2 | ‘Kwongoj Kudiokila mu Bibil’

BIBIL ULONDIN ANCH: “Yom yawonsu yafundau pakur mu Mukand wa Nzamb ayifunda mulong wa kutulejan etu. Afunda mwamu chakwel tukujamish ni [kwongoj] mulong wa ruchingej rezila mu Mukand wa Nzamb.”—ROM 15:4.

Chirumburikina Mazu Minam

Bibil ukat kutukasikesh nich yitongijok yongojina yikutwisha kutukwash chisu turishina ni yitongijok yiyimp. Uruu wa Bibil utwinkishin kand ruchingej anch piswimp ap yovil yawonsu ya kusansan yikwikalapaku kand.

Mutapu Ukutwisha Uruu Winou Kukwash

Yisu yimwing etu awonsu turishining ni yovil yiyimp; pakwez antu arishina ni mayej ma kuziy mu manangu ap yakamish akat kwiyov yisu yivud nayimp. Mutapu ik ukutwishay Bibil kukwash?

Mu Bibil mud yitongijok yiwamp tukutwisha kuswinkesh pa yitongijok yiyimp. (Filip 4:8) Yitongijok yiney yiwamp yikutwish chakin kamu kutwongoj ni kutudish manangu metu chakwel tutwisha kupandakan yovil yetu yiyimp.—Kuseng 94:18, 19.
Bibil ukutwish kutukwash kwipuk kutong anch tukwetap usey.—Luka 12:6, 7.
Maverse mavud ma mu Bibil matwinkishin kashinsh anch tudiap kwetu ayinetu ni anch Nzamb Sakatang wetu wij kamu nawamp yovil yetu.—Kuseng 34:19; 1 Yohan 3:19, 20.
Bibil ukanin anch Nzamb ukudiosh yitongijok yawonsu yiyimp. (Isay 65:17; Kujingunik 21:4) Chisu turishina ni yitongijok ni yovil yiyimp, tukutwish kwikal nich kashinsh anch kushilamu kwinoku kutukasikeshin chakwel tudandamena kujijaman.

Mutapu Ukwashinay Bibil Jessica

Mutapu Ukweta Mayej ma Kuziy mu Manangu Usu Pad Am

“Pinawanyisha mivu 25, natwishap kand kusal yom nading kusalang dichuku diawonsu ni ankwata mayej makash ma kuziy mu manangu. Natongijokinang nakash pa yom yiyimp yanshikena pakur. Adokter ankwasha kwijik anch mayej mam ma kuziy mu manangu mading madiokil ku yitongijok yiyimp piur pa yom yiyimp yanshikena pakur. Kudioshaku kwiyokish, nading kand ni kuswir kwa kwambamb ni dokter chakwel ankwasha kujingunin ni kulik kutongijokin pa yom yiyimp yikutwisha kwinyedish.”

Mutapu Winkwashinay Bibil

“Pinaziyang nakash mu manangu, novang wom nakash, niyakamishang chipandakena ni natwishangap kulal. Yisu yivud uchuku narishang nakash ni yitongijok yiyimp yizulang mu mutu wam. Mud mulejenau mu Kuseng 94:19 anch, Nzamb ukutwish kutwongoj ni kutukasikesh chisu turisha ni yakamish. Natekang Bibil ni kaye mwinafundang maverse makasikeshina piswimp ni ulal. Chisu nakanganyang kulal, natangang maverse mamwing ma mu Bibil ni masalang anch yitongijok ya Nzamb yingongoj.

“Bibil utukasikeshin kuswimp yitongijok yiyimp ni yom twija piur pa Nzamb. Pakur natongang anch nikwetap kwam usey ni anch Nzamb kankatinap. Pakwez, najingunina anch yitongijok yiney yikwatijandinap ni yom yilondinay Bibil anch Nzamb ud rukat ni Tatuku wa rongoj ukata kutubangin muntu ni muntu pakampwil. Chawiy napandakana yitongijok yam pa ndond pa kulik anch yawiy yimpandakana. Nileja kwiman mud mwimenay Nzamb. Chinech chankwasha nakash kupandakan yitongijok yam yiyimp nading nich pakur.

“Nichengedin nich impu chisu chikudioshau yitongijok yawonsu yiyimp ni mutapu uyimp wa kutong ukutwisha kutuletin mayej. Nij anch mu machuku ma kurutu kukezap kwikal kand milong ya ukash wa mu manangu. Chinech chinkwashin nijijaman ni kuchingel machuku ma kurutu chisu nikwikala ni ukash wa mujimbu uwanyidina.”