Muchingejina Yehova Chakwel Upanda!

1. Mulong wak etu awonsu tukwet kuswir kwa kutukasikesh?

ETU awonsu tukwet kuswir kwa kutukasikesh. Pamwing ap mwom wetu wizwil too nich minan, yovil ya kuziy ni yakamish. Tukutwish kuman mar mulong wa mayej, upal ap mulong wa rufu ra muntu tukatina. Amwing pakach petu ayisadidin mu mutapu uyimp kudi antu akwau. Chikwau kand, antu atunyingumukina ayil mu kwikal ni chisum nakash. Chakin kamu, yisu yiney ya “mar nakash” yimekeshin anch tushich mu “machuku ma kwinsudiel” ni dichuku diawonsu disutina ditutwadin piswimp ni ngand yisu. (2 Timote 3:1) Pakwez, pamwing ap twachingedin kal nakash kuwanyin kwa kushilamu kwa Yehova, ni pamwing ap turishin ni milong yivud nakash. Chawiy kwisu tukutwisha kutan kukasikesh?

2, 3. (a) Yom ik twija piur pa Abakuk? (b) Mulong wak tukushinshikina mukand wa Abakuk?

² El tushinshikinany mukand wa Abakuk mulong wa kutan chakul ku chipul chinech. Ap anch mifund yitulejinap yom yivud piur pa mwom wa Abakuk, mukand wend utukasikeshin nakash. Dijin Abakuk dirumburikin pamwing ap anch ‘Kubwikat kwa rukat.’ Chinech chikutwish kumekesh mutapu ukatau kutukasikesh kudi Yehova, mudi utubwikatin kwa rukat, charumburik anch ukat kututek mu makas mend. Ap chikutwish kand kumekesh mutapu ulaminau in kumwifukwil Yehova ba kudi ndiy. Abakuk wambamba ni Nzamb ni wamwipula yipul yimwing. Yehova wamupepila Abakuk chakwel afunda mambamb minam mulong wading wij anch tukutaninamu.​—Abakuk 2:2.

³ Mambamb minam pakach pa Yehova ni muprofet wading ni yakamish yawiy yom yawonsu yitulejinay Bibil piur pa Abakuk. Pakwez mukand wend udi chikunku cha “yom yawonsu yafundau pakur” mu Dizu dia Nzamb, ‘chakwel ku kujijaman kwetu ni ku rongoj ra Mifund tutwisha kwikal nich ruchingej.’ (Rom 15:4) Mutapu ik ukutwisha mukand wa Abakuk kumukwash muntu ni muntu pakach petu? Ukutwish kutukwash kwijik chirumburikina kuchingejin mudiay Yehova. Ni uprofet wa Abakuk utukasikeshin anch tukutwish kwikal ni chisambu cha mu manangu chikalap nchik yakamish ni milong tukweta.

MULEMBILA YEHOVA

4. Mulong wak Abakuk wading ni yakamish?

⁴ Tang Abakuk 1:2, 3. Abakuk washakama pa chirung chimwing chikash. Antu ading amunyingumukina ading ayimp ni akweta chisum, ni chinech chamunenganesha nakash. Kwi ndond yawonsu kwatalangay, wamanang in Isarel akat kusalijadin umwing ni mukwau mu mutapu uyimp ni wa chisum. Abakuk wiyipula anch: ‘Ov, chisu ik chikupwa uyimp winou? Mulong wak Yehova ulabin mwamu pa kusal chom kanang piur pa uyimp winou?’ Wiyova nayimp nakash. Chawiy wamwilembila Yehova chakwel asala chom kanang. Abakuk wafanyina pamwing ap kusambish kutong anch Yehova kabangidinap kand antu end ap kakusalap chom kanang. Ov, niyey wiyovilap kal mwamu?

5. Yom ik tukutwisha kwilejin ku mukand wa Abakuk? (Tal chipich cha kwinsambishin.)

⁵ Ov, Abakuk wipula yipul yiney mulong wading walikin kal kuchingejin mudiay Yehova ni mu kushilamu kwend? Bwat kwau! Abakuk wading umwitin Yehova ukwash mulong wa kwidjidjek ni milong yend, chinech chimekeshin anch wading uchidandamedin kuchingejin mudiay Yehova. Abakuk wading kamu wiyakamishin ni wading mu kanvundangesh. Kadingap kateshina mulong wak Yehova wading uchingedin kupwish yom yiney ni mulong wak Wading ulikidil anch aman mar nakash. Kumupepil Abakuk kudi Yehova mulong wa kufund milong yend kutufundishin dilejan dia usey nakash. Tufanyidinap kwov wom wa kumulej Yehova milong yetu ap kwidjidjek tukweta. Pakwez, utulejin nich rukat kumulembil ni kumulej kamu patok mutapu twiyovila. (Kuseng 50:15; 62:8) Jinswir 3:5 utukasikeshin etu awonsu anch: “[Muchingejina Yehova] ni muchim wey wawonsu. Kangal wachinge[jin] ronganyin rey amwiney.” Abakuk wasadina mazu minam mu mwom wend.

