Tambulany Chilik cha Aprofet—Nahum
1. Ov, yom ik twilejina kusutil ku mukand wa Nahum?
1 Kusheshik kwa Ninive wa pasak kupanin uman wa patok mudi mwabwakau kudi Nahum anch Yehova wafundakesha rukuny pantaliken ni akankuny Nend ni ujim wa akankuny nend upandakenap ujim Wend. (Nah. 1:2, 6) Kushinshikin nawamp uprofet wa Nahum kutwinkishining malejan piur pa mudimu wetu wa kulejan.
2. Ov, mutapu ik tukwikadisha uruu wetu usongina mabuj?
2 Panany Rongoj ni Ruchingej: Anch watala pa kusambish, mukand wa Nahum umeken mudi kusu mazu ma dirumburish pantaliken ni Ninive musumb witutwila wa Asiria wa pasak. (Nah. 1:1; 3:7) Pakwez, mazu minam ma dirumburish madinga mudi rusangu ruwamp kudi antu a Yehova. Dijin dia Nahum dirumburikin anch “Mwin Kongoj,” wayikasikesha ambay nend in Yuda anch piswimp ap akankuny nau kakezap kwikalaku! Chikwau kand Nahum walonda nich kashinsh anch Yehova udi mwin “kuyichidij antwend pa chisu cha mar.” (Nah. 1:7) Pitulejeninga, niyetu tupanining rusangu ruwamp ni tuyikasikeshining antu akwau chakwel akimba diking mudiay Yehova.—Nah. 1:15.
3. Ov, mutapu ik tukutwisha kumwimburij Nahum mu kusadil yilakej ni yifanikesh?
3 Sadilany Yilakej ni Yifanikesh: Yehova wamupepila Nahum chakwel isikeja nsudiel wa Ninive ni Tebes musumb wa Idjibit (No-Amon) washeshau kudi in Asiria. (Nah. 3:8-10) Pitwisambininga ni antu awonsu piur pa nsudiel ya ditenchik dined diyimp dia yom, tukutwish kukasikeshin pa uprofet wa Bibil umekeshina anch dizu dia Yehova dikukanganyap kuwanyin ap pakemp mu tuyom tukemp-tukemp. Chilakej, chisu chezau in Babilon ni in Mediy kukwat musumb wa Ninive mu muvu wa 632 K.C.C., ruvul mukash wasala anch Kawit wa Tigir kizula bwafu, ni mem mateka jimbumbu ja musumb winou mu ubaj. Kupwa, Ninive amukwata mudi mwabwakay kamu Yehova.—Nah. 1:8; 2:6.
4. Ov, mutapu ik tukutwisha kulond patok ni mu mutapu wovikena mu mudimu wa kulejan?
4 Ikalany in Kulond Patok ni mu Mutapu Wovikena: Mutapu wa kufund wenday Nahum wading wovikena ni wamushena. Manans mend mading movikena patok. (Nah. 1:14; 3:1) Chilik chimwing, tusotining kusadil mazu maswapela kutesh. (1 Kor. 14:9) Kapamp ka kusambish ka kumanijan ni muntu, muleja patok rutong rey ra kumwendil. Piwilejina Bibil pamwing ni antu, yikwasha chakwel akudisha ritiy rau mudiay Yehova ni mu Dizu diend ni akudisha musangar wau pa jinsangu ja kusadin jitadina muntu panrend.—Rom 10:14.
5. Ov, Ruchingej ik ritutanina mu uprofet wenday Nahum?
5 Ruchingej ra Nahum mu kuwanyin kwa dizu dia Yehova rimeken patok mu mukand wa Bibil ukweta dijin diend. Payila ni kusej ditenchik dia Satan, tutanin rongoj mu mazu ma Nzamb malondina anch: “Kakumufundakeshinap mukankuny nend tupamp twaad.”—Nah. 1:9.