Mutapu Utwija Anch Chakin Kamu Nzamb Utubangidin

CHIPUL chinech achipula kal pakur pakwez chidi cha usey, ma mamiliyon ma antu miyipwiling chipul chinech mu tunan twa mivu: Anch Nzamb utukatining, mulong wak lel kudi mar mavud mwamu? Ukutwish pamwingap witiy anch, ang umukatining muntu kanang, ukusotap anch muntu winou amana mar, ni anch udi mu yakamish, ukusot kusal usu wey chakwel umukwasha. Pa chinech, antu avud atongining anch Nzamb kakatap kutubangin mulong wa mavud madia mu mangand. Chawiy lel, chidi cha usey anch, tushinshikina bil cha kusambish uman ulejena anch Nzamb utukatining, ni anch Nzamb utubangidin.

Yitang Yidi Uman wa Rukat ra Nzamb

Yehova Nzamb udi “watanga diur ni divu ni karung ni yawonsu yidiamu.” (Midimu 4:24) Anch twashinshikin yom yatangay Yehova, chakin kamu tukushiken ku kulond anch ukat kutubangin. Tongin bil, mudi chilakej, piur pa yom yikata kukusangaresh ni kukuletin mazang. Ov, ukat kusanger yakudia yitadila? Yehova wela kwend kutang mulad umwing kusu wa yakudia mulong wetwetu. Pakwez, ndiy watanga milad kushalijan ya yakudia yitadila mu matam metu. Chawiy chimwing, Yehova watanga milad kushalijan ya mitond, ya yisalamb ni jimpat pa divu mulong wa kutusangaresh mu mwom.

Shinshikin kand mutapu watutangau. Chovil chetu cha masip, ukaliweny wetu wa kusanger mizik ni ukaliweny wetu wa kusanger yom ya ufun yidiap kwau ya usey chakwel anch twikala aom—pakwez yom yiney yawonsu yidi yipan yidiokila kudiay Nzamb yisangareshina mu mwom wetu. Tongin kand pa urund wey ni antu akwau. Nany wakad kusangerang urund wa chirungul ni arund awamp ap kumubwikataku kudi muntu ukatininga nakash? Ukaliweny winau wa kukat udi chipan chidiokila kudiay Nzamb utukatininga! Nzamb wamutanga muntu nich ukaliweny wa kukat, chawiy ngikadil yiney yifanyidin kwikal umwing wa ngikadil ya untu wa Nzamb.

Bibil Utwinkishin Kashinsh ka Rukat ra Nzamb

Bibil utulejin anch Nzamb udi rukat. (1 Yohan 4:8) Rukat rend rimekedin mu yitang yend ni mu Dizu diend kand, Bibil. Chilakej, Bibil utwinkishin umutakel utukwashininga chakwel twikala nich ukash uwamp wa mujimbu, utukasikeshining twikala isikena mu yom yawonsu, ni utubabeshin piur pa kuleu maar ni kupumb kudia.—1 Korint 6:9, 10.

Bibil uletin kand yiyul yiwamp piur pa urund pakach pa antu, utukasikeshin tukatijana muntu ni mukwau ni kuyisadil antu akwau nich kalimish, ni ranaken. (Mateu 7:12) Ufishin nich yisal ni ngikadil yiletininga mar—ris, ruchochot, maku mayimp, kusal masandj ni kujipan. Anch muntu ni muntu wasal usu wa kushakam kukwatijan nich chiyul chidia mu Mifund, chakin kamu kukwikal mar makemp mu mangand.

Chijingidij chipandakena kujimb cha rukat ra Nzamb, chadinga kumupan Mwanend, Yesu, chakwel apana mulambu wa difut mulong wa antu. Yohan 3:16 ulondil anch: “Nzamb wakata ngand, ndiy wapana Mwanend wa kuval kwend umwing chakwel mwawonsu ukwitiya kudiay ndiy kakujiyip, pakwez ukwet kal mwom wa chikupu.” Chawiy, Yehova watenchika kal mutapu wa kudiosh rufu ni milad yawonsu ya mar chikupu.—1 Yohan 3:8.

Chakin kamu, kudi uman uvud ulejena anch Yehova utukatin. Chawiy lel, yom yiney yilejen anch kakatap kusangar patumenay tumen mar. Ukez kusal cha kusal chakwel apwisha mar. Tuswiridinap kutongin yom ya kutongin pa mulong winou—Bibil utulejin kamu nawamp mutapu ukezay Nzamb kupwish mar.

[Chipich chidia pa paj wa 4]

Ukaliweny wa kukat udi chipan cha Nzamb mwin kukat