Ov, Kwikal Muntu Muwamp Kukutwish Kutuletin Musangar mu Machuku ma Kurutu?

Antu atongin kal mu mivu yivud nakash anch kwikal muntu muwamp kwawiy kukuleta musangar mu machuku ma kurutu. Chilakej, antu avud a mu Aziy akat kwitiy yom yalonday filozof umwing wijikena nakash, Confucius (551-479 K.C.C.) anch: “Yom wakad kukat anch antu akusadin, kangal niyey wayisadinay akwen.”a

NJIL YILONDWILAU ANTU AVUD

Antu avud adandamedin kutong anch ang ikal ni yaku yiwamp, akwikal ni mwom wa musangar machuku ma kurutu. Akat kusal usu wa kwikal antu a kalimish, in chisambu, akat kuyikwat antu awonsu nich usey, ni kulam kom kawamp. Linh udia mu Vietnam ulondin anch: “Nading kutongang anch ang nikal mwin kashinsh, nafanyina kutambul yiyukish.”

Mband ndiy winou umwing ukat kuyinkish atuzwendj aburedina yikumbu yakudia.

Antu amwing ayikasikeshining mu marelijon mau kusal yom yiwamp. Ikundj umwing, Hsu-Yun udia mu Taiwan ulondin anch: “Anfundisha anch yom yisadinay muntu pachidiay mwom yawiy yikumekesha anch ukwikal ni mwom uwamp ap ukuman mar pakufay.”

YISU YIBUDIKIN YIKATA KWIKALAKU?

Kwinsudien kwa dichuku, mband winou wovil ushon ni waziyang kal ni umusendin mwanend.

Chid chakin anch ang twayisadin antu akwau yom yiwamp, tukat kutaninamu yom yivud. Pakwez, antu avud asadining usu wa kwikal antu awamp akat kujingunin anch kusal mwamu kuyiletidiningap chisu chawonsu yom yading yichingejinau. Mband umwing dijin diend Shiu Ping ushicha mu Hong Kong ulondin anch: “Nileja kusutin yom yanshikena anch antu akata kusal yom yiwamp kakatap yisu yawonsu kwikal ni mwom uwamp. Nasala usu wam wawonsu mulong wa kulam nawamp dijuku diam ni kusal yom yiwamp. Pakwez nfumwam wanchina wansha ni mwan.”

Antu avud amen anch antu avud adia mu marelijon kadiap kwau antu awamp. Mband umwing wa mu Japon, dijin diend Etsuko, ulondin anch: “Nandama mu relijon umwing ni nikala ntakel mwin kurijek mijikit ya ansand ni ayangadim. Antu a mu relijon wam annenganesha nakash piur pa mwikadil wau wijondina, kusadin kuyimp kwa ulabu wau, ni kuburen win kashinsh mu kusadin kwa nfalang.”

SHIU PING wa mu HONG KONG ulondin anch: “Nasala usu wam wawonsu mulong wa kulam nawamp dijuku diam ni kusal yom yiwamp. Pakwez nfumwam wanchina wansha ni mwan.”

Antu amwing ading ipanina nakash mu milong ya relijon ni kusal usu wa kusal yom yiwamp aziya payishikena yom yiyimp. Winou wawiy mutapu wiyovay Van, mband ushicha mu Vietnam. Ulondin anch: “Dichuku diawonsu nalandang mabuj, yisalamb, ni yakudia, ya kupesh pa chintamb cha angakam afila kal nich ruchingej anch nikutambul yiyukish mu machuku ma kurutu. Chikalap nchik yom yawonsu yiwamp ni kwifukwil kwam mu mivu yivud, nfumwam wayela nakash. Kupwa, padingay mwanam mband ku shikol mwi ngand yindj, wafa.”

CHITINAP KWAU KUSU KWIMEN PA KWIKAL MUNTU MUWAMP

Chid cha usey kwikal muntu muwamp, pakwez kud yom yikwau yifanyidina kusal mulong wa kwikal ni musangar mu machuku ma kurutu. Mulong wak? Shinshikin yom yitulejinay Bibil.

KADIAP MUNTU WIN MWAWONSU UKATA KUTOND KUSAL YOM YIWAMP

“Mwin yitil umwing ukat kushesh yom yiwamp yivud.”—MULEJ 9:18.

Ap anch wasal usu wa kwikal muntu muwamp, yisal yiyimp ya antu akwau yikutwish kuyipish musangar wey wa machuku ma kurutu. Chilakej, pa chirung cha chipupu, ukutwish kulimish mbil jiletinau amakurump a ngand ja kulik kuyisejin antu akwau piswimp nakash. Pakwez chikwikal mutapu ik anch antu amwing kalimishinap mbil jinej? Yisal yau yikutwish kusamburish mayej kud antu asadina usu wa kulimish mbil ja kwichidij.

ANTU AKUTWISH KWIDIMB PIUR PA YOM YIDIA YIWAMP NI YIYIMP

“Kudi njil yimwing yikatay kutongay muntu anch yitentamin, pakwez kwisudiel kway yidi njil ya rufu.”—JINSWIR 14:12.

Kud jinsangu jivud ja antu ading nich kashinsh anch yom yading yisadinau yading yiwamp, pakwez kwinsudien ajingunina anch yading kwau yiyimp. Ap anch ading atongin anch yom yisadinau yidi yiwamp, adandamena kuman mar mulong wa mipak yiyimp yakwatau.

KWIKIL WIJA YIKUMUSHIKENA DIAMASHIK

“Kiwijanyap chom chimwing chikushika diamashik, ap kusu ku mom yen yin.”—JAKOBU 4:14.

Ap anch muntu wikalap nchik mwin kashinsh, rufu rikutwish kumukashimwish. Chilakej, pa chirung chinech cha chipupu cha COVID-19, antu avud ading akweta muchim wa kwipan mulong wa kuyikwash akwau ashadishang mwom yau. Shinshikin kand yom yamushikena Liting, mband udia mu Chine wafisha tatukwend wasala akisidan ni motak. Ulondin anch: “Novilap kurumburik mutapu washikenay muntu muwamp mwamu kufa. Tatuku wading nsalamudimu ukweta mushiku, wikepishina ni mwin yakin. Ndiy umwing kusu wafa pakach pa antu ading mu motak.”

Anch kwikal muntu muwamp kutwinkishinap kamu kashinsh anch tukwikal ni musangar, chad chom ik chikutwisha kulet mwom uwamp? Tuswiridin umutakel wakin mulong wa kwakul ku chipul chinech; musul wa kuchingejin ukutwisha kwakul ku yipul yiney ni kutulej ya kusal mulong wa kwikal ni musangar mu machuku ma kurutu. Kwisu tukutwisha kutan umutakel mud winou?

a Mulong wa kwijik yom yivud piur pa mafundish ma Confucius, tal shapitre wa 7, paragraf wa 31-35, wa buku L’humanité à la recherche de Dieu, wabudishau kud Atuman a Yehova ni udia kand pa kapend ka www.jw.org.