Ov, Kud Kamu Umutakel Wakin Ukutwisha Kutushikij Kutan Musangar mu Machuku ma Kurutu?

Mud mwalejanau kal mu mitu ya milong yasambelang, antu avud apakishin kukimb mwom uwamp mu machuku ma kurutu kusutin kusot kwijik ya kurutu, kwilej shikol, kupit nfalang, ni kwikal muntu muwamp. Chawiy, kulondul jinjil jinej kud mud kusadin kart wa makasu mulong wa kuya kwi ndond twakad kwijik. Ov, chinech chirumburikin anch kwikil umutakel wakin mulong wa kutan musangar mu machuku ma kurutu? Bwat!

UMUTAKEL UDIOKILA KU MUSUL WAKIN

Anch tukimbin kukwat mipak, yisu yivud tukat kuyipul antu adia amakurump ni akweta manangu kutusutamu etu. Chisik chimwing, tukutwish kutan umutakel wakin piur pa machuku metu ma kurutu udiokila kud muntu upandakena kujimb ni ukweta manangu kutupandakanamu etu. Yiyul ya muntu winou tuyitanin mu mifund yitumbila yasambishau kufund pasut kal mivu 3 500. Mifund yiney yitumbila yisadin buku utazukinau anch Bibil.

Mulong wak ufanyidina kuchingejin Bibil? Mulong Muntu wamufundikisha ndiy upandakena kujimb ni ukweta manangu mapandakena pa mangand mawonsu. Amurumburil anch ndiy “ukweta mwom kudiokal pakur wakad disambishil,” udingaku kwend “kudiokal chikupu ni chikupu.” (Daniel 7:9; Kuseng 90:2) “Ndiy watanga maur, ndiy kusu Nzamb umwing [wakin]! Watanga kand mangand.” (Isay 45:18) Wiyijikishin amwinend anch dijin diend dia pakampwil ndiy Yehova.—Kuseng 83:18.

Mulong Bibil ud buku udiokila kud Sakatang wa yom yin yawonsu, kalejenap anch kud muchid kanang, ap antu akweta ulomb wa chikit kanang akweta usey kuyisutamu akwau. Yiyul yend yichikwet ukwash djat ni nlel ni yayikwashin kal antu a pa mangand mawonsu. Bibil udiaku nlel mu mazu mavud ni amupalangeshin kal nakash pa mangand mawonsu kusutamu mabuku makwau.a Chinech chimekeshin anch antu a ndond yawonsu akutwish kumutang, kumutesh nawamp, ni kutan umutakel. Yiney yikwatijadin kamu ni yom yilondinay Bibil amwinend anch:

“Nzamb kakwetap kasolikany pakach pa antu, bwat. Ku michid yawonsu, muntu mwawonsu ukata kumulimish ni kusal yom yitentamina, Nzamb ukat kumwitiy.”—MIDIMU 10:34, 35.

Mud mukatay nvaj wa rukat kuyinkish anend umutakel, Yehova Nzamb ud Tatuku wa rukat ukata kutukwash kusutin Dizu diend, Bibil. (2 Timote 3:16) Ufanyidin kuchingejin Dizu diend; mulong ndiy watutanga ni wij yom yikutwisha kutuletin musangar mu mwom.

BIBIL UKWET UMUTAKEL WA KUCHINGEJIN

Tukutwish kuchingej anch Bibil ukwet umutakel wakin piur pa machuku ma kurutu mulong kwasut kal mivu 2 000, wasambela kulejan yinship ni mikadil yikwikalau nich antu, yom tumena nlel.

YINSHIP

“Muchid ukez karish ni muchid ukwau, want ukez karish ni want ukwau. Kukez kikal kunyikek kwa ngand kuyimp, ni kamungun, ni yipupu kwawonsu.”—LUKA 21:10, 11.

