Mulong Wak Nzamb Kakwakulangap Malembil Mamwing?
Yehova Nzamb udia Tatukwetu wa mwiur, ukatining kutesh malembil metu ma win kashinsh. Pakwez kud yom yimwing yikutwisha kusal anch alik kwakul malembil metu. Yom yiney yom ik, ni yom ik tufanyidina kulam mu manangu chisu tulembila? Tushinshikinany yom yimwing yilejenay Bibil.
‘Piukulembilanya kangal wachirokinany mazu mamwing pa mamwing.’—Mateu 6:7.
Yehova kakatinap anch tuchirokin malembil twalamina kal mu manangu ap matutangina ma kutang. Pakwez, ukatin anch tumulej yom yidiokila ku muchim wetu. Tong mutapu ukwiyova anch ukwet murund ukata kukulej yom ya mutapu umwing ni kuyichirokin dichuku diawonsu. Arund awamp akat kulejijan yitongijok yidiokila mu muchim. Chawiy, anch twamulej Tatukwetu wa mwiur yom yidiokila mu muchim wetu, tumekeshin anch tumukwatin mud murund netu.
“Ukat kwitany wakad kutambulany, mulong witilany nich michim yiyimp.”—Jakobu 4:3.
Tumen patok anch Nzamb kakutwishap kwakul malembil metu anch twamwit yom twija nawamp anch utujidikin kuyisal ap kuyikal nich. Chilakej, anch muntu usengena masengan ma nfalang wamulembil Nzamb chakwel amukwasha kudia nfalang, ov, utongin anch Yehova ukwakul malembil minam? Nzamb utulejin patok anch ukisin ris ni yitiyij ya kutok pa mujimbu. (Isay 65:11; Luka 12:15) Tukutwishap kuchingej anch Yehova ukwakul malembil ma mutapu winou! Chakwel Nzamb akul malembil metu, tufanyidin kwikal nich kashinsh anch tumulembil kukwatijan ni yom yitufundishinay mu Bibil.
“Muntu ukata kupuwoj matu kulik kutesh yijil, muntu [winou] ni kulembil kwend kutakanen.”—Jinswir 28:9.
Pakur, Nzamb kateshap malembil ma antu ading amubwambwidina. (Isay 1:15, 16) Nzamb kaswimpinap yitongijok yend. (Malakiy 3:6) Anch tukimbin anch Nzamb akula malembil metu, tufanyidin kusal usu wa kushakam kukwatijan ni yijil yend. Chad, chid nchik anch twasala yom yiyimp pakur? Ov, Yehova kakutwishap katesh malembil metu? Bwat! Nzamb ukutwish kutulikishin anch twakarumuk ni kusal usu wa kumusangaresh.—Midimu 3:19.