Sadilany Kapend Ketu ka Web Mulong wa Kuyilej Anen
1. Ov, risu rutong ra chikunku cha kapend ketu ka Web chikweta mutu wa mulong ulondina anch « Enfants »?
1 Kapend ketu ka Web jw.org kadiaku mulong wa kuyisangaresh antu a yimbu yawonsu. Chikunku cha kapend ka Web chikweta mutu wa mulong ulondina anch « Enfants » (yang pafundinau anch: La bible et vous > Enfants) chiyikwashininga ansand ni anvaj au chakwel aseja piswimp umwing ni mukwau ni kusej piswimp ni Yehova. (Kuv. 6:6, 7) Ov, mutapu ik ukutwisha kusadil chikunku chinech chakwel uyileja aney?
2. Ov, mutapu ik ukutwisha kutond malejan mambatena nich chimbu chakwel wileja pamwing ni aney?
2 Ambatesha Nich Mwikadil: Mwan ni mwan ukweta maswir mend ma pakampwil. (1 Kor. 13:11) Ov, mutapu ik ukutwisha kutond malejan mambatena nich chimbu chakwel wileja pamwing ni aney? Iyipula amwiney anch: ‘Ov, yom ik yikeza kuyisangaresh anam? Ov, mutapu ik ukezau kutesh nawamp? Ov, yisu yinch yikutwishau kushinshikin pa mutu wa kwilej?’ Ufanyidin kwisamb pamwing ni an akweta mivu yisatu ap asand jinsangu jidia pa ndond pafundinau anch: «Comptines bibliques ». Majuku makwau masangaredina jinsangu ja Bibil jidia mu chikunku chikweta mutu wa mulong ulondina anch « Enseignez vos enfants ». Shinshikin kand kutond kukwau.
3. Ov, mutapu ik ukutwishau anvaj kusadil nawamp kamu jinsangu ni mijikit yidia mu mutu wa mulong ufundinau anch « Pour le culte familial »?
3 Mulong wa Difukwil mu Dijuku: Yitenchik yiney yifundinau anch ‹‹ Pour le culte familial ›› yidi mitapu ya kukwash mitu ya majuku chakwel ileja pamwing ni anau. Chakwel wileja mutapu wa kusadil jinsangu ni mijikit, djat buton wa ulombu wa dilalandj pa ndond yifundinau anch ‹‹ Télécharger ›› ni tang « Guide des parents » piur pa ditenchik ni ditenchik. Sadilany mapaj makwet yipich yambatena nich mijikit chakwel uyilejany anen akemp. Yikwashany ansand ni ayangadim chakwel awanyisha mijikit yau ya kwilej. Mijikit yawonsu yidia mu ditenchik ni ditenchik yisambidin rusangu ra Bibil rumwing ap dilejan dimwing, chawiy an a yimbu yin yawonsu akutwish kwipan mu mutapu umwing wa difukwil dia mu dijuku.
4. Ov, yom ik yikutwishau kutan mu chikunku chikweta mutu wa mulong ulondina anch « Deviens l’ami de Jéhovah »?
4 Ikal Murund wa Yehova: Mavideo, mizik ni mijikit yidia mu chikunku chinech chifundinau anch ‹‹ Deviens l’ami de Jéhovah ›› cha kapend ketu ka Web yiyikwashining anvaj chakwel andjika Dizu dia Nzamb mu michim ya anau akemp. (Kuv. 31:12) Video ni video ufundishining dilejan kanang dia usey. Mijikit yisadinau mudi masengan yikasikeshining usey wa malejan minam. Mulong yisu yivud an asotining kuwang—ni miminy yiyikwashining an chakwel avurika yom yilejau—miminy ya Want ni miminy yifundinau pakampwil mulong wa an ayitekening chisu chawonsu pa kapend.
5. Ov, mulong wak anvaj afanyidina kumulembil Yehova chakwel ayikwasha kuyifundish anau uyakin?
5 Yehova ukukatinany en anvaj chakwel wikalany amaku ni atatuku ayifuvu. Chawiy, mulembilany amboku chakwel akukwashany kuyifundish anen uyakin. (Ank. 13:8) Nich ukwash wa Yehova, ukutwishany kuyifumb anen ikala ‘in manangu chakwel apandila ku ritiy mu Kristu Yesu.’—2 Tim. 3:15; Jinsw. 4:1-4.