6. Mulong wak chidi cha usey kulembil?

⁶ Abakuk wachingejina mudiay Yehova Tatukwend ni Murunend, ni wakwata mupak wa kumusejin piswimp nakash. Abakuk kiyakamishap kwend ching pa mulong wend ni kusal usu wa kuupwish amwinend. Pakwez, walembila piur pa mutapu wading wovilay ni piur pa yakamish yend. Chinech chidi chilakej chiwamp kudi etu. Yehova, Mwin Kutesh malembil utulejin kumekesh ruchingej retu mudiay ndiy kusutin kumulembil ni kumulej milong yetu. (Kuseng 65:2) Anch twasal mwamu, tukuman mutapu wakwilay Yehova ku malembil metu. Tukuman mutapu utubwikatinay kwa rukat chisu chitwongojinay ni kututakel. (Kuseng 73:23, 24) Ukutukwash kutesh mutapu umenay milong yetu, chikalap nchik milong turishina nich. Kumulembil Yehova wawiy kamu mutapu umwing wa kumekesh anch tumuchingejidin.

MUTESHA YEHOVA

7. Mutapu ik wasalay Yehova chisu chamulejau kudi Abakuk milong yend?

⁷ Tang Abakuk 1:5-7. Kupwa kwa Abakuk kumulej Yehova yakamish yend, wafanyina kwiyipul piur pa mutapu ukwakulay Yehova. Mudi Tatuku wa rukat, Yehova wamana mutapu wading wiyovilay Abakuk. Wading wij anch Abakuk wading umen mar ni wading umwilembidin chakwel amukwash. Chawiy Yehova kamupupap Abakuk pakwez wamuleja yom Yafanyinay kusal pakad kulab kudi in Yuda ading akad kushinshaman. Chawiy, Abakuk ndiy wikala pamwing ap muntu wa kusambish walejau kudi Yehova anch dipup dia in Yuda diafanyina kushik pakad kulab.

8. Mulong wak chakul cha Yehova chading chishalijangen ni mutapu wading uchingejinay Abakuk?

⁸ Yehova wamurumburila Abakuk anch Wading piswimp ni kupwish uyimp. Wafanyina kuyipup antu ayimp nau in chisum a mu Yuda. Kusutin kulond anch yom yiney yikusadik “mu machuku minam,” Yehova wamekesha anch dirumburish diafanyina kwez pachidiay Abakuk mwom ap pading pachidiau in Isarel ading amunyingumukina aom. Abakuk kachingejap anch Yehova ukutwish kumwakul mu mutapu winou. In Kalidey ap in Babilon ading kudjambok nakash. Ading ni chisum nakash kuyisutamu in Isarel, ading ijaku mbil ja Yehova. Chawiy mulong wak Yehova wasadina muchid winou uyimp wa apagan mulong wa kuyipup antwend? Yiney yafanyina kuletish mar nakash mu Yuda.a (Tal mazu ma kwinshin.) Mutapu ik wafanyina kwiyov anch yeya wading Abakuk?

9. Yipul ik yikwau yipulay Abakuk?

⁹ Tang Abakuk 1:12-14, 17. Ap anch Abakuk wijika anch Yehova ukuyisadin in Babilon mulong wa kuyipup antu ayimp ading amunyingumukina, wading uchid kal mu kanvundangesh. Pakwez wading wikepishin ni wakwata mupak wa kudandamen kumuchingejin Yehova. Chawiy, walonda anch Yehova wadandamena kwikal “Diyal” diend. (Kuvurik Yijil 32:4; Isay 26:4) Abakuk wading ni kashinsh anch Nzamb udi mwin rukat ni muwamp, chawiy kwovap wom wa kumwipul Yehova yipul yimwing mudi anch: Mulong wak Yehova wading ulikidil yom yiyimp mu Yuda yipandakan ni antu end kuman mar nakash mwamu? Mulong wak walikay kupwish yom yiney pakad kulab? Mulong wak Mwin Dikand Diawonsu “unenetin” ni kudiul uyimp wading usadikina kwi ndond kwawonsu? Chawiy, Yehova udi “Utumbila,” ni “mes [mend] mishitwil nakash chakwel kuman yom yiyimp.”

