Uchibol

Tukat kusadin nawamp usu wetu anch twitekin mipak ya mu spiritu. (1Ko 9:26) Kwitekin mipak kukat kutukwash kusadin nawamp chisu chishadinaku kurutu disudien dia mangand minam dishik. (Ef 5:15, 16) Ov, utonginany nchik anch pa chisu cha difukwil dia mu dijuku dien witekinany mipak ya kuwanyish mu muvu wa mudimu usu wezina ou? Mulong wa kukukwashany, mashakamin winou wisambidin mipak kushalijan ukutwisha kutongijokinany mu malembil.​—Jk 1:5.

Chilakej, ov antu awonsu a mu dijuku akutwish kumukwash muntu ap umwing chakwel asambish uchibol wa rawonsu? Anch widjidjekin anch ukutwishap kuwanyish asaa itanau, ukutwish kwambamb ni ayibol amwing akweta mashakamin mud meyey. (Jnsw 15:22) Pamwing ap ukutwish kumwipul chibol umwing pa chisu cha difukwil dien dia mu dijuku. Kupwa fund program ukutwisha kulondul. Anch wasadinap kal uchibol pakur, shinshikin mashakamin mey chakwel umana anch chitwishikin kand kuuchirikin katat.

Ov, antu amwing a mu dijuku dien akutwish kusal uchibol nkwash mwi ngond umwing ap avud? Anch ukwetap usu, ukutwish kusal uchibol nkwash kusutil kulejan asaa akemp kusu dichuku diawonsu. Anch ukwetap chisu chivud cha kulejan mukach mwa rubing mulong ukwatiken nakash ap mulong ud ku shikol, pamwing ap ukutwish kutond ngond muukwetanya konje ap ukweta mbing jitan. Fund chisu utongina kusambish uchibol nkwash ni program ukusambisha kulondul. —Jnsw 21:5.

TAL VIDEO IKAL UTAKAMENA . . . CHIBOL, NI KUPWA AKUL KU CHIPUL CHILONDWILAKU ECH:

• Yom yamushikena nambaz Aamand yitufundishin ik piur pa mutapu ukatay Yehova kuyibaning nich rukat antu akata kwipan mulong wa kusal uchibol?