 Pita 2:18-23) Niyetu tukat kura nich milong yivud, pakwez rukat retu mulong wa Nzamb rikutwish ratukwash tuyipandakana. Kusutil ku kulondul piswimp chilakej chashay Kristu, tukutwish twikala nich ruchingej ni tukusal yawonsu yitutwishin mulong wa kuwanyish mudimu wetu. Kwikalap nchik rupompat mu dijuku, mayej, kunanap, ap kulik kusanger kwa antu kukutwish kwikal nich usu padi etu, pakwez yikutwishap yatukangesh kumekesh rukat retu mulong wa Yehova mu kusalang mudimu wetu mudi muchifanyidina.
4. Kumukat kwetu Yehova kutwinkishin chisend ik?
4 Rukat rikwet usu ukash, ni tukwet chiyukish cha kumekesh rukat ra muchim wetu wawonsu mulong wa Nzamb mu mudimu wetu. (1 Kor. 13:13) Mudi mutushejidina piswimp nakash ni pa chisu chikwezau kutumbish dijin dia Yehova kapamp kamwing ni chikupu, el ‘rukat retu rujimba kamu kakwau ni kakwau.’—Filip. 1:9; Mat. 22:36-38.