Yom Yiney Yawonsu Yirumburikin Ik?
YESU KRISTU walonda anch: “Disudiel dia mangand” dikez kumeken kusutil kwi njit, kamungun, yipupu ni kuzal kwa divu.—Mateu 24:1-8; Luka 21:10, 11.
Kudiosh mu 1914 mwom usheshikin kwi njit pakach pa michid ni pakach pa yisak ya tubil, chisu ni chisu chiding chibudikin cha amakurump a yikumbu ya winzamb akata kuyibachik ap kuyikwash yid kanang ya chipolitik, ni katat chidi kusutil ku kupalangan kwa kuyizadish antu nich wom wa rufu.
Kwikalap nchik kuya kurutu kwa windim (siyans), tutikit twa antu tuburedin yakudia mu mangand mawonsu. Muvu ni muvu tutikit twa antu tufil mulong wa kuburen kwa yakudia.
Chipupu, ap kusamburik kwa mayej kupalangena mu mangand mawonsu, kudi ni kwawiy chikunku cha chijingidij chapanay Yesu. Kupwa kwa Njit ja Mangand ja I, chipupu cha musong wa mashik chajipa antu 21 000 000 ni kusut. Yidiap mud yipupu ya pasak yadinga ching mu jindond kanang, pakwez chakwata michid pa divu diawonsu pamwing ni matung ma kulemp. Katat SIDA niyend uyikwatin antu avud pa mangand mawonsu, ni yipupu mud chimpim, malariya, wimputames wa antu ashicha ku chikul cha kawit, mayej ma Chagas madandamedin mu michid yiyila kurutu.
Marapor malondil anch kudi makum ma tunan twa kuzal kwa divu kusadikina kukweta usu kushalijan muvu ni muvu. Yikalap nchik yom ya mudimu ni ukaliweny ukwetau, yak mwi ndond jikweta antu avud yidia chibudikin cha kuzal kwa divu yikadil kal jinsangu ja pa chisu ni chisu.
Bibil niyend wabwaka anch: “Pakwez ijik anch mu machuku ma kwisudiel anch masej piswimp, kukez kez yom yikash. Antu akez kwikal in kwikat ayinau, in kukat nfalang, in kwibaz, in masaal, in kufuny ulab, in kubwambul kudi anvajau, akad kujikitish, akad kutumb; akwikal in chisum, kakulikishijadinip tuyimp twau, in dizaz, akad kwikand, in kukis kuwap; akez kwikal in kutungilijan, in kwitutul kwitong, in kubwambul, akwisangaresh ayinau, Nzamb bwat; akez kwikal ni chifu cha Nzamb, pakwez end atun ukash wau. Chin antu adia mwamu.”—2 Timote 3:1-5.
Ov witiyijinap anch tudi mu “machuku . . . ma mar nakash”?
Ov umenap anch antu, mu chilik chijim nakash, ikatin ayinau, akatin nfalang nakash ni adi in kwibaz?
Nany ukutadika anch mangand mizwilap too ni antu akata kukasikeshin yisakin yau ayinau pakwez akad kujikitishang, akad kulimish kwovijan ni akad kushinshaman?
Ov wij anch kuyibwambwil anvaj pamwing ni kuburen rukat kwavulijan kal nakash, chidiap anch ching mu jindond jikemp pakwez mu mangand mawonsu?
Witiyijin chakin anch tudi mu mangand mamwing makatina nakash yom ya kwisangarish ayinau kupandakan kukat yom yiwamp. Wawiy mutapu urumburila Bibil mwikadil ukwikalaku mu “machuku ma kwisudiel.”
Ov kwitin kand uman ukwau uvud chakwel kujingunin chirung chitushicha? Yesu wabwaka kand anch pa chirung chinech, rusangu ruwamp ra Want wa Nzamb akez kurilejan mu mangand mawonsu. (Mateu 24:14) Ov chom chinech chisadikin?
Tour de Garde, gazet wengamidina pa Bibil mulong wa kulejan rusangu ruwamp ra Want wa Yehova, akat kumuchap pakad kujing mu jindim jivud kupandakanamu gazet mwawonsu.
Muvu ni muvu, Atuman’a Yehova akat kusadil asaa miliyar umwing ni kusut mulong wa kupan uman wa Want wa Nzamb kud antu akwau.
