Nzamb Utulejin Kusutil kudi Jeremiy
1. Ov, mukand ik wabudika ku chitentam cha distrikt cha muvu wa 2010, ni mutapu ik tukeza kuusadin?
1 Musangar mud ik twova chisu chabudika buku musu ku chitentam cha muvu wa 2010 ku Chitentam cha Distrikt! chadinga ni mutu wa mulong ulondina anch: “Ikalany Piswimp ni Yehova!” Mukand winou, ukasikeshin manans majim ma mwom wetu wa pichuku-pichuku mitutanina mu mikand ya Jeremiy ni Madil ma Jeremiy. (Rom 15:4) Udiaku mulong wa kumusadil pa chisu cha Dilejan dia Bibil dia Chikumangen, akez kumushinshikin pa rubing ra Kalang 5, 2012.
2. Ov, mutapu ik tukutwisha kutaninamu kusutil ku kushinshikin mikand ya mu Bibil ya Jeremiy ni ya Madil ma Jeremiy?
2 Ukwet Usey Nlel Unou: Jeremiy, mwin kufund mukand winou wa Bibil wapepilau, wabwaka chirung cha kanvundangesh cha mu Yuda. Pakusambish, ndiy kiyovap anch uwanyidin mulong wa chisend chend. (Jer. 1:6) Amuzengol kand kudi arund nend ni pamwing ap kudi anamakwend a mu musumb wend, Anatot. (Jer. 11:21, 22) Choviken kamu anch, yisu yimwing Jeremiy waziya. (Jer. 20:14) Pituwanyishina mudimu wetu wa ‘kuyikadish in kwilej a michid yawonsu,’ yisu yimwing turishining nich yikokujol ni kwiyov chilik chimwing mudi mwiyovay Jeremiy. (Mat. 28:19) Anch twashinshikin yom yafunday kukez katukwash tuwanyisha mudimu wetu wa kulejan nich ukashinsh ni mushiku.
3. Ov, mutapu ik tukeza kusadin yom yimwing yidia mu buku wa Jeremiy?
3 Yidiamu: Mifund yijim yifanyidina kutang pa chisu cha kwisamb ayifundin mu ulombu ujal yalalela. Kwinsudiel kwa rubing ni rubing ra kwilej afundin chipul chimwing cha usey ap yaad, yifundinau mu ulombu ujal yikasikeshina manans majim ma dilejan. Akuyipul in kutesh yipul yiney mulong wa kuchirikinamu. Mu buku winou mudi yipich yiwamp yikutwishau kwisambin mu chikumangen pakad kwijindjek.
4. Ov, mutapu ik tukutwisha kutaninamu nakash kusutil ku kushinshikin buku wa Jeremiy?
4 Chakwel tutaninamu nakash, tufanyidin kwirijek kurutu kwa chisu. Ufanyidin kushinshikin pa manans majim miukutwisha kusadin mu mwom wey ni mu mudimu wey wa kulejan. Ipana nakash mu kwakul. Nich chiyukish cha Yehova, Jeremiy wawanyisha chisend chend nich musangar ni kusangar yom yadingay nich. (Jer. 15:16) Kushinshikin kwetu pa mukand winou usu, kukutukwash tuwanyisha mudimu wetu wa kulejan mu mutapu umwing.