Ukutwish Kutond Mutapu Ukwikala Machuku Mey ma Kurutu

Kwasut kal mivu piswimp 3 500, Yehova Nzamb wayileja atushalapol end yom yading yifanyidinau kusal mulong wa kwikal ni mwom uwamp mu machuku ma kurutu. Wayileja anch: “Nakutekinany kal mwom ap rufu, chiyukish ap riyind. Tondany mwom chakwel en ni a majuku men makeza kez, wez upandany.”​—Kuvurik Yijil 30:19.

Mulong wa kwikal ni musangar mu machuku ma kurutu, antu end ading afanyidin kukwat mupak uwamp. Niyetu wawiy mupak tufanyidina kukwat nlel. Bibil urumburil mutapu tukutwisha kutond kwikal ni mwom uwamp mu machuku ma kurutu anch: “Mu kumukat [Yehova] Nzamb wen, ni mu kuziyil dizu diend.”​—Kuvurik Yijil 30:20.

MUTAPU IK TUKUTWISHA KUMEKESH ANCH TUMUKATIN YEHOVA NI TUTESHIN DIZU DIEND?

ILEJA BIBIL: Mulong wa kumukat Yehova, ufanyidin chakusambish kwilej piur pend kusutin Bibil. Anch wasal mwamu, ukujingunin anch ud Nzamb wa rukat ni ukatin kukusadin yom yiwamp nakash. Ukwitin anch umulembilang “mulong ukat [kukulam].” (1 Pita 5:7) Bibil ukanin anch ang wasal usu wa kumusejin Nzamb, “niyend ukusej piswimp ni [yey].”​—Jakobu 4:8.

SADIN YOM WILEJINA: Kumutesh Nzamb kurumburikin kuziyin ku umutakel wend udia mu Bibil. Anch wasal mwamu, ‘ukutwish mu mwom wey ni ukusal yom nich manangu.’​—Joshua 1:8.