MIKADIL

“Ijik anch, machuku ma kwisudiel makez kikal ma mar nakash. Antu akez kikal in kwikat ayinau, in kukat nfalang, in kwibaz, in kwishimek, in kumusaal Nzamb masaal, in kuyibwambwil anvajau. Akez kikal akad kujikitishang, akad kulimish yom yitumbila. Akwikal in michim yichinchikina akad kwitiy jinkand, in matungu akad kwikand ayinau, in chisum, in kukis yom yiwamp. Akez kikal in kutungulijan matungu, akad kubangaku antu akwau, in kwitutul, in kukat yom ya kwisangarish ayinau kupandakan kumukat Nzamb.”—2 TIMOTE 3:1-4.

Yom ik ukutwisha kulond piwajingunina kal anch Bibil wafundau kwasut kal mivu yivud mwamu, wasambela kurumburil yom yisadikina nlel unou? Pakad kwidjidjek, ukutwish kulond kamu mud Leung wa mu Hong Kong walonda anch: “Mauprofet ma Bibil mawanyidina nlel amafunda kwasutin kal mivu yivud. Chikasiken nakash kud muntu kwend wa mbij kusambel kulejan yom yikusadika kurutu nich kashinsh mwamu. Bibil ufanyidin kwikal buku wapepilau kud muntu upandakena kujimb kutusutamu etu.”

Bibil ukwet mauprofet mavud mawanyidina kal.b Chinech chiletin kamu kashinsh anch Bibil ud Dizu dia Nzamb. Yehova ulondin anch: “Yam kusu Nzamb, kwikil mukwau mudi am. Kudiokal pa kusambish nakulejany[a] yom yikeza kamekan kurutu.” (Isay 6:9, 10) Chawiy, tukwet mayingishin mawamp ma kwitiyij yom yilondinay Bibil piur pa machuku ma kurutu.

UMUTAKEL UKUTWISHA KUKUKWASH NLEL DJAT CHIKUPU

Ukutaninamu amwiney anch walondul umutakel udia mu Mifund Yitumbila. Shinshikin yilakej yimwing.

YIYUL YIWAMP PIUR PA NFALANG NI MUDIMU

“Chidi chiwamp kwikal nich yom yikemp nich chisambu, kupandakan kwiswidiosh nich midimu yikash yakad ukwash. Mwamu chidi kumulondul rinkind.”—MULEJ 4:6.

MASHAKAMIN MA MU DIJUKU

“Chifanyidin ngatan mwawonsu kumukat mukajend mudi mwikatilay amwinend. Chifanyidin niyend ngachik mwawonsu kumulimish nfumwend.”—EFES 5:33.

MUTAPU WA KUSHAKAM NAU ANTU AKWAU

“Ikuchika ku kuswej, ulika ujim. Kangal wiswidiosh, mulong yawiy yikata kutwal ku kuyip.”—KUSENG 37:8.

Kusadin yom yilondinay Bibil kukukukwash nlel ni kukufungwil njil ya musangar mu machuku ma kurutu. Tutanin mu Bibil kukan kuwamp nakash piur pa mwom uwamp wa machuku ma kurutu kulejenau kwinshin oku

CHISAMBU NI DIKING

“Akez kasangar nakash ni kuzangijal mu chisambu.”—KUSENG 37:11.

ANTU AWONSU AKWIKAL NI YIKUMBU NI YAKUDIA

“Awiy akez katung yikumbu ni kushakamamu ayinau. Akez kadim yir ya mitond ya nviny ni kudia mabuj mau.”—ISAY 65:21.

KUKWIKALAP MAYEJ AP RUFU

“Kukez kikalap kand rufu, ap madil, ap kwishikokin, ap kusansan.”—KUJINGUNIK 21:4.

Yom ik ufanyidina kusal mulong wa kutanyinamu mu kushilamu kwinoku kwa machuku ma kurutu? Tan chakul mu mutu wa mulong ulondwilaku ou.

a Mulong wa kwijik yom yivud piur pa kukarumun kwa Bibil ni kumupalangesh pa mangand, andam pa www.jw.org ni tal pafundinau anch MAFUNDISH MA BIBIL > NSANGU NI BIBIL.

b Mulong wa kwijik nsangu jivud, tal shapitre wa 9 wa buku La Bible : Parole de Dieu ou des hommes ? wabudishau kud Atuman a Yehova. Ud kand pa Internet pa www.jw.org. Tal pafundinau anch BIBLIOTHÈQUE > LIVRES & BROCHURES.