10. Mulong wak tukutwish kwiyov yisu yimwing mudi mwiyovay Abakuk?

¹⁰ Yisu yimwing tukutwish kwiyov mudi mwiyovay Abakuk. Tukat kumutesh Yehova. Tukat kumuchingejin ni kwilej Dizu diend dikata kukasikesh ruchingej retu. Tukat kutesh kand piur pa kushilamu kwend chisu tuteshina yom yitufundishinau kudi dirijek diend. Pakwez tukutwish kwiyipul anch, ‘Chisu ik chikupwa mar?’ Tukutwish kwilejin ku yom yikwau yasalay Abakuk.

MUCHINGELA YEHOVA ASAL

11. Mupak ik wakwatay Abakuk?

¹¹ Tang Abakuk 2:1. Mambamb ma Abakuk ni Yehova mamuletina chisambu cha mu manangu. Masala anch akwat mupak wa kumuchingel Yehova chakwel asal. Abakuk wamekesha kand mupak wend chisu chalonday anch: “Am nikez kachingel zong kushik ku chisu chikeza kalejanay Nzamb kadimu.” (Abakuk 3:16) Atushalapol a Nzamb akwau adandamena kuchingel nich kushimpish muchim chakwel Yehova asal. Yilakej yau yitukasikeshin mulong yimekeshin anch niyetu tukutwish kusal mwamu.​—Mike 7:7; Jakobu 5:7, 8.

12. Yom ik tukutwisha kwilejin ku chilakej cha Abakuk?

¹² Yom ik tukutwisha kwilejin ku mupak wa Abakuk? Chakusambish, tufanyidinap kwimik kumulembil Yehova chikalap nchik milong tukweta. Cha kaad, tufanyidin kutesh yom yilondinay Yehova kusutin Dizu diend ni dirijek diend. Ni cha kasatu, tufanyidin kuchingel nich kushimpish muchim chakwel Yehova asal ni kuchingej anch ukupwish milong yetu pa chisu chikatinay. Anch twamwimburij Abakuk, tukwikal ni chisambu cha mu manangu ni tukutwish kujijaman. Ruchingej retu rikutukwash kwikal ashimpishina muchim ni kwikal ni musangar chikalap nchik milong turishina nich. Tukwet kashinsh anch Tatukwetu wa mwiur ukwakul.​—Rom 12:12.

13. Mutapu ik wamukasikeshau Abakuk kudi Yehova?

¹³ Tang Abakuk 2:3. Tukutwish kwikal nich kashinsh anch Yehova wikala ni musangar mulong Abakuk wakwata mupak wa kumuchingel Ndiy chakwel asal. Mwin Dikand diawonsu wading wij nawamp mar mading mamenay Abakuk, chawiy Ndiy wamwongoja muprofet ni wamukasikesha nich rukat anch ukwakul ku yipul yend. Abakuk wafanyina kwikal ni ruchingej anch yakamish yend yikupwa piswimp ap. Chidi mudi Yehova wading umulejin Abakuk anch: “Ey shimpish kwey muchim ni nchingejina. Nikwakul ku malembil mey, ap anch chamekan mudi yilabin.” Yehova wamuvurisha Abakuk anch Wading wakwatin kal mupak mulong wa chisu Chikuwanyishay kushilamu Kwend. Chawiy wamukasikesha Abakuk kudandamen kuchingel. Kupwa, muprofet kafanyinap kwikal nich yovil ya kuziy.

14. Tufanyidin kukwat mupak wa kusal yom ik chisu turishina ni yakamish?

¹⁴ Niyetu tufanyidin kumuchingel Yehova chakwel asal. Tufanyidin kand kutesh kamu nawamp yom yitulejinay. Kupwa tukwikal ni kashinsh ni chisambu cha mu manangu chikalap nchik yakamish tukweta. Yesu watukasikesha kulik kushinshikin pa “yisu ap pa yirung” yakadiau kutulej kudi Nzamb. (Midimu 1:7) Tufanyidin kuchingej anch Yehova wij nawamp nakash chisu chifanyidinay kusal. Chawiy lel, tufanyidinap kuziy, pakwez tufanyidin kwikal ikepishina, ashimpishina muchim ni akweta ritiy mudiay Nzamb. Ni pituchingedina, tufanyidin kusadin chisu chetu nich manangu ni kumusadin Yehova nich usu wetu wawonsu.​—Marko 13:35-37; Galatia 6:9.

YEHOVA UKAT KUPAN MWOM KUDI ANTU AMUCHINGEJIDINA

15, 16. (a) Kushilamu ik tukutwisha kutan mu mukand wa Abakuk? (b) Kushilamu kwinoku kutufundishin ik?

