Yivurikany Antu Adia mu Yikumbu ya Kuyilamin Amapal

1. Ov, mulong wak kudia maswir ma kuyilej antu adia mu yikumbu ya kuyilamin amapal rusangu ruwamp?

¹ Antu avud arishining nich chibudikin chiyimp cha upal. (Mul. 12:1-7) Amapal amwing ashiching ku yikumbu ya kuyilamin, chawiy yisu yivud chitwishikinap kudi etu kuyitan chisu tudinga mu mudimu wa kulejan wa ku chikumbu ni chikumbu. Chinech chidi kamu chakin ap mu jingand mudinga chaku cha kuyidiosh anvaj amapal ku yikumbu ya anau ap ya anamakwau akwau. Pamwing ap, anch akwet mipak mu kushemunik kwau ap ashadishin manangu, amapal ni antu akwau adia mu yikumbu ya kuyilamin akutwish kand niyawiy kwilej, kujikitish ni kushiken ku kumukat Yehova. Ov, mutapu ik tukutwisha kwipan mu kuyilej rusangu ruwamp ra “ruchingej rujim”?​—Titus 2:13.

2. Ov, mutapu ik tukutwisha kufund list wa yikumbu yilaminingau amapal ap ayibid mulong wa kuyendil?

² Sambish Kukimb: Yisu yivud list ulejena yikumbu ya kuyilamin amapal akutwish kumwizwish kusutil ku kukimb list wa ma nimero ma telefon ma pol pen. Kimb pa list winou yom mudi “yikumbu ya kuyilamin amapal,” “yikumbu yidia pamwing” ni “yikumbu ya kulamin ayibid.” Kalam wa mudimu ukutwish kutakel chakwel atonda in kulejan amwing adia ayifuvu mulong wa kulejan kwi ndond ni ndond yiney. Kwikal nich program muwamp ni kukimb ukwash wa Yehova, yisu yimwing chitwishikin kusambish chisak cha dilejan dia Bibil.​—Jinsw. 21:5; 1 Yoh. 5:14, 15.

3, 4. (a) Ov, kudi anany tufanyidina kusejin chakwel tusambisha nau chisak cha dilejan? (b) Ov, mutapu ik tukutwisha kurijik ditenchik dia kwilej?

³ Mutapu wa kusambish dilejan ukwambatan nich chikumbu chimwing ni chikwau cha kuyilamin amapal. Mu yikumbu yijim ya kuyilamin amapal yikweta antu avud ni in kusal mudimu, chiwapining kumwipul bil mwin kwak angendj ni kumwit list ulejena mijikit yisadikininga. Mu yikumbu yikemp yidia pamwing mulong antu akweta mivu yivud​—yikweta antu akemp ni in kuyikwash aad ap asatu—​chikutwish kwikal chiwamp kwikal nich program wa chisu cha kwisambin kapamp kamwing ni muntu udiamu.

⁴ Mu mikadil yin yawonsu, lejan patok anch upanin chisu chey cha kwisotin mulong wa kumukasikesh muntu ni muntu ukusangera kutang ni kwisambin jinsangu ja Bibil. Ipul anch kudi antu kanang akusangera kwinung mu chisak cha antu akwisambina Bibil mu aminit 30 mu rubing. Akutwish kusadil mikand kushalijan, pakwez, in kulejan avud ameninga anch chiwapining kusadil Recueil d’histoires bibliques ni Le plus grand homme de tous les temps. Ukutwish kumulej ntakel wa yikumbu mikand yiney. Ukutwish kwovijan nend piur pa dichuku, chisu ni kapalakany ka kukumangen ni ukufundany mijikit yiney pa kalandriye wa chikumbu cha kulamin amapal. Kangal wov wom wa kwimekesh amwiney anch udi umwing wa ku Atuman a Yehova. Pa chisu chinicha kand, mukwasha ntakel chakwel ijika nawamp anch ey wezinap mulong wa kutakel mudimu wa chirelijon bwat, pakwez, wezin mulong wa kukasikeshin pa malejan ma Bibil.

