Nzamb Ukupwish Mar Mawonsu Piswimp ap

“Ov, kushik chisu ik, A Yehova, nifanyidina kutazuk mulong wa kwit ukwash pakad ey kwintesh? Ov, kushik chisu ik nikukutazuka winkwash mulong wa chisum pakad ey kwimpandish?” (Abakuk 1:2, 3) Minam madi mazu ma Abakuk, muntu muwamp watapa dilau dia Nzamb. Ov, kwit kwend kwading kumekeshin kuburen ritiy? Chidiap mwamu! Nzamb wamukasikesha Abakuk anch watekin kal chisu chikupwishay mar mawonsu.​—Abakuk 2:2, 3.

Anch ey ap muntu mukwau ukatina umen mar, chiswapeling kutong anch Nzamb ulabin kupwish mar, anch wafanyinang kupwish mar kapamp kamwing. Chakin, Bibil utwinkishin kashinsh anch: “[Yehova] kalabilap mulong wa kuwanyish kushilamu kwend mudi mukat kutongau antu amwing. Ndiy ukat kukushimpishinany muchim, mulong kasotilap muntu ap umwing kusheshik, pakwez usotil antu awonsu kukarumuk kudiokal ku yitil yau.”​—2 Pita 3:9.

CHISU IK CHIKUPWISHAY NZAMB MAR?

Piswimp ap kamu! Yesu wamekesha anch antu a chirung chimwing akuman yijingidij yimwing ya pakampwil yikumekesha anch tudi mu machuku ma nsudiel ma “mangand.” (Mateu 24:3-42) Kuwanyin kwa uprofet wa Yesu mu chirung chetu kumekeshin anch chisu chikupwishay Nzamb milong ya antu chidi kamu piswimp ap.a

Pakwez mutapu ik ukupwishay Nzamb mar mawonsu? Padingay Yesu pa divu, wamekesha ukash wa Nzamb mu kudutish mar ma antu. Shinshikin yilakej yimwing.

Mar ma Chitangil: Yesu nau in kwilejend pading paukinau Karung wa Galalia, kwatuta rinkind mukash wakimba kwinzwish waat ni mem. Pakwez Yesu wamekesha anch ndiy ni Tatukwend akwet usu piur pa yitang. (Kolosay 1:15, 16) Yesu walonda kwend anch: “Ikuchika kamu kwey zong!” Yom ik yashikena? “Rinkind waneneta, kwikal kamu pukupuku zong.”​—Marko 4:35-39.

Mayej: Yesu ading amwij nawamp mulong wa ukaliweny wend wa kwok amputames ni ayilim, pamwing nau antu ading ayedina kafef, musong wa mak ni mitapu yikwau ya mayej. “Wayoka kand ayej awonsu.”​—Mateu 4:23, 24; 8:16; 11:2-5.

Kuburen Yakudia: Yesu wasadina usu wamwinkau kudi Tatukwend mulong wa kuvudish yakudia. Bibil ulondin anch tupamp twaad pa chisu cha mudimu wend, wadisha tunan twa antu.​—Mateu 14:14-21; 15:32-38.

Rufu: Antu asatu avumbulau kudi Yesu amekeshin patok kamu anch Yehova ukwet usu wa kuyivumbul afu. Umwing pakach pa antu avumbulau wading wasalang kal machuku manying mwi nzay.​—Marko 5:35-42; Luka 7:11-16; Yohan 11:3-44.