3 | Taninamu mu Yilakej ya Bibil

BIBIL WISAMBIDIN . . . Amakundj ni amband ashinshamena ading ni ‘yovil mud yetwetu.’—JAKOBU 5:17.

Chirumburikina Mazu Minam

Mu Bibil mwizwil nsangu ja amakundj ni amband ading ni yovil yivud yishalijadina. Pitutangina nsangu jau, tukutwish kuman umwing wa pakach pau wading kamu ni yovil mud yetwetu.

Mutapu Ukutwisha Kutukwash Yilakej Yiney

Etu awonsu tukatining anch antu akwau atesha mutapu twiyovila. Pakwez chiding mwamu pakampwil chisu turishina ni ukash wa mu manangu. Chisu tutangina Bibil, tukutwish kwilej piur pa antu akwau ading ni yitongijok ni yovil mud yetwetu. Mud chibudikin, tukuman anch antu akwau niyau amana mar ni tukwiyovap anch tud ayinetu chisu turishina ni yakamish ap yovil yiyimp.

Mu Bibil mud mazu mavud ma antu iyova mud kakwetap mwin kuyikwash chisu chading chirishinau ni yakamish. Ov, niyey walondap kal anch, ‘mwom wanziyish kal kwam’? Mwawiy mwiyovay Moses, Elija ni David.—Kuchind Michid 11:14; 1 Ant 19:4; Kuseng 55:4.
Bibil wisambidin piur pa Ana mband umwing “wanenganana nakash” mulong kadingap ni an ni amutendishang kud mukaj nend.—1 Samwel 1:6, 10.
Bibil wisambidin piur pa Job ikundj umwing warisha niyend ni milong. Ap anch wading ni ritiy rikash mudiay Nzamb, warisha ni yovil yiyimp mulong wa mar mamushikena ni walonda anch: “Nafa kal kwam, kinikupandap kand chikupu.”—Job 7:16.

Kusutil kwilej mutapu watwishau antu inay isambidinau mu Bibil kupandakan yitongijok yau yiyimp, niyetu tukutwish kwikal ni usu tuswirikedina mulong wa kurish ni yakamish yetu.

Mutapu Ukwashinay Bibil Kevin

Mutapu Ukweta Mayej ma mu Manangu Usu Pad Am

“Ankwata mayej ma mu manangu pinading piswimp ni mivu makum matan. Kud yisu yimwing nikata kwiyov mud nikutwishap kupwish mulong ap umwing mu mwom wam. Pakwez yisu yikwau, nikat kwiyov anch mwom ukwetap kwau usey.”

Mutapu Winkwashinay Bibil

“Chilakej chimwing cha muntu wisambidinau mu Bibil nikutwisha kujimbul chid cha kambuy Pita. Warumboka nakash ni kurumbok kwinoku kwasala iyov mud kakwetap usey. Pakwez pa ndond pa kudandamen kulam yitongijok yiney mu manangu, Pita wakata kwikal pamwing ni arund ading afanyidina kumubangin. Pa dichuku nikata kurish ni mayej mam ma mu manangu, kurumboku kwam kukat kwinsal nayimp ni nikat kwiyov anch nid kwam wa chamwamu. Mud Pita, nikatining kwikal piswimp ni arund nam akatina kwinkwash chakwel nidandamen kujijaman.

“Chilakej chikwau cha mu Bibil chinkasikeshining nakash chid cha Mwant David. Waziyang yisu yivud mulong wa milong yend ni winana mulong wa kurumbok kwend. Nikutwish kumwimburij mulong yisu yimwing niyam nikat kusal ap kulond yom nikata kwinan kwinsudien. Mu Kuseng 51 mud mazu ma David mankasikeshining. Mu verse wa 5, David ulondin anch: ‘Mulong nij kal kuyip kwam, ni yitil yam yidi kurutu kwam yisu yawonsu.’ Mazu minam mamekeshin kamu mutapu nikata kwiyov anch niziyin nakash mu manangu, chikutwish kwinkasiken kutong mu mutapu uwamp piur pam. Pakwez nikutwish kand kumwimburij David kusutil mazu mend madia mu verse wa 12 ulondina anch: ‘A! Nzamb, ntagirila muchim usu wa zwang, nginkisha mwiku usu ushinshamena.’ Niyam nikat kumulembil Nzamb mu mutapu winou chakwel ankwash kwikal ni yovil yindj piur pam. Kupwa, verse wa 19 ukat kwinkasikesh. Ulondin anch: ‘A! Nzamb, ey kiukudiulangap muchim waziyina nich runeng.’ Verse winou ukat kwinginkish kashinsh anch Nzamb winkatin.

“Nikat kukasikesh ruchingej ram mulong wa machuku ma kurutu kusutil kushinshikin pa yilakej ya mu Bibil ni pa yom yinginkishinay Nzamb kakat. Kushilamu kudia mu Bibil kukat kwikal kwakin kud am ni kwinkwashin chakin kamu kujijaman.”