5. Ov, yiyul ik ya kusadil yikutwisha kusal chakwel dilejan dikala disangareshina ni dia ukwash?

⁵ Takel Dilejan: Mutapu wa kutakel dilejan ukwambatan nich mashakamin ni mwikadil wa chikumbu cha amapal, chawiy ikal mwin kuswapej ni mwin kujingunin yom. Mwin kutakel ufanyidin kusadil makopi ma mikand yikusadinay ni ufanyidin kand kuyikung kupwa kwa dilejan. Chikutwish kwikal cha usey kujimbish mifund yidia mu makopi minam. Ukutwish kutang maparagraf, ukwipul yipul ni yakul yikutwish kwikal mu mutapu tusadidininga machuku mawonsu. Ukutwish kuyit amapal akusota ni akweta ukash chakwel atanga maparagraf ap mifund ya Bibil. Pa chisu cha kwilej, ikal mwin kwipan, mwin kulond yom nawamp ni mwin kumekesh urund. Nich mbil ya ntakel wa yikumbu ya amapal, ukutwish pamwing ap kumekesh mavideo mamwing ma dirijek makutwisha kukasikesh ritiy rau mu Bibil ap kukasikeshin malejan ma pakampwil ma jinsangu ja Bibil. Chitwishikin kusambish ap kupwish dilejan nich malembil ma mu wiswimp. In kulejan amwing asambishining pamwing ap nich miminy ya Want.

6. Ov, mutapu ik chifanyidina kwakul ku chikangesh?

⁶ Ov, chikutwish kwikal nchik anch ipal umwing walangwish chikangesh pa chisu cha kwilej? Ikal mwin kusadil manangu piukumwakula. (Kol. 4:6) Pamwing ap ukutwish kujimbul mu wiswimp mufund umwing wa Bibil wakwila patok pa mulong wend. Anch chikutwish kukukasiken kusal mwamu, chikutwish kwikal chiwamp kujingunin chitongijok chend, kupwa ukumulej anch ukushinshikinany milong yend kuns kupwa kwa kwilej.

7. Ov, chom ik ukutwisha kusal anch muntu udia ku chikumbu cha amapal ukwet chipul cha panrend ap anch umekeshin musangar wa pakampwil?

⁷ Pa chisu chimwing, muntu udia ku chikumbu cha amapal ukutwish kwipul chipul ap kumekesh maswir ma kwilej nakash. Nambaz umwing usadidining mutapu winou ulondin anch: “Chinech chidi chipul chiwamp nakash. Mulong chidi chipul chey amwiney, chingel bil djat ni pa kupwa kwa kutang kwetu. Kupwa chad ey niyam twikwisambin pa chipul chinech.” Yisu yimwing chitwishikin kwirijek pa mutapu wa kutakel dilejan dia Bibil dia muntu panrend pamwing ni antu asangaredina pa chisu chikwau ni mwi ndond kushalijan.

8. Ov, mutapu ik ufanyidinau kuchind uvud wa yisak ya malejan ma Bibil ni malejan ma antu panrau?

⁸ Yisu yivud chidi chiwamp nakash kudi Atuman inay amwing kutakel chisak cha dilejan ku chikumbu cha amapal pa chisu ni chisu. Mwin kulejan mwin mwawonsu wipanina ukutwish kuchind asaa. Kapamp ka kusambish ka kutenchik dilejan, mwin kulejan utakedila ukutwish kuchind uvud wa antu achirikidinay, uvud wa asaa wa chisu chitakediningay chisak cha dilejan dia Bibil ni uvud wa antu atakedilay pa ngond ni ngond. Pakwez, akutwish kuchind uvud wa malejan ma Bibil ni muntu mwawonsu udia ku chikumbu cha amapal ukweta ukash wa kutesh ap wa kwilej mu mutapu tusadidininga machuku mawonsu.

9, 10. Ov, ngikadil ik ya usey yitinau kudi in kulejan ipanina mu mudimu winou? Rumburil.

⁹ Dandamen Kusal Mwamu: Chiwapin kutenchik dichuku ni chisu mulong wa chisak cha dilejan. Antu adia ku yikumbu ya amapal ni in kusal mudimu kwinikwa akez kuchingel dilejan dined dikala ukwash pakad kujing, kudisambish ni kudipwish pa chisu chiwanyidina. (Mat. 5:37) Chawiy lel, chitin kulimish machip mey, mushiku ni mutapu wey wa kutenchik yom. Uman umekeshin anch chiding chiwamp anch in kulejan aad ayifuvu asadin pamwing mu kutakel chisak cha dilejan. (Mul. 4:9, 10) Mu yikumbu yijim ya amapal, kuswirikedin in kulejan avud.

¹⁰ Kwikal mu urund uwamp ni kumekesh musangar wa pakampwil kudi ni kwawiy kwa usey. (Fil. 2:4) Kapamp ka kusambish ka kuyichirikin antu inay, itekina chisu cha kwisamb ni muntu mwin mwawonsu weza kukumangan. Fund ni pakish kulam mu manangu majim mau kurutu kwa dilejan dikwau. Pakwez, amapal amwing ajimening anch muntu kanang kayijimbwilap pa majin mau kapamp ka kusambish. Kushimpish muchim ni ranaken kukez kumusal muntu mwin mwawonsu iyova anch ukwet usey ni amusangaredin.

