‘Paul Wamujikitisha Nzamb ni Wikasikesha’

Chisu chatesha chikumangen cha ku Rom anch Paul wezin, chisak cha akadivar chaya kumuchingel mu chintampu cha akilometre 64 mulong wa kumusankan. Kwipan kwau kwa rukat kwikala ni usu ik padiay Paul? ‘Chayimanay Paul wamujikitisha Nzamb ni wikasikesha.’ (Mid 28:15) Ap anch Paul wading mwin kukasikesh yikumangen yendinangay, chisu chadingay mu rukan ndiy wakasikeshau chad.​—2Ko 13:10.

Nlel atulam a munyingumuku akat kwendin yikumangen yivud mulong wa kuyikasikesh akadivar nau anambaz. Mudi antu awonsu a Nzamb, yisu yimwing akat kuziy ni kwiyakamish. Chisu chikwezay kalam wa munyingumuku ni mukajend kwendin chikumangen chen, yom ik ukutwisha kusal chakwel uyikwasha kwikal atakamena, mulong “etu awonsu tukwashijanany”?​—Ro 1:11, 12.

• 

  Ikalaku ku yikumangan mulong wa mudimu wa kulejan. Kalam wa munyingumuku ukwikal ukasikeshinau anch in kulejan ipan mulong wa kutaninamu mu rubing ra pakampwil. (1Tes 1:2, 3; 2:20) Sal uchibol nkwasha ngond ukwezay kalam wa munyingumuku. Ov, ukutwish kwipan mulong wa kulejan pamwing ni kalam wa munyingumuku ap ni mukajend ap kuyitwal ku malejan mey ma Bibil? Akat kusanger kulejan nau in kulejan kushalijan, kuwejaku kand nau antu achidia asu ap aburedina ukaliweny kanang mu mudimu wa kulejan.

• 

  Ikal mwin kwakan. Ov, ukutwish kuyinkish ndond ya kulal ap yakudia? Mwamu kalam wa munyingumuku ni mukajend akuman anch uyikatin. Kachingejidinap anch uyinkisha yom yivud nakash.​—Lk 10:38-42.

• 

  Tesh ni sadin umutakel ni yiyul yend. Kalam wa munyingumuku ukat kutukwash nich rukat mutapu tukutwisha kuwapish mudimu wetu kudi Yehova. Yisu yimwing, ukutwish kutwinkish yiyul yikash. (1Ko 5:1-5) Chikat kumuletin musangar anch waman anch tuziyidin.​—Heb 13:17.

• 

  Mekesh kujikitish. Muleja kulam wa munyingumuku ni mukajend mutapu utanidinamu mu usu usadinau. Ukutwish kusal mwamu amwiney ap kusutil ku kuyifundin mukand.​—Kol 3:15.