Ov, Mutapu ik Nimekeninga Kurutu kwa Yehova?
1. Ov, mutapu ik Bibil udiay mudi dikalash?
1 Ov, tupamp twinch witadininga mu dikalash? Antu avud pakach petu itadining pichuku-pichuku mulong chinech chitukwashing tumana ufun wetu ni mitapu tuswiridina kwirijek. Bibil udi mudi dikalash. Kutang Dizu dia Nzamb kutukwashining tujingunina untu wetu wa mukach, untu umeningay Yehova. (1 Sam. 16:7; Jak. 1:22-24) Dizu dia Nzamb dikutwish “kujingunin yitongijok ni rusot ra mu muchim wa muntu.” (Heb. 4:12) Ov, mutapu ik kutang ni kutongin pa Bibil pichuku-pichuku kukutwisha kutukwash chakwel tumana anch tufanyidin kwikasikesh mulong twikala in kulejan ayifuvu nakash?—Kus. 1:1-3.
2. Ov, mutapu ik ukutwishay Bibil kutukwash chakwel twishinshikina ayinetu?
2 Sadil Bibil Mudi Dikalash: Jinsangu ja mu Bibil ja atushalapol ashinshamena a Yehova jitulejin ngikadil jamusangaresha. Chilakej, David wamekesha mushiku mulong wa dijin dia Nzamb. (1 Sam. 17:45, 46) Isay wipana nich kutakaman mu kulejan mu teritwar mukash. (Isay 6:8, 9) Rukat rikurikina ra Yesu mulong wa Tatukwend wa mwiur ramubachika chakwel amana mudimu wa kulejan mudi musul wa kwiswedish ni usangareshina pa ndond pa kuuman mudi chisend chilimina. (Yoh. 4:34) In Kristu a mu chitot cha mivu ya kusambish alejananga nich mushiku, achingejina mudiay Yehova ni akwata mupak wa kudandamen. (Mid. 5:41, 42; 2 Kor. 4:1; 2 Tim. 4:17) Kutongijokin pa yilakej mudi yiney ku kutukwash twikala nich rutong ra kuwapish mutapu wa kusal mudimu wetu utumbila.
3. Ov, mulong wak tufanyidinap kulond anch tukukwat mipak yiswiridikena diamashik pa ndond pa kuyikwat nlel?
3 Rijek Yilim: Chakin kamu, chiwapiningap kudi etu anch twital mu dikalash ni kupwa twavuramen yilim. Tukutwish kumwit Yehova chakwel atukwasha twiyijika ayinetu nawamp ni tukwata mupak wa kwirijek. (Kus. 139:23, 24; Luka 11:13) Mulong chisu chakep kal ni mwom wetu udi mu chak, tufanyidinap kulond anch tukukwat mipak ya kuswimp yom yiswiridikena diamashik pa ndond pa kuyikwat nlel.—1 Kor. 7:29; 1 Tim. 4:16.
4. Ov, chom ik chikumushikena muntu ukata kwital mu Dizu dia Nzamb ni yisal yend yambaten ni yom yitanginay?
4 Untu wa mukach—wawiy ushinshikidiningay Yehova—kupandakanamu untu umekena ni mes. (1 Pita 3:3, 4) Ov, chom ik chikumushikena muntu ukata kwital mu Dizu dia Nzamb ni yisal yend yambaten ni yom yitanginay? Muntu winou “akez kamuyukishil mu yisalijok yend.” (Jak. 1:25, TMK) Mwaning, tukez kwikal nich musangar ni kwikal in kulejan ayifuvu mulong “tukat kutal mu chitadil ni kuman uyaj wa [Yehova].”—2 Kor. 3:18, TMK.