Tuyakany ni Musangar

Anany tufanyidina kwaak ni musangar? Awonsu akata kwez ku yikumangan ya win Kristu—ezina kampamp ka kusambish ap arund alabina kal. (Ro 15:7; Heb 13:2) Akutwish kwikal anamakwetu in Kristu adiokila ngand yikwau ap in Kristu alikina kal kusal mudimu wa kulejan chad ez ku yikumangan kapamp ka kusambish kupwa kwa mivu yivud. Tong bil mutapu ukutwisha kwiyov mu yisu mudi yiney. Ov, ukutwishap kusanger moy wa musangar? (Mt 7:12) Umenap anch chidi cha usey nakash kusal usu wa kuyinkish antu moy ku Chot cha Want kurutu ap kupwa kwa yikumangan? Kusal mwamu kukat kulet musangar ni kukasikesh rukat ni kumutumbish Yehova. (Mt 5:16) Pakwez, chikukasikan kwambamb ni muntu mwawonsu wezang ku yikumangan. Chad, antu ezang akutwish kwiyov nawamp anch aman usu tusadina mulong wa kuyak.a

Kwakan kuwamp kukat kumekan chisu chawonsu, kulik ching mu yisu ya pakampwil mudi ku Chivurikish. Pakatau antu ezina kapamp ka kusambish ku yikumangan kuman ni kujingunin rukat ra win Kristu, akutwish kamu kumushiman ni kwimbomb netu mu difukwil diakin.—Yh 13:35.