Akat kupalangesh mikand yirumburila Bibil chisu ni chisu mu jindim piswimp 400, ap jindim jilondinau kud antu adia kulemp ni tuyisak tukemp-tukemp twa antu. Atuman’a Yehova ashikijin kal rusangu ruwamp ku michid yawonsu; alejen kal kand mu matung mavud ni mu materitwar mavud makemp-makemp mu kuman kwa chipolitik. Mu jingand jivud, akat kutakel pakad kujing program wa mafundish ma Bibil.
Chakin, rusangu ruwamp ra Want wa Nzamb akat kurilejan mu mangand mawonsu, chidiap mulong wa kunyingumuku mu mangand, pakwez chidi mulong wa kupan uman. Kwawonsu antu ayinkishin mutapu wa kumekesh anch akat kumubang muntu watanga maur ni divu ni anch akez kumekesh kalimish mulong wa yijil yend ni kumumekeshin mukwau muntu rukat.—Luka 10:25-27; Kujingunik 4:11.
Katat kamu ak, Want wa Nzamb ukez kudiosh pa divu tuyimp twawonsu ni kudisal dikal paradis mukeza kwikal kutentam.—Luka 23:43.
[Kamushet/Chipich chidia pa paj wa 6]
Machuku ma Nsudiel ma Chom Ik?
Kimadiap machuku ma nsudiel ma muchid wa muntu. Bibil upanin ruchingej ra mwom wa chikupu kud antu asadila rusot ra Nzamb.—Yohan 3:16, 36; 1 Yohan 2:17.
Kimadiap machuku ma nsudiel ma divu. Dizu dia Nzamb dikanin anch divu dikushal chikupu.—Kuseng 37:29; 104:5; Isay 45:18.
Pakwez, minam madi machuku ma nsudiel ma ditenchik dia yom diakad rukat, dia chisum, ni antu alamatina ba ku yisal ya ditenchik dined.—Jinswir 2:21, 22.
[Kamushet/Chipich chidia pa paj wa 7]
Ov Chakin Kamu Bibil Udi Dizu dia Nzamb?
Chisu ni chisu, aprofet a Bibil afunda anch: ‘Yehova ulondil anch.’ (Isay 43:14; Jeremiy 2:2) Ap Yesu Kristu, Mwan a Nzamb, wakasikeshina anch ‘mazu madingay ni kulejan kimadiokalap kudi ndiy amwinend.’ (Yohan 14:10) Bibil ulondil patok anch: “Mazu mawonsu ma Mukand wa Nzamb madiokala ku spiritu wa Nzamb.”—2 Timote 3:16.
Kwikil buku mukwau ap umwing upalangeshinau mu jindim jivud mwamu—2 200 ni kusut, mud muchilejenau kud Alliance biblique universelle. Kwikil buku mukwau ap umwing wangenau mwamu—katat makopi mamiliyar manying ni kusut. Ov kichawiyap ufanyidina kuchingejin chisadika mulong wa uruu udiokila kud Nzamb mulong wa antu awonsu?
Chakwel kutan minsamb piur pa uman umekeshina anch Bibil udiokil ku spiritu wa Nzamb, tal buku La Bible : parole de Dieu ou des hommes ? , wapalangeshau kud Atuman’a Yehova.
Ang utangin Bibil ni kwijik anch udi chakin kamu Dizu dia Nzamb, ukez kwisakin sens.
[Kamushet/Yipich chidia pa paj wa 8]
Want wa Nzamb Chom Ik?
Udi winyikel udia mwiur umekeshina ukaleng wa Nzamb wakin, Yehova, Sakatang wa diur ni divu. —Jeremiy 10:10, 12.
Bibil umujimbwil Yesu Kristu mud ndiy winkishinau ulabu winou wa kuyikel kud Nzamb. (Kujingunik 11:15) Padingay pansh, Yesu wamekesha anch wadinga nich ulabu ukash udiokila kud Nzamb—ulabu wamutwishisha kwikal nich usu piur pa yom ya chitangil, kwok milad yawonsu ya mayej, ni kuyivumbul afu. (Mateu 9:2-8; Marko 4:37-41; Yohan 11:11-44) Uprofet wa Bibil wapepilau wabwaka anch Nzamb ukez kumwinkish kand “usu wa kuyikel ni uyaj, ni want, chakwel antu a michid yawonsu, ni a mitapu yawonsu, ni a jindim jawonsu amusadil ndiy.” (Daniel 7:13, 14) Winyikel winou autazukining anch Want wa mwiur; mulong katat Yesu Kristu uyikedil mwiur.
[Chipich chidia pa paj wa 7]
Kulejan rusangu ruwamp mu mangand mawonsu