Yakul Ku Yipul Yen

◼ Mutapu ik ukutwishau in kukumangan awonsu kukwash chakwel antu ileja mu mutapu uwamp chisu chifundishinau yom mu yikumangan ya chikumangen? (Kuv. 31:12)

Kusutil ku kalimish kavud Tumulimishina Yehova ni ku yitenchik yitutenchikidiningay piur pa yikumangan ya chikumangen, utwitin kushik kurutu kwa chisu ni kwikal tayad chakwel atufundisha. Chidi chiwamp kushakam mu yitwamu ya kusambish mu Chot cha Want ni kusha jindond ja kwinyim mulong wa akadivar ni anambaz akweta an akemp ni mulong wa antu akwau ezina kwinyim kwa chisu. Kurutu kwa kusambish yikumangan, tufanyidin kurijek ma telefon metu chakwel masok malika kurumbangesh yitongijok ya in kutesh mu chikumangan. Anch antu awonsu akumangen, chifanyidin masok mikal makemp chakwel kumekesh kalimish piur pa yikumangan.—Mul. 5:1; Filip. 2:4.

Anch angendj ez mulong wa kukumangan netu kapamp ka kusambish, chidi chiwamp mukadivar uyija nawamp ashakam nau ndond yimwing. Kusal mwamu kukwashining nakash anch kudi an akemp a kufundish. Pamwingap in mu dijuku kandikal ijidina kwandam mu yikumangan. Anch chidi mwamu, anvaj akutwish kushakam mu yitwamu ya kwinyim mulong wa kulik kulet masok chisu chibudikinau kachisu kakemp pol ni anau chakwel anineta ap awanyish maswir mau. (Jinsw. 22:6, 15) Kichifanyidinap majuku makweta an akemp kuya kushakamin mu ka chikumbu kindjing ka Chot cha Want chakwel an asadinamu masok. Chidi chiwamp kudi anvaj kubangin maswir ma akwau ni kuyininetish anau pol ni kupwa andama nau mulong wa kulondul yikumangan.

In kwakan akwashining chakwel chisambu chikalaku mu Chot cha Want. Akwashin in majuku ni antu ezina pamwingap kwinyim kwa chisu chakwel atana ndond yiwamp ya kushakam. In kwakan afanyidin kwikal nich kalimish pa chisu chiyikwashinau antu akwau chakwel atana ndond yiwamp ya kushakam pakad kulet masok. Chifanyidin ikala ni manangu mawamp chisu chikimbinau kupwish masok masadinau in kutesh. Anch masok ma mwan marumbangeshin kutesh kwa antu akwau, chifanyidin ukwash wa in kwakan chakwel mwan winou alika masok.

Antu awonsu adia mu chikumangan akutwish akwash kwikal ni mwikadil uwamp chakwel ileja yom yitadina Yehova ni yitenchik yend mulong wa chisambu ni kutentam mu mangand masu.—Heb. 10:24, 25.