Kulejan ni Kufundish Kudi kwa Usey Mulong wa Kwikadish Antu in Kwilej

Yesu wayileja in kwilejend kuya ni kuyikadish antu in kwilej. (Mt 28:19) Kusal mwamu kwitin kulejan ni kufundish. Chisu ni chisu, tufanyidin kwiyipul anch, ‘Mutapu ik nikutwisha kwitenchik mulong wa mudimu winou wa usey wa kwikadish antu in kwilej?’

KULEJAN

Pa ndond pa kuchingel anch antu eza kudi etu, tufanyidin kamu kuya kuyikimb antu a ‘kashinsh awanyidina.’ (Mt 10:11) Chisu twipanina mu mudimu wa kulejan, tukweting kamu nkeu ja kuman mitapu ya kwambamb nau antu ‘akata kusut’? (Mid 17:17) Lidi wikala mwin kwilej kusutin mushiku wa kulejan wa kambuy Paul.—Mid 16:13-15.

TAL VIDEO DANDAMEN KULEJAN ‘PAKAD KAZIY’—KUPAN UMAN WA KUKASHIMWISH NI KU CHIKUMBU NI CHIKUMBU, NI KUPWA AKUL KU YIPUL YILONDWILAKU EY:

• Mu midimu yend ya dichuku ni dichuku, mutapu ik wamekeshay Samuel anch wading ni mushiku wa kukimb mutapu wa kukun mbut ja uyakin?

• Mulong wak tufanyidin kudandamen kusadin mitapu yawonsu ya kulejan?

• Anany ufanyidina kulej uruu wa Want mu midimu yey ya dichuku ni dichuku?

KUFUNDISH

Mulong wa kwikadish antu in kwilej, tufanyidin kusal yom yivud kulik kwau ching kuyinkish antu mikand. Mulong wa kuyikwash antu kukul mu spiritu, tufanyidin kuyichirikin ni kutakel malejan ma Bibil. (1Ko 3:6-9) Pakwez, yidi nchik anch usu wetu tusadina mulong wa kumufundish muntu kanang uyakin wa Want uletinap yibudikin yiwamp? (Mt 13:19-22) Tufanyidin kudandamen kukimb antu akweta michim yidia mudi “divu difukina.”—Mt 13:23; Mid 13:48.

TAL VIDEO DANDAMEN KULEJAN ‘PAKAD KAZIY’—NDOND YIDIA ANTU AVUD NI KWIKADISH ANTU IN KWILEJ, NI KUPWA AKUL KU YIPUL YILONDWILAKU EY:

• Mutapu ik wichilay Salomon ni Mariy mem kwi mbut ja uyakin mu muchim wa Ezekiel ni wa Abigayil?

• Chisu chifanyidina kwikal chitongijok chetu mu mitapu yawonsu ya kulejan, kuwejinaku ni kupan uman pa ndond yidia antu avud?

• Mutapu ik tukutwisha kukasikeshin nakash pa kuyifundish antu akwau uyakin?