¹⁵ Yehova washilamu anch: “In kutentam akez kapand mulong wa ritiy rau,” ni “ngand yikez kizul nich ronganyin ra uyaj wa [Yehova].” (Abakuk 2:4, 14) Mwaning, Yehova ushidinamu kupan mwom wa chikupu kudi antu ashimpishina muchim ni amuchingejidina.

¹⁶ Kushilamu kwinoku tutanina mu Abakuk 2:4 kudi kwa usey nakash mulong kambuy Pau ujimbwil kushilamu kwinoku tupamp tusatu mu mikand yend! (Rom 1:17; Galatia 3:11; Hebereu 10:38) Tukutwish kwikal nich kashinsh anch chikalap nchik milong turishina nich, tukuman kuwanyin kwa kushilamu kwa Yehova anch twamuchingejin ndiy. Yehova ukatin anch tushinshikin pa ruchingej retu mulong wa machuku ma kurutu.

17. Yehova utwinkishin kashinsh ka kutusadin ik anch twamuchingejin?

¹⁷ Mukand wa Abakuk ukwet malejan mawamp mulong wa antu awonsu ashicha mu machuku minam ma nsudien. Yehova ushidinamu mwom wa chikupu kudi muntu win mwawonsu utentamina umuchingejidina ndiy. Chawiy el tudandamen kukasikesh ruchingej retu mudiay Nzamb chikalap nchik milong ni yakamish turishina nich. Yom yamulejau Abakuk kudi Yehova yitwinkishin kashinsh anch Ukutukwash ni kutupandish. Utulejin anch tumuchingejin ni tuchingel nich kushimpish muchim chisu chatekinay kal chakwel Want wend uyikel pa divu. Pa chisu chinicha, divu dikwizul nau antu in chisambu ni akweta musangar amwifukwidila Yehova.​—Mateu 5:5; Hebereu 10:36-39.

MUCHINGEJINA YEHOVA CHAKWEL WIKAL NI MUSANGAR

18. Mazu ma Yehova mamupukuna mutapu ik Abakuk?

¹⁸ Tang Abakuk 3:16-19. Yom ik yalonday Yehova yamupukuna Abakuk nakash. Abakuk watongijokina pa yom yishimokishena yasalay Yehova mulong wa antu End a pasak. Yom yiney yasala anch ruchingej rend mudiay Yehova rikasikan. Wading nich kashinsh anch Yehova ukupwish milong pakad kulab! Yom yiney yamukasikesha muprofet ap anch wading wij anch ukudandamen kuman mar mu chisu kanang. Abakuk kidjidjekap kand. Pakwez, wikala kamu ni ritiy anch Yehova ukumupandish. Chawiy, mazu malondinay mu verse wa 18 makutwish kwikal mazu ma ruchingej madia pakach pa mazu majim ma ruchingej tutanina mu Bibil. In kwilej amwing itiyijin anch mazu minam marumburikin anch: “Nikumatok mulong wa musangar mwi Nsalej; nikuja maj mu kusanger Dizu dia Nzamb.” Dilejan diwamp mudi ik kudi etu! Yehova katwinkishinap kusu ching kushilamu kuwamp mulong wa machuku ma kurutu, pakwez utukasikeshin kand anch piswimp ap ukuwanyish kushilamu kwinoku.

19. Mutapu ik tukutwisha kwikal akasikeshinau kudi Yehova mudi mwamukasikeshau Abakuk?

¹⁹ Dilejan dijim ditwilejidina mu mukand wa Abakuk didi dia kumuchingejin Yehova. (Abakuk 2:4) Mulong wa kudandamen kumuchingejin Yehova, tufanyidin kukasikesh urund wetu ni ndiy. Chawiy, yom tufanyidina kusal yawiy ey. (1) Kudandamen kumulembil, kumulej Yehova piur pa milong ni yakamish yetu yawonsu. (2) Kutesh nawamp yom yitulejinay kusutin Dizu diend, ni kulondul wintakel upaninay kusutin dirijek diend. (3) Ikal ushinshamena ni ushimpishina muchim piuchingedina anch Yehova awanyish kushilamu kwend. Yiney yawiy yasalay Abakuk. Ap anch wading wiyakamishin nakash chisu chasambishay kwambamb ni Yehova, pakwez kwinsudien wikala ukasikeshinau ni wikala ni musangar! Anch twamwimburij Abakuk, niyetu tukwikal akasikeshinau kusutin kutubwikat kwa rukat kudi Tatukwetu wa mwiur Yehova. Kukasikesh ik kujim tukutwisha kutambul mu mangand minam mayimp?