‘Kushik Chisu ik Nifanyidina Kukutazuk Mulong wa Ukwash?’
Jayne wadilanga anch: “Nisotin kwam kuswan kupwa!” Wadinga uyedil kanser, ni wapalangana mu mujimbu wend wawonsu. Dijuku diend ni arund nend adinga ni kusot anch ing mayej ni kusansan kwend kupwa! Adinga ni kumwilembil Nzamb chakwel amukwasha. Ov, Nzamb wadinga ni kuyitesh? Ov, wayakula?
NZAMB wij nawamp mashakamin ma antu. Dizu diend, Bibil, dilondil anch: “Yawonsu yatangau yikat kukimuk ni kwakam mu kusansan pamwing.” (Rome 8:22) Nzamb wij anch kudi yitot ya tunan twa antu adia mudi Jayne, ovila kuswan pichuku ni pichuku, chikala ku mujimbu, mu yovil ap mu manangu. Nzamb uyimening antu mamiliyon 800 alelinga ni nzal pichuku ni pichuku, antu akwau mamiliyon ayimeshin mar mu majuku mau ni anvaj avud iyakamishin nakash piur pa machuku ma kurutu mulong wa anau. Ov, watonginap kal anch kudi chom chikutwishay Nzamb kusal? Chakin kamu, chitukatininga kuyikwash akatish netu, ov, Nzamb kakutwishap wasot kuyikwash antwend awonsu atangay?
Anch wipulap kal yipul yiney, kiudiap kwey amwiney wayipula kal. Pasutil kal mivu 2600 ni kusut, ikundj umwing ushinshamena, Abakuk, wiyova mudi mwiyovilau antu avud nlel, ni wamwipula Nzamb anch: “Ov kushik ku chisu ik, A Yehova, nifanyidina kubarok nich dizu dijim mulong wa kwit ukwash wakad ey kwintesh? Ov kushik ku chisu ik nikukutazuka winkwash mu ubaj wakad ey kwimpandish? Ov mulong wak winlikina nitala yom yiyimp, ov mulong wak udandamedina kutal riyind? Ov mulong wak ruvund ni ubaj yidi kurutu kwam, ni mulong wak kubudikina kutembijan ni matend?” (Abakuk 1:2, 3) Abakuk, muprofet mwin Yuda, wamana amwinend yisal yiyimp ni yisal ya chisu mu machuku mend. Nlel, yisal mudi yiney yawiy yikadila kal jinsangu jiyovishina kuyip antu in riy.
Ov, wapipesha kwiyakamish kwenday Abakuk? Bwat. Ndiy watesha ku yipul yipulay Abakuk ni muchim utok ni wamwongoja ni wamukasikesha. Yehova Nzamb wakasikesha ritiy ra Abakuk ni wamukana anch Ukez kupwish mar. Uruu wa Nzamb wa ruchingej ukutwish wakwinkish niyey kashinsh, mudi muwadinga ku mutambu wenday Jayne ni dijuku diend. Mutu ulondwila ou, ukwakul ku yipul yiney: Mutapu ik tukutwisha kwikal nich kashinsh anch Nzamb ukat kutubangin? Chom ik chikezay Nzamb kusal mulong wa kupwish mar, ni chisu ik?