Londulany Chilakej cha Aprofet—Abakuk
1. Mulong wak tukutwish kulond piur pa rusangu ra muprofet Abakuk?
1 Piturishina nich kupandakan kwa uyimp mu mangand minam, tukutwish kwiyov mudi mwiyovay Abakuk, wamwipula Yehova anch: “Ov, mulong wak witiyina am kuman mar mudi minam? Ov, chisu ik chiukulika kuman yisalijok yiyimp?” (Aba. 1:3; 2 Tim. 3:1, 13) Kutongijokin pa uruu wa Abakuk ni chilakej chend cha kushinshaman kukutwish kutukasikesh pituchingedina dichuku dia dirumburish dia Yehova.—2 Pita 3:7.
2. Mutapu ik tukutwisha kumekesh anch tukwet ritiy nlel unou?
2 Kupand Mulong wa Ritiy: Pa ndond pa kwiyakamish nakash mulong wa mashakamin mend mayimp, Abakuk washala ubabela muspiritu ni ukasikena. (Aba. 2:1) Yehova wamukasikesha muprofet anch dizu Diend dikez kuwanyin pa chisu chatekay ni anch “in kutentam akez kapand mulong wa ritiy rau.” (Aba. 2:2-4) Chinech chirumburikin ik kudi in Kristu ashicha pa chirung chinech cha nsudien? Pa ndond pa kwijik chisu chikeza kushik disudien, chidi cha usey nakash kwikal nich kashinsh anch dikez kushik chakin kamu. Ritiy rikat kutubachik ku kushal achila ku mes ni kutek pa ndond ya kusambish mudimu wa kulejan.—Heb. 10:38, 39.
3. Mulong wak tufanyidin kulam musangar wetu mu kumusadin Yehova?
3 Kusanger mudiay Yehova: Pakezay Gog wa Magog kuyipompat antu a Yehova, ritiy retu akez kurupak. (Ezek. 38:2, 10-12) Njit jiletining mar, ap kudi antu akuwina. Yakudia yikutwish kukep, yikumbu yikutwish kutem, ni mashakamin ma mwom makutwish kuyip. Chom ik tukusala anch mar minam mashiken? Abakuk wading wij anch mar makez kumushiken, chawiy chakwatay mupak wa kulam musangar wend wa kumusadin Yehova. (Aba. 3:16-19) “Musangar wa Yehova” ukez kukukwash kand chakwel ujijamana yoziu yezina kurutu.—Neh. 8:10; Heb. 12:2.
4. Musangar ik tukweta katat ni tukwikala nich mu machuku ma kurutu?
4 Antu akezay Yehova kulam pakweza dichuku diend dia dirumburish akez kudandamen kuyifundish jinjil ja mwom ja Nzamb. (Aba. 2:14) Antu akuvumbuka niyawiy akez kwilej piur pa Yehova. Nlel unou, dandamenany amboku kusadil chisu chawonsu mulong wa kulond piur pa Yehova ni midimu yend ya kushimok!—Kus. 34:1; 71:17.