11. Ov, mutapu ik ukutwishau in kutakel chisak cha dilejan kuyimekeshin in mudimu ni yid ya majuku ya antu ashicha mu yikumbu ya amapal kalimish?

¹¹ Chidi kand cha usey kuyimekeshin in mudimu, yid ya majuku ma antu adia ku yikumbu ya amapal kalimish ni kuwap. Kapamp ka kusambish ka kutenchik kwa dilejan, chidiap cha​—manangu kuswimp chisu ap mutapu wa kwisamb pakad kumwijik ntakel wa yikumbu ya amapal. Chisu ni chisu, muleja ntakel wa yikumbu mutapu uyila kurutu dilejan dined. Anch yid ya majuku ya amapal yezin ku yital amapal pa chisu cha dilejan, itekina chisu cha kwisamb nau. Yijikisha rutong ra mijikit ya dilejan dia Bibil. Yileja nich kashinsh musangar wey piur pa chid chau cha dijuku. Yita chakwel ashakama ni atesha dilejan.

12, 13. Lejan uman umekeshina yiyukish ya mudimu wa kupan uman ku yikumbu ya kuyilamin amapal.

¹² Yibudikin: Atulam in kwendangan ni yikumangen apanining rapor wa yibudikin yiwamp yikasikeshina mu mulad wa mudimu winou. Mu mutapu umwing, antu uvud piswimp ni 20 akumangana kapamp ka kusambish ku minsamb. Chinech chasala chakwel atakela malejan ma Bibil ma muntu panrend pamwing ni antu musamban ashicha mu yikumbu ya amapal. Umwing wa pakach pau washikena kamu ku dibabatish. Dilejan dia ku chikumbu chikwau diamubachika mband ipal wa mivu 85 chakwel inunga pamwing mu chikumangen cha pol pau ni wamekesha maswir mend ma kumubabatish. Chisu chikumbu chimwing cha amapal chakwata mupak wa kukasikesh mijikit yach​—ya kulikish kutakel chisak cha dilejan dia Bibil kudi Atuman a Yehova—​antu ashicha ku yikumbu ya amapal asambisha kumwinanin ntakel wa yikumbu ya amapal! Kupwa, dilejan diasambisha kand ni antu pakach pa uvud wa 25 ni 30 akumangana.

¹³ Rukat tuyimekeshininga amapal ashicha ku yikumbu ya kuyilamin kiriyipukwiningap ching kusu amapal pakwez riyipukwining kand antu adia kwin kwa. Chilakej, chiswapelinga kudi in kusal mudimu ku yikumbu yiney kushakam ni chakwel ileja. Usu tusadininga wa kuyisangaredin amapal adia ku yikumbu ya kuyilamin upanin kand uman uwamp kudi antu awonsu. (1 Pita 2:12) Kupwa kwa kumulej rutong ra kwilej kwinoku, ntakel umwing wa yikumbu ya amapal walonda anch: “Ov, usutishiningany yisu yinch?” “Ov, chisu ik ukutwishany kusambish?” Ntakel mukwau wafunda anch: “Nikutwish kupan mbil nich muchim wawonsu chakwel kwikal chisak cha dilejan ku yikumbu yin yawonsu ya kuyilamin amapal ni ayibid mwi ndond yinitakedila. Atuman a Yehova apanining ukwash winou pakad kufut nfalang mudi chikunku cha mudimu wau wa kulejan kudi antu awonsu.” Chikumbu chimwing cha kuyilamin amapal mu Hawaii chayinkisha Atuman a Yehova Sertifika wa Mudimu wa Kwisotin ulejan kwipan kwau kwa kwisotin mudi “chipau cha usey” mulong wa kuyikwash antu adia ku yikumbu ya amapal.

14. Ov, mulong wak tufanyidina kusal usu wa kuyikwash antu adia mu yikumbu ya kuyilamin amapal?

¹⁴ Amapal ayitining kudi Yehova chakwel amushimana. (Kus. 148:12, 13) Kwit kwinoku kuyitadining kand amapal adia ku yikumbu ya kuyilamin. Ov, kudi yikumbu ya kuyilamin amapal mu teritwar wen mudia amapal akutwisha kutaninamu kusutil ku kutesh rusangu ruwamp? Nich ukwash wa amakurump a pol pen ni antakel a yikumbu ya kuyilamin amapal, tukutwish amboku kulejan rusangu ruwamp kudi antu inay adia mu yikumbu ya kuyilamin amapal. Pitukata kuyivurik amapal, tukat kumwimburij Yehova.​—Kus. 71:9, 18.