Mutapu wa Kurijek Mazu Mawamp ma Kusambish Nich

1. Ov, mutapu ik chidia cha usey kwikal nich mazu mawamp ma kusambish nich mambamb?

¹ Mudi maku mawamp ma kudia yakudia yikwashininga mujimbu, mazu mawamp makwashining kusambish minsambu yiwamp ku chis yengamidina mu Bibil. Mazu ma kusambish nich mambamb makutwish kwikal mawamp ni masangareshina. Mudi mupakiningau yakudia yiwamp, mazu minam mitining kumatongijokin kurutu kwa chisu ni kumarijek. (Jinsw. 15:28) Ov, chom ik chisadininga chakwel mazu ma kusambish nich mambamb mikala mawamp?

2. Ov, mutapu ik tukutwisha kurijek mazu ma nsambishil masangareshina?

² Tond Mitu ya Milong Yisangareshina: Mazu metu ma nsambishil mafanyidin kulangwish musangar, ap makutwish kumubachik mwin chikumbu ku minsambu. Chawiy, chisu wirijekininga, tongijokin piur pa mitu ya milong yiyisangareshininga antu a pol. Ov, antu a pol pen asangaredining guvernema muwamp, mwom wa dijuku usangareshina ap kupwa kwa njit? Yisu yivud, antu asotining kulet yitongijok yau, chawiy, ufanyidin kurijek mutapu wa kwipul yipul pa mutapu wau wa kutong pa mulong winou. Ov, ukutwish kusadil mazu ma nsambishil madia mu Mudimu Wetu wa Want ni kumambatesh nich teritwar wey? Ov, mulong wak ukutwishap kwitekin chisu kanang cha kusadil yitongijok yimwing ya kusambish nich mambamb chisu chey cha urel wa Kwifukwil mu Dijuku?

3. Ov, mutapu ik tukutwisha kwambatanish mazu metu ma nsambishil nich yaku ni mashakamin ma antu a mu teritwar wetu?

³ Shinshikin Yaku ni Mashakamin: Mu jindond jimwing, tufanyidin kumekesh rutong retu ra kumwendil muntu kapamp kamwing. Mu jindond jikwau, chidi kuburen kalimish anch ngendj kamulangwishinap mwin chikumbu ni pamwing ap kwijikish jinsangu kanang ja pakampwil. Mu jindond jimwing kand mashakamin ma antu adia mu relijon kushalijan matukwashining kapamp kamwing kwambamb nau mazu metu ma nsambishil kusutil mu Bibil. (Mid. 2:14-17) Pakwez, ndond jidia antu adia mu marelijon makad kwikal ma Ukristu, ap kwikil relijon umwing, chikutwish kwikal chiwamp nakash kujimbul Bibil chisu umuchirikidina muntu, mudi muwambambany nend kapamp ka kusambish.​—⁠Mid. 17:22-31.

4. Ov, jinkeu ik tufanyidina kupwitin chisu tulondila mazu metu ma masambishil?

⁴ Mazu ma Kusambish Nich: Rijek kamu nawamp mazu mey ma kusambish nich. Mafanyidin kwikal mapandakena kuwap anch madi miswimp ni maswapela. Mutapu wetu wa kusambish nich mazu ma nsambishil uding kand wa usey. Ikal mwin musangar. Ikal mwin masip makin mamekeshina anch umusangaredin mwin chikumbu. Anch twalondul yany yiney yikez kutukwash chakwel turijeka mazu ma nsambishil madia mawamp makeza kuyikasikesh antu a mu teritwar wetu kudia ku “Mes ma [Yehova].”​—⁠1 Kor. 10:⁠21.