Mutapu Tukutwisha Kukudish Rukat Mulong wa Nzamb ni Mutej Netu

Ap anch in Kristu kadiap kand mwinshin mwa Chijil cha Moses, yijil yaad yipandakena kujimb—kumukat Nzamb ni kumukat mutej netu—chidi chom chitwitinay Yehova. (Mt 22:37-39) Rukat riner udiap uswan. Tufanyidin kurikudish. Mutapu ik? Mutapu umwing wa usey udi kusutin kutang Bibil dichuku diawonsu. Chisu tushinshikidina mitapu kushalijan ya wuntu wa Nzamb mudi mulejenau mu Mifund, tukat “kubaz kuwap kwa [Yehova].” (Kus 27:4) Mudi chibudikin, rukat retu mulong wendendiy rikukul ni mutapu wetu wa kutong ukwikal mudi wendendiy. Chinech chikutukasikesh kulam yijil ya Nzamb, kuwejinaku ni chijil cha kumekesh kwipan kwa rukat mulong wa antu akwau. (Yoh 13:34, 35; 1Yo 5:3) Yiney yidi mitapu ya kusal anch kutang kwa Bibil kwikala kusangareshina:

• Sadin Mutapu wey wa Kutong ni Andjikamu Yovil yey. Tong bil mudi udi kwinikwa. Yom ik ukumana, ukutesha ni madjimb ukwova? Yisu yikutwisha kwikal yovil ya antu isambidinau?

  

• Swimp mitapu ya kusal. Tal yom yimwing yifanyidina kusal: Tang ni dizu dia piur, ap londul ni kutesh mazu makwatau kal. Tang piur pa rusangu ra muntu kanang wa mu Bibil pa ndond pa kutang mashapitre malondulijadina. Chilakej, sadin Appendice A7 ap B12 mu Les Saintes Écritures. Traduction du monde nouveau (avec notes et références) mulong wa kutang piur pa Yesu. Tang shapitre wakabuj mudioshinau mufund wa dichuku. Tang mikand ya Bibil mu mutapu uyilondulijadina.

  

• Tang mulong wa kutesh. Kutang ap shapitre umwing dichuku diawonsu mulong wa kutesh ni kutongijok kusutinamu nakash kutang mashapitre mavud mulong kwau wa kupwish yom utangina. Shinshikin yom mutapu uyidia. Tal kachom pa kachom. Sadin makart ni mareferans marijinal. Kimb yom yiwakad kutesh nawamp. Anch chiswapel, sutish chisu chimwing mu kutongijok mudi chiwasutishang mu kutang.