Muntu Win Mwawonsu Ukatin Kwikal ni Musangar mu Machuku ma Kurutu
Mashakamin ma mutapu ik ukatina kwikal nich mu machuku ma kurutu? Mud antu avud, niyey ukatin kwikal ni mwom uwamp pamwing ni dijuku diey—mud kwikal ni musangar, ukash wa mujimbu uwamp, chisambu, ni yom uswirikedina.
Ap mwamu, antu avud akat kwidjidjek anch kakutwishap kutan yom yiswirikedinau mu machuku ma kurutu. Amen kal yishiken yakad kutongin—mud chipupu cha COVID-19 chaletina yibudikin yiyimp nakash mu mashakamin ma antu, chaletishina uzwendj, ni chajipeshina antu avud nakash. Mud chibudikin, antu akat kutong anch kakutwishap kuchingej kutan musangar mu machuku ma kurutu.
Mulong wa kwidjidjek kwinoku, antu akat kusurab yom yikutwisha kuyikwash kwikal ni mwom uwamp mu machuku ma kurutu. Antu amwing akat kuchingejin usu wakad kumekan ku mes mud katok ni kwitiyij anch yom yawonsu ya mu mwom wa muntu asambela kal kuyitenchik kurutu kwa chisu. Antu avud akat kwilej mashikol malemp ni kukimb nakash nfalang, mulong akat kutong anch yom yiney yikuyikwash kwikal ni yawonsu yisotinau. Akwau kand akat kutong anch mulong wa kwikal ni musangar, chitin kwau kwikal muntu muwamp.
Ov, yitongijok yiney yikutwish kukwikadish ni mwom uswirikedina mu machuku ma kurutu? Kurutu kwa kwakul, ufanyidin kushinshikin yipul ey:
Mwom uwamp mu machuku ma kurutu wimedin pa yom ik?
Ov, kwilej ni nfalang yikutwish kulet mwom uwamp?
Ov, kwikal muntu muwamp kukutwish kulet musangar mu mwom?
Kwisu ukutwisha kutan umutakel wakin mulong wa kwikal ni musangar mu machuku ma kurutu?
Nimero winou wa Chinong cha Kalam ukutwish kukukwash kutan yakul ku